PESCIU ANGUILLA_Extrait

Pesciu Anguilla
3) L’altra cumpunente – diceremu “strutturale” – sò tandu l’immigrati
ghjunti da l’Italia vicinissima malgradu a spiccanza di a storia pulìtica.
A presentazione di i paisani hè lesta – à quessi custì, soca Dalzeto pensava
chì i lettori putenziali i cunnoscenu bè. Sò quessi chì danu à Bastia a so relazione
geugràfica cù u retruterra. Sò elli à incarnà è rende cuncretu u barattu di tutti
i ghjorni di a cità propiu situata à l’orlu di mare è i so cuntorni vivi, ùtili è
fruttìferi, in somma a so tupugrafia vera è cuncreta. Hè dinù a prova ch’elli sò
puttachji è bugie tutte isse chjàchjare chì pratèndenu chì Bastia ùn hè cità corsa
vistu ch’ella ùn hà mai campatu fora di e relazione marìttime cù u cuntinente
talianu è po dopu francese à l’èpica muderna. A stòria chì porta à Pesciu Anguilla
dice, face vede è dà a prova di u cuntrariu d’isse patarachje pèssime è stùpide. À
guardà e cose cun l’ochji aperti si vede a realità : trà a cità è i so cuntorni u passa
è veni trà cità è campagna vicina vicina hè un tramutu vitale è permanente
trà u centru di un inseme vivu chì e so cumpunente fàcenu vede quant’elle sò
strette è interdipendente. Issa vicinanza identitària ed alimentària definisce una
cundizione suciale para trà cultivatori, pastori, mulatteri è artisgiani manuali
di i pìcculi mistieri citatini : serve, panatteri, bancalai, piscadori è tutti quanti.
L’ambiente duv’elli scumbàttenu è càmpanu issi travagliadori in cità sò
i carrughji… Lochi brutti, cughjosi è miseriosi ma pieni di una vita furmiculante
chì i so muvimenti cumplessi – una sottumissione cun rivolta in fieri – incàntanu
à Dalzeto. Porghje un’attenzione fine è permanente à i rimori di a cità, à tal
puntu chì si cunfòndenu e voce di a ghjente chì si scòntranu, si chjàmanu è si
rispòndenu, à quandu ridendu è cun garbu, à quandu azezi è sputendu ghjisteme
è assalti pocu aggarbati. Eppo’ si sentenu e voce di e rivindarole, pisciaie è altri
chì vàntanu a so robba fresca fresca, ancu spessu da cuntrastà unu cun l’altru.
Face sente per mezu di una scrittura chì maneghja l’irunia quant’elle sò pronte
à fà sente anch’elle ch’elle ùn accèttanu in veru a so cundizione inferiore. Simu
propiu luntanu di ciò chì puderia esse attribuitu à l’invenzione di l’autore. Iè,
creazione di un imaginariu ci hè in isse evucazione di Pesciu Anguilla, ma ci
hè dinù un ricordu. A ghjente chì sinu à l’anni sessanta passavanu in carrughju
bastiacciu è à U Mercà, ch’ellu fussi Mercà di Pè o di u restu, l’averanu in mente
cum’è noi – quelli d’issa generazione – l’avemu sempre ancu ind’è l’arechje
memuriale isse voce è cuntrasti varii è sempre vivi…
6