Azalaren lehiaketan parte hartu duten kartelak

38 ZENBAKIA · PLAZAOLA ALDIZKARIA
IBILBIDEA
Herriko plazan emanen diogu hasiera ibilbideari,
Iturrizarrea aldera hartuta hain zuzen, eta hemendik
gehienok askotan egin dugun trenbidearen aldeko
Intxaurretako lehen aldapari ekinen diogu. Ataka
igarota ekinen diogu bideari. Oialde parajearen azpi
aldeko bidea jarraituz, alde batera, besteak beste,
ipuru eta elorri ugari ikusiko dugu. Eskuin aldera
begiratuta berriz, Okabioko hego-ekialdeko alde
berdea, tartean Odion gainaren azpialdea eta
hemen behean Tipu aldea eta Kandeletxe. Hona iritsita
esan beharra da, Erasote auzoko parajetan
gabiltzala, eta horra hor, Eztebenea eta Malkorra
ondoan. Aipatu gabe ezin utzi, ibilbide zati honetan
Ozparrun dugula eta goi aldean, Gorritenea baserriaren
inguruan, Perurenatarrek osatu duten
Harriaren museoaren zenbait irudi ikus daitezkeela.
Gero, Perustenea eta aurreraxeago Mandaerreketa
erreka. Tarteka tunel laburrak igarotzen ditugu. Eta
behean garai bateko Erasoteko eskola.
Orain Uitziko parajeekin muga egiten duten egietako
errekatxoak datozkigu bidera. Tunelaren
hasieran eta amaieran bana; Egiandiko erreka,
Balantango erreka eta beste bat tunelaren erdialdialdean
azpi aldetik pasatzen dena; Egiestuko
erreka, hain zuzen.
Tunelak garai bateko lekuko eta freskotasunaren gordeleku.
Trenbideari jarraituz, Burkaitz deituriko parajean
atseden lekua dugu, eta Txoribaso deitzen dena
ondoren. Zati hau urtean zehar, noiznahi berde
“magiko” koloreaz ikusten da apainduta. Zatitxo
hau, niretzat, aurkitu daitekeen politenetariko da;
bazterretan irteten diren harri hautsiak (trena pasa
ahal izateko), zintzilik ikusten diren pagoak, … eta
aipatu dugun berdetasuna.
Bigarren kilometroan Aurtxikinea ikusten dugu
eta bidearen bestaldean Barun baserria. Hemen
bide gurutzea aurkitzen dugu, gorantz Txopillo eta
Onsalunea alderako bidea eta beherantz Joantxenea
eta bertatik Erasote aldeko errepidea. Aurtxikineko
erreka ikus daiteke. Joantxeneaberria eta
Tutenea alderako bidea jarraituko dugu, behean
Errezuma eta Losa ikusten direla. Intxustiko erreka
beherantz dakusagu. Hain ezaguna gertatzen zaigun
bide honi ekinez Gitarrenbueltara iristen gara
lehenbiziko lau kilometroak eginez. Iritsi aurretik urdepositu
txikia dago eta bertan tragoxkaren bat egitea
ongi heldu zaigu.
Bat-batean, eta Bakortzilloko errekaren gainetik
dagoen zubia igarota, Uitzi alderantz doan hiru kilometroko
tunelaren hasierarekin topo egiten dugu,
han, eskuinerantz hartu behar dugu, orain artekoa
baino hestuago den bideari eginez. Aurtxikeneko
borda eskuin aldean utziz, Joantxeneko bordara
iristen gara, han buelta itxia emanez, Txonkonbordako
errekari salto egin behar diogu. Handik aurrera
ederki zaindutako pinudiaren azpi aldeko pistatik
jarraitzen dugu, Intzuretako eta Uitzibidetako errekak
elkartzen diren tokiraino. Eskuin aldean beste
pinudi baten goi aldean Uitzira doan errepidea
somatzen dugu. Malda gora eginez Leitza-Lekunberri
errepideko 8. kilometro ingurura iristen gara.
Handik 200 bat metro errepidetik Uitziko-gaina aldera
eta hemen aparkaleku txiki baten ondotik Guratz
mendi aldera abiatzen den bideari ekin behar zaio.
Hau iaz aipatu nuen mugarriaren itzuliko zatia da.
29