Law determining the organisation, functioning and responsibilities of

Icyiciro cya kabiri: Ubuyobozi n’inzego z’imirimo bya REMA
Ingingo ya 17:
Imicungire ya buri munsi ya REMA ishinzwe Umuyobozi wayo ushyirwaho n’Iteka rya Minisitiri
w’Intebe. Umuyobozi wa REMA agira ububasha nshingwabikorwa. Ni we uhuza akanayobora ibikorwa
bya buri munsi bya REMA kandi akabazwa n’Inama y’Ubuyobozi uko ibyemezo byayo bishyirwa mu
bikorwa.
Hagati y’Inama y’Ubuyobozi n’Ubuyobozi hakorwa amasezerano yerekeye gahunda y’ibikorwa agaragaza
nibura inshingano za buri ruhande n’ibyangombwa bikenewe kugira ngo REMA igere ku nshingano zayo.
By’umwihariko Umuyobozi ashinzwe ibi bikurikira:
1° gutanga amabwiriza y’akazi ka REMA n’ay’Ubuyobozi bw’amashami yose y’Ubuyobozi;
2° gutegura no gushyikiriza Inama y’Ubuyobozi umushinga w’ingengo y’imari izakoreshwa mu mwaka
ukurikira na raporo y’ingengo y’imari y’umwaka ushize;
3° gushyira mu bikorwa ingengo y’imari no gucunga umutungo wa REMA;
4° kwita ku iyinjiza mu kazi no ku mikorere y’Abakozi ba REMA akurikije amategeko;
5° kumenyesha mu nyandiko Inama y’Ubuyobozi imigendekere n’ibikorwa bya REMA, nibura rimwe
mu gihembwe;
6° guhagararira ikigo imbere y’amategeko.
ingingo ya 18:
Umuyobozi akurikira inama z’Inama y’Ubuyobozi akagishwa inama igihe bibaye ngombwa, akazibera
umwanditsi. Ashobora kuzitangamo ibitekerezo ariko ntatora mu ifatwa ry’ibyemezo.
Umuyobozi ntajya mu nama zifata ibyemezo ku bibazo bimureba; icyo gihe Inama y’Ubuyobozi yitoramo
umwanditsi.
Amategeko ngengamikorere ya REMA agena umusimbura iyo adahari.
Ingingo ya 19 :
Ibyo Umuyobozi n’abakozi ba REMA bagenerwa bigenwa hakurikijwe ibiteganywa n’amategeko agenga
ibyo abakozi b’ ibigo bya Leta bagenerwa.
Ingingo ya 20:
Imiterere n’inshingano by’inzego z’imirimo, kimwe n’amashami bya REMA bigenwa n’Iteka rya Minisitiri
w’Intebe, abisabwe na Minisitiri ureberera REMA, amaze kumva icyo Inama y’Ubuyobozi ibivugaho.
Abakozi ba REMA bagengwa n’amategeko rusange agenga abakozi ba Leta.
Icyiciro cya 3: Inama Ngishwanama
Ingingo ya 21:
Inama Ngishwanama ku rwego rw’Igihugu ku bidukikije ni urwego rufite inshingano zo gutanga
ibitekerezo n’ibyifuzo kuri gahunda zihamye, ikanasuzuma raporo ku bidukikije ivugwa mu gace ka 3º
k’ingingo ya 3 y’iri tegeko.