15:00 15:00 18:30 15:00 15:00 - Familienverein Klues

Weeßt du, wat`n Party is?
Nee? Mookt nix hef ick bis güstern ok nich wüßt!
Is nich etwa so, as wenn unsereen to Besöck inlood is, to Geburtsdag oder so. Denn kümmst
du dor an, seggst schöön` goden dag, giffst dien Rükelbusch af un denn geiht dat los.
In de Stuuv is de grode Disch no biede Sieden uttrocken, weil dor´n barg Lüüd koomt.
Notfalls warrt de Köckendisch noch dortoholt, womöglich noch ´n poor Stöhl vun de
Noverslüüd lehnt, dormit jeder sein Platz hed. Dann gifft dat wat to eten oder Kaffee un
Koken un dann wart snackt vun em un vun eer. De Verwandtschop wart dörtellt, wer in
Scheidung liggt, wer`n Kind kregen deiht, wo de Kerl wechlopen is, un so wieder. So kennst
du dat, so hest du dat al hunnert Mol beleevt.
Wenn du nu aber meenst, datt dat en Party is, denn hest du di sneden. Een Party is wat anners,
ik weet Bescheed, ick weer op`n Party!
Snackt un verteelt warrt dor schon mol nich. Op`n Party warrt kommuniziert oder Smaltalk
mokt. Weet ick ok nich wat dat is, over dat heet so. Dann warrt dor keen Disch un Stöhl
toholt, nee de warrt utrüümt, dormit de ganze Bood leer is, denn goht dor jo mehr Lüüd rin.
Dat is wichtig, dat is Partyregel Nummer een.
Wenn du`n Party giffst, denn tellt de Lüüd, de dor tohoopen weer`n.Ünner hunnert is dat noch
kenn Party, dor is dat höchstens een „Sitt-In“. Rükelbusch warrt ok nich mitbröcht, mit so`n
ooltmodschen Kroom fang man blots nich erst an.
Wenn du gewohnt büst so bi acht rüm optokrützen, warrst du scheef ankeken, un du steihst bit
Klock tein dämlich in de Gegend rüm. Vörher kümmt keen, je loter du kümmst, je höger
sticht dien Ansehn, dat is Partyregel Nummer twee.
Dat is Levensoort un bewießt, datt du fix in Äktschen büst un di man blots gau mol freemookt
hest, weil du jo vun een Party no de anner eelst.
Aver dann geiht dat los, jeder hett`n Glas in de Hand, datt blifft ok den ganzen Obend so is jo
keen Platz to`n affstell`n.Iin een Eck is`n improviseerte Bar, as man dorto seggt. An de heff
ick mi vörsichtich ransliekert un unupfällig röverpliert, wat de annern sik so bestellt. Ick will
jo nix verkehrt moken.
Denn fleegt di de överkandidelten Broken man so üm de Ohr’n: „Hällo Billy, für mich’n
Manhatten-Negroni, für mich ne Pink Lady, für mich’ ne Bloddy Mary“. Na un so wieder.
Wenn ik nu wat von Wien oder Beer seggt harr, harrn se woll de Politie holt.
Wenn du bi dat Rinkoom „Goden Obend“ seggst, büst du OUT, Entweder du seggst ganz
loker:“ Hey oder Hällo“- nich Hallo, sonnern mit ä, dat is ganz wichtig. Dormit weet jeder,
datt du dat Schickeriagewäsch beherrscht un denn büst du IN. Noher, wenn du afhaust,
muß du dien Ingelsch över Bord smieten, denn heet dat „CHIAO“.
Over noch is dat nich sowiet, du wöhlst di erstmol vun een Pulk no’n annern un luurst af
woöwer se snackt un denn söchst du di’n Klüngel ut, wo du mitsnacken kannst, du wullt jo
nix verkehrt moken. Se stoht all in Pulks un Klüngels rüm, is jo keen Platz to’n hinsetten.
Denn fleegt di de Brocken man so üm de Ohr’n, de överkandidelten: „Wir hatten Vernissage
im Intermar, total megamäßig.“- „Wir hatten Afrojazz im Alten Meierhof, echt spitze, super,
echt heiß, total geil, megageil gewissermaßen. War ja auch wahnsinnig geil für die Kids
dieses megasuper Schwimmbecken.“
Ik worr immer lütter, ik bün höchstens noch fievundörtig Zentimeter groot un swöör, wenn ik
hier heel wedder rutkumm, spenn ik hunnert Euro för de Obdachlosen. Ik weer in unsern
Klüngel de Eenzige, de noch nix seggt harr. Dat wull ik mi nich nosegg’n loten. So ganz
nebenbie segg ik, dat ick güstern in Stadttheater weer. Junge, Junge dor harr ik wat lospett.
Mit een Ruck wie op Kommando, dreih’n se sik all no mi üm, sogor de vun de annern Pulks.