New website - University of the Free State

10
events
Eerstejaars
is ware ambassadeurs
in die VSA
Ons studente het universiteitsbestuur in die VSA beïndruk met die wyse waarop hulle
ons land en ons universiteit verteenwoordig het. Die program is ’n ongelooflike
investering in ons studentegemeenskap. So sê mnr. Rudi Buys, Dekaan:
Studentesake aan ons universiteit.
Rudi het tydens die groep van 71 studente se twee weke in die VSA sewe van die
nege instellings besoek en ook die geleentheid gehad om met dekane en
visepresidente van Studentesake by hierdie universiteite te gesels. “Ek het besef
dat ons fokus op leierskapontwikkeling en die leiding aan studente deur middel
van die aanbied van verskeie programme in lyn is met die programme wat hierdie
universiteite aanbied,” sê Rudi.
“Die universiteite was geweldig beïndruk met die wyse waarop ons
eerstejaarstudente kon debatteer oor verskeie kwessies. Ek het heelwat versoeke
ontvang dat die program moet voortgaan en dat van die universiteite ook hul
studente na ons universiteit wil stuur,” sê Rudi.
Hy is opgewonde oor die resultate wat met die program bereik is. “Ons studente
het bereik wat ons met die program wou bereik: Om kwessies van verskille en
diversiteit in hul groepe en op ‘n persoonlike vlak te ondersoek. Ons studente het
gegroei en verander en dit is weens hul toegewydheid teenoor die program,” sê hy.
- Lacea Loader