read issue - Episcopal Church in the Philippines

14
NORTH CENTRAL PHILIPPINES
Madaydayaw ti Dios: Ama, Anak, ken Espiritu Santo
ta nadanon tay manen ti tinawen a panagu-ummong
tayo kas familiana ditoy a diocese. Tatta ti maikaduapulo ket
uppat a Diocesan Convention tayo ken nasayaat toy tema
nga intay pinili kas inspirasyon tayo ita a tawen- naadaw
manipud ti surat ni Pablo kadagiti Kristiano iti probinsya ti
Galacia: '...Saanen a siak ti agbibiag, no di ket ni Kristo ti
agbibiag kaniak' wenno iti english kunana, 'It is no longer I
who live but Christ who lives in me' [Gal 2:20].
Adda siguro mangipagarup kadatayo a ni San
Pablo kasla mangopisina a nakatugaw a mangpampanunot
maipapan iti Dios ken ni Kristo sa nangala ti lapis ket
isurat na no ania man dagiti naamiris na. Ti kinaagpaysona
insurat ni San Pablo dagiti aw-awagan tay nga epistola a
mangsungbat kadagiti saludsud dagiti kinaskasabaanna,
wenno mamabbaga kadakuada, wenno mangiwanwan iti
pampanunotda wenno manglawlawag kadagiti madisdisturbo
a panunot wenno pammatida.
Ket awan naidumaan daytoy suratna kadagiti
Kristiano idiay Galacia [dagiti gimong iti siudad ti Pisidian
Antioch, Iconium, Lystra, ken Derbe]. Madisdisturbo dagiti
Kristiano idiay Galacia ta adda dagiti tattao [Judaizers] a
napan mangibagbagbaga a mangdildilaw kenni Pablo ket
ibagbagada a saan a pudno nga apostol isuna. Ket ti sursuro
nga ipapatida kadagiti tattao ket ti pammati ken Kristo ken
panangtungpal kadagiti sursurona ket kasapulan a buyugan
dagiti Gentil iti panangtungpal kadagiti annoruten ti Linted
dagiti Hudio. Ipapati ken ipilitda a dagiti Gentil a naawis
a nag-Kristiano tungpalenda kuma dagiti ug-ugali dagiti
Hudio kas kuma iti panakakugit, dagiti annuroten maipapan
iti makan ken pannangan, ken ti panangtungpal kadagiti
naisangsangayan nga aldaw dagiti Hudio tapno naananay ti
kinaimbagda iti imatang ti Dios.
Dagitoy a tattao kunada a dagiti ibagbaga ken
isursuroda ket adda pammalubos dagiti apostoles idiay
Herusalem. Kasta met nga ibagbagada a saan nga umanamong
dagiti apostoles iti isursuro ni San Pablo a wayawaya ken
Kristo.
Saan a barengbareng daytoy a di panagkikinaawatan.
Dakkel ti kaipapananna ket ti pagbanagan ti Kristianismo
nakasanggir iti pannakarisut daytoy a problema. Agbalin
ngata ti Kristianismo a maysa a mangiwaragawag iti
Naimbag a Damag kadagiti amin a tattao ania man ti puli,
tribu wenno pagsasaoda wenno agbalin to laeng a maysa a
secta ti pammati dagiti Hudio.
from the Dioceses
The Philippine EPISCOPALIAN
Nasiputan ni San Pablo a dagitoy a sursuro ket maikontra
iti pudno Naimbag a Damag ti Dios kenni Kristo Hesus. Ti
pinnakakugit ken dadduma pay nga linteg dagit Hudio ket isu
dagiti namaglasin ken namagsisina kadagiti Hudio ken Gentil
kadagiti naglabas a panawen. Ket no sublian manen dagitoy
awanen tayo ti inaramid ni Hesu Kristo. 'Ta mismo a ni Kristo
ti nangyeg iti kappia kadatayo babaen ti panamagkaykaysana
kadagiti Hudio ken Gentil. Babaen iti ipapatayna, rinebbana
ti pader a namagsina ken namagbinnusor kadagitoy a tattao.
Winaswasna ti Linteg dagiti Hudio a buklen dagiti bilin ken
al-alagaden tapno kadagitoy dua a puli-Hudio ken Gentil,
parsuaenna ti baro a puli.'[Ef 2:14]
Ket iti naibasa tattay isu ti bukod a pammaneknek
ni San Pablo maibasar iti padas na. 'No bangonek manen
ti nalpas kon a rinakrak, mapaneknekan a salsalungasingek
ti Linteg. Ngem no maipapan iti Linteg, natayakon- ti met
laeng Linteg ti nangpatay kaniak- ket iti kasta agbiagak
tapno agserbiak iti Dios. Natayakon a nairaman ken ni Kristo
iti krusna' [Gal. 2:18-19]. Saanen nga iturayan ti Linteg ti
panagbiagna. Babaen ti pammati ken Kristo agbiag isu iti
Apo ket iti pannakikaykaysana ken Kristo nagbalin isu a
baro a tao. Saanen nga agbiag isuna iti sidong ti Linteg no di
ket babaen ti gracia ti Dios nga impaayna baben ken Kristo
Hesus. 'Iti kasta, saanen a siak ti agbibiag, no diket ni Kristo
ti agbibiag kaniak. No kasano ti panagbiagko itan, agbiagak
a maipaay iti pammati iti Anak ti Dios a nagayat kaniak ken
nagted iti biagna gapu kaniak' [vs 20].
Ingibus ni San Pablo daytoy a paset ti surat na no
apay a saan nga umanamong isu iti surs.uro nga ipilpilit
dagitoy 'Judaizers' a mapalinteg tayo iti Dios babaen ti
panangtungpal tayo iti Linteg ken baben dagiti naimbag
nga aramid tayo. No siguro daytoy ti natungpal a mensahe
nagbalin laeng a maysa a sekta ti Judaismo ti Kristianismo
wenno pay ketdi iti panaglabas ti panawen ket entero a
napukaw. Ta no pudno dayta 'maiwaksi ngarud ti parabur
wenno gracia ti Dios ket awan serserbi ti ipapatay ni Kristo'
[vs 21]. Ngem saan a natay ni Kristo nga awan mammaayna
ket ti panangisalakan ti Dios ket agpaay kadagiti amin
a siaayat ken siwawaya a mangawat iti parabur nga iyawatna
babaen ken Hesu Kristo. Dayta ti pakabuklan ti Naimbag a
Damag ti Dios nga inkaskasaba ken inwarwaragawag da San
Pablo kadagiti immuna a Kristiano. Daytoy a mensahe awan
ti siasinoman nga inna inlaksig ket winaswasna ti aniaman a
lapped iti pannakaiwaragawag ti Naimbag a Damag ti Dios
iti entero a sangalubungan.
Ket dayta a Naimbag a Damag naikasaba kadatayo
ket isu met laeng kuma dayta, ket awan kuma't sabalin, a
continued next page