Murtenpilz 2012 als pdf - Verein für Pilzkunde Murten und Umgebung

MurtenpIlz
OBERLANDAUSFLUG
vom 7. August 2011
Was erlebt man an einem Oberlandausflug?
Sunntig 7. Ougschte punkt siebni am Morge, es rägnet wi us Chüble u äs isch aus angers aus ä schöne
Summertag für ga z‘pilzle. Mir Stöh trotzdem uf u schlürfe ä heisse Kaffee. Der Entschluss isch gfasst mir göh
trotz Rägewätter uf e Oberlandusflug, mir chöi ja eifach mit angere Pilzler stötzlige uf der Alp Barretta i
Beiz gah, u‘ s gmüetlech ha. Mit em Gfühl de am Bahnhof z’Murte alleini da z’stah, si mir mit äm Privatchofför
losgfahre. Aber oha Lätz, e grosse Schar Pilzler stöh i vouer Rägeusrüschtig parat, äs isch haut so, z’Wätter
wird dusse abghaute u der Mönsch isch im Prinzip wasserdicht u ä Pilzler trotzt jedem Wätter. Scho bald
schlängelt sech die längi Outokolonne Richtig Düdingen - Tafers bis zum Restaurant Laterne in Zumholz, hie no
einisch äs feins Kaffee u äs warms Gipfeli. U scho drängt üs d’Jeanette zum Ufbruch, derbi wärs jetzt doch so
gmüetlech worde ir trochene Stube. Folgsam wie mir si hei mir d’Beiz verlah u hei nit schlächt „gugget“ wo üs
d’Sunne aglacht het. Jetz si mir üs vorcho wie am 24 Stunderenne vo Le Mans; Motor starte u scho isch ä
Gruppe abdüset. Mir heis äs bitzli gmütlecher gnoh u gwartet bis der Chef losgfahre isch, so si mer du Richtig
Falli Hölli trötschgelet, z’Auto a der Hauptstrass parkiert, nach paar Sprüch so wie mers gwöhnt si, Bergschuh
oder so öppis ähnlechs a d’Füess bunge u mit em Chörbli losmarschiert. Scho nach paar Meter isch üs die
schnäui Gruppe mit de Outo vo obenabe entgägecho. Mir hei nit gwüsst ob si scho gnueg Pilz gsammlet oder
eifach de Parkplatz verfäut hei.
Mir si im stotzige u total durchnässte Gländ umegraagget u hei zu üsere Ueberraschig sogar schöne und gueti
Pilz gfunge. Aber scho bald isch Aperozyt gsi, dä wei mir sicher nit verpasse u si mit schnäue Schritt, ja eifach
so guets gange isch, richtig Alp Baretta marschiert, da het scho der Duft vo Jeannetts feiner Suppe üse
Hunger lah spüre. Nach äm feine Glas Mischtelacher hei mer di heissi und chüschtigi Suppe chönne gniesse,
derzu es Würtschli (eigentlich si‘s zwöi Würscht gsi), Röschti u nit vergässe äs Kaffee mit Bärggeischt u Nidle.
Ir Zwüschezyt het Jeanette u der Erich äs paar Pilz usgstellt und hei si üs bis is chlinschti Detail erklärt;
auerdings hei si immer wieder meh oder weniger fachmännische Kommentär müesse entgägenäh, äs isch haut
eso we so viu Kenner zäme stöh.
Seite 20