Caspar Lahme: Vertellt - Sauerlandmundart

40
Flämisch Gold
„Kindereesen un Heärbestweer kann me nit truggen", saggten de allen
Lue. Abber nit ment im Heärbest ist dät Weer in user Giegend
wesseleg. Un de Buren hät fake eähre loabe Nait; dann is et te druige,
dann gatzeler’t weäkenlang. Wann me sick dann abber aik nai mit der
Soot odder en Plantetöifeln verdoon heät, dann is alles te late.
Sai gong't aik mol Hoanrech mit seynen Töifeln. Et soll ne ganz gurre
Oort sien, harren se up der Genossenschaft saggt. Abber im Summer
konn me all soahen, bat loss wur. De Strünke wossen wie reype
Geerste in der Mirrelfohre. Un bo do aik nai de Ränen öitblav, sohen
de Strünke sai bedroibet öit, dät me et Greynen kreygen konn. - Me
härr denken können, et laihnt sick nit, sückere Töifeln röit te maken.
Abber dät gong nöi doch nit.
Töifelnröitmaken wur dät nit; me konn eher seggen: Töifelnsoiken. Et
wur ment gutt, dät aik nai en paar Reygen Ackersegen plantet wuren.
Sai harr me wennestens wuot te eäten. Fär de Oagenen gong dät
wuohl. Abber bo im Winter geduorschken weeren mochte, wur hin un
her überlaggt, bat uppen Dischk kam. Weyl abber kenne anderen
Töifeln do wuren, mochten aik de Deärschkers Ackersegen eäten.
Alle laten't sick schmecken. Bo abber Braikschmieß Franz dät Eäten
luobere und saigar frogere:
„Hoanrech, bat schmecket de Töifeln gutt, bat ist dät fär ne Sorte?",
häll de Frugge en Ohm an dachte: „Dä! Nöi sind ve blamiert, wann
röit kümmet, dä ve Ackersegen updischket hät.“
Hoanrech abber mente:
„Franz, dät is ne nigge Sorte. Dät is „Flämisch Gold". Ick well dey
geerne ne Sack vull Plantetöifeln fär nächstes Johr verwahren."