Caspar Lahme: Vertellt - Sauerlandmundart

28
Froijohrsputz
Im Froijohr putzet sick nit ment de Natur; aik in deän Huisern fänget
dann dät Rüstern an. Et is gelungen. De Weybeslue weert ganz
hiddereg, wann de Märzsunne mit eähren oasten warmen Strahlen
scheynt. Un wann dann nai Witten Sunndag te fieren is, kann me ere
Mannskerel ment soahn, dät me Land gewinnt un deän Fruggen nit im
Weäge stett.
Alles mott nigge sien, alles mott gewienert un geschrubbet weeren.
Wann de Verwandskop kümmet, well me sick doch nit nohseggen
loten, me härr dät graite Fast nit örndlek värberett. De Haiptsake abber
wur löiter dät Anstreyken. Dät wur aik jedes Johr noadeg, weyl im
langen Winter de Wänne vam Ziggurien- un Kaffeebrännen ganz
schwatt qualmet wuren.
Anstreyker Wilhelm verstont seyn Geschäft afsunderlek gutt. De
Decke un de Wänne wuren oas ganz witt estricken. Uoben wur dann
en bunt Wulänksken uptohn. De Farben wesselern in jedem Johr; un
de Musters aik. In deäm oanen Johr wuren de Wänne getuppet. Dann
mente me, me wür im Schnoagestöber. Im nächsten Johr wuren van
uobene bis ungene bröine Striche tohn. Dät soh dann öit, ere wann me
bey deän willen Dieren im Zirkus wür.
De Teyt wur me wahne knapp. Überall wachtern se up eähne. Un
därümme strak Wilhelm bey sick tehöise ümmer et leßte an. Dann
mochte sick beeylen, un Marie stont löiter hinger eähme.
„Nöi lot gohn, döi weerst nit ferreg, ick soah’t all kummen. Moren
kummet de Gäste un hey stoht nai deyne Farbenpötte“
Un därümme macht’e de Striche aik öit der freyen Hand. Dät gonk
fixer, wur abber natürlek nit sai feyne strack. Bo Mariechen dät soh,
frogere eät seynen Wilhelm:
"Döi Wilhelm, dät sütt abber gelungen öit. Mäket me dät vandage
sai?" Wilhelm dachte nit lange noh un anfedde:
"Mariechen, dät is de niggeste Maide öit Pareys, dät häbbe ick ment
bey us emacht."
Do wur Mariechen tefreen un fröggere sick, dät eät de schöndeste
Kücke harr.