Caspar Lahme: Vertellt - Sauerlandmundart

36
De Reäkenkünstler
Wilhelm und Hännes wuren Broier un saten in der Schaile
neäbennander. Bat de oane nit wußte, wußte de andere. Un sai kamen
se ganz gutt terechte. Wilhelm wur de hellere van deän boaden und
mochte seynem Braiern fake helpen. Afsunderlek beym Schreyben un
Leäsen. Ment beym Reäken mit deäm kloanen 1 x 1 kamen se in de
Bedrouille. Dät woll Wilhelm nöi gar nit van der Hand gohn. Wann de
Lehr fix hingernoan frogere, kam Wilhelm nit mier. Hoa wur grade
bey deär oasten Upgabe, dann wuren de anderen all bey der drüdden.
Bo Hännes seyne Nait soh, saggte fär seynen Braiern:
„Ik kann dät aik nit sai fixe. Abber wann ick dran kumme un et nit
woat, dann roe ick oanfach. Un manegesmol häbbe ick aik all
druopen."
Appeldruigen
Jossef wur bey Summers un soh, dät sick Mutter Söphken mit deäm
Appeldruigen plogere.
„Wann jey wellt, dann kann ick jugge Appelschnitzeln up der Fabrik
im Kittelhöis druigen. Do isset löiter feyne warme, un Platz genaig is
aik do."
„Jossef, wann de dät fär mick dain wößt, dann wür mey gehulpen. Ick
well dey aik en gurren Doal van deän Appelschnitzeln ere Laihn
gieben."
Gesaggt - gedoon. Jossef nahm ne graiten Pünsel Appelschnitzeln
mier noh der Fabrik. De Appeln druigeren feyne, un noh ner Weäke
brachte Jossef de gedruigeten Appeln wier noh Summers. De Pünsel
wur nöi ment nai half sai vull ere värher. Bo Söphken dät gewahrte,
saggte't: „Je, suhr do, do sind ge meyne Appelschnitzeln. Noa, bat
sind doa feyne gerohen. Ick soahe, döi heäst dey deynen Doal all
nuohmen. Dät is aik recht sai, de Appelschnitzeln sind gutt."
Jossef blav de Spigge furt. Kennen inzegen Appel harr’e sick
enuohmen. Abber hoa konn seggen un geluoben bat’e woll, Söphken
blaf debey: „Sai könnt de Appeln nit tesammengohn. Kür nit, döi
heäst deynen Doal!"
Ik gloibe, Jossef heät kenne Appeln mehr druiget.