Euskadiko Lurzoruaren eta Hirigintzaren Legea - Euskal Herriko ...

7. Aplikatu beharreko araudiak ebazpena jakinarazteko epea zenbatekoa den berariaz
jasotzen ez badu, berariazko ebazpen horren jakinarazpena egiteko, gehienez, hiru hilabete
emango dira, lizentziarako eskaera aurkezten denetik kontatzen hasita –baldin eta
eskaera hori zuzentzeko edo hobetzeko errekerituz udalak jakinarazpenik egin ez badu–.
211. artikulua. Hirigintzako lizentzia emateak dituen ondorioak
1. Hirigintzako lizentzia lortzeak legitimatu egiten du ekintza eta operazioak egikaritzea,
bai eta dagozkion erabilera eta jarduerak ezartzea eta garatzea ere. Inola ere ez da
bereganatuko –ezta aldeko administrazio-isiltasuna dagoenean ere– hirigintzako
antolamenduarekin edo indarrean dagoen legeriarekin bat ez datorren eskumen eta
eskubiderik.
2. Lizentziak, beti, jabetze-eskubidea kontuan izan gabe eta hirugarrenei kalterik eragin
gabe emango dira.
3. Hirigintzako lizentziak hirigintza-plangintzarekin bat ez badatoz –hirigintzako lizentziak
ematearekin batera beste tresna bat onartzeagatik edo indarrean dagoena aldatzeagatik–,
eta obrak oraindik amaitu gabe badaude, udalak bat ez etortze hori adieraziko
du arrazoiak emanez, eta, kautelazko neurri moduan, obra edo erabilera horiek
berehala etetea erabakiko du. Gehienez ere, lau hilabetetarako hartuko da erabaki
hori.
Kautelazko neurria indarrean dagoen bitartean, eta behin interesdunari entzunda, lizentzia
baliogabetu egin ahal izango du osorik edo zati batean, eta, behar izanez gero, jadanik
hasita dauden obrak edo egiten diren erabilerak amaitzeko edo jarraitzeko zehaztapenak
eta baldintzak ezarriko ditu, bai eta eragindako kalte-galerei dagokien kalte-ordaina
ere.
212. artikulua. Herri-administrazioek sustatutako ekintzak
1. Udalaz bestelako administrazio publikoek sustatzen dituzten jarduketek lurralde-izaera
nabarmenik ez dutenean, administrazio sustatzaileak udalari jakinarazi beharko dio
proiektua, eta udalak, hiru hilabeteko epean, lizentzia emango du, edo, bestela, bere
desadostasuna adieraziko du arrazoiak emanez.
202