Colloquium Ælfrici 1 Nos pueri rogamus te, magister, ut doceas nos ...

Colloquium Ælfrici
98 Nolo. Quid tunc mihi proficit labor meus? Sed volo vendere hic carius quam emi illic, ut
aliquod lucrum mihi adquiram, unde me pascam et uxorem et filios.
99 Tu, sutor, quid operaris nobis utilitatis?
100 Est quidem ars mea utilis valde vobis et necessaria.
101 Quomodo?
102 Ego emo cutes et pelles, et preparo eas arte mea, et facio ex eis calciamenta diversi generis,
subtalares et ficones, caligas et utres, frenos et falera, flascones et casidilia, calcaria et
chamos, peras et marsupia; et nemo vestrum vult hiemare sine mea arte.
103 O salinator, quid nobis proficit ars tua?
104 Multum prodest ars mea omnibus. Nemo vestrum gaudio fruitur in prandio aut cena, nisi
ars mea hospita ei fuerit.
105 Quomodo?
106 Quis hominum dulcibus perfruitur cibis sine sapore salis? Quis replet cellaria sua sive
promptuaria sine arte mea? Ecce, butirum omne et caseum perit vobis nisi ego custos
adsim, qui nec saltem oleribus vestris sine me utimini.
107 Quid dicis tu, pistor? Cui prodest ars tua, aut si sine te possimus vitam ducere?
108 Potestis quidem per aliquod spatium sine arte mea vitam ducere, sed non diu nec adeo
bene: nam sine arte mea omnis mensa vacua videtur esse, et sine pane omnis cibus in
nauseam convertitur. Ego cor hominis confirmo, ego robur virorum sum et nec parvuli
volunt praeterire me.
109 Quid dicimus de coco, si indigemus in aliquo arte eius?
110 Dicit cocus: Si me expellitis a vestro collegio, manducabitis holera vestra viridia, et carnes
vestras crudas, et nec saltem pingue ius potestis sine arte mea habere.
111 Non curamus de arte tua, nec nobis necessaria est, quia nos ipsi possumus coquere quae
coquenda sunt, et assare quae assanda sunt.
112 Dicit cocus: Si ideo me expellitis, ut sic faciatis, tunc eritis omnes coci, et nullus vestrum
erit dominus; et tamen sine arte mea non manducabitis.
113 O, monache, qui mihi locutus es, ecce, probavi te habere bonos socios et valde necessarios;
qui sunt illi?
114 Habeo fabros, ferrarios, aurificem, argentarium, aerarium, lignarium et multos alios
variarum artium operatores.
115 Habes aliquem sapientem consiliarium?
116 Certe habeo. Quomodo potest nostra congregatio sine consiliario regi?
117 Quid dicis tu, sapiens? Quae ars tibi videtur inter istas prior esse?
118 Dico tibi, mihi videtur servitium Dei inter istas artes primatum tenere, sicut legitur in
evangelio: “Primum quaerite regnum Dei et iustitiam eius, et haec omnia adicientur vobis.”
119 Et qualis tibi videtur inter artes seculares retinere primatum?
120 Agricultura, quia arator nos omnes pascit.
121 Ferrarius dicit: Unde aratori vomer aut culter, qui nec stimulum habet nisi ex arte mea?
Aelfric: Text rev. 15 May 2012 p. 4 of 6