kanmah thawng - The One Star News

More documents

Recommendations

Info

EST: SEPT 12, 2010 VOLUME 1 , ISSUE 105 OCTOBER 14, 2012 KUM 14 NU RALTHA MALALA YOUSAFZAI Vawleicung News Headline ah a khat in a khatmi kum 14 nu kong hi tial loin um khawh a si lo. Muslim biaknak a biami, ttihnung tang ah a ummi nih, amah bantuk nu ngakchia covo caah a au ngammi cu, nu saltha, nu raltha taktak a si. Taliban ralhrang nih a lu le a ttang ah meithal in an kah hnu ah sibawi nih a lu i meithal kuan an lakpiak i, a dam lai tiah 70% an zumh caah a dawtu vialte cu lunglawmhnak in an khat. Malala Yousafzai (14) cu vawleicung minthang thawngca headline ah a kong hi a khat in a khat.Taliban tapung nih hi nu a nun ko ahcun, amah thah ding in a neh kan zulh tthan lai tiah thawng an thanh caah, Pakistan cozah nih a him bikmi ralkap sizung ah a chiah i, security tha taktak in a venpiak. Malala Yousafzai cu March, 1998 kum ah chaklei Pakistan, Swat ramkulh, Minggora khua ah a chuakmi a si. Kum 11 a si lio, 2007-2009 karlak chung hi an umnak ramkulh cu Taliban tapung nih an rak uk. Taliban tapung nih an uk chungah nu ngakchia paoh sianginn kai an rak sianh hna lo. Taliban uknak tang i a nunning, a tuanbia cu Pakistan ralkap nih Taliban an tei hna i, an umnak ramkulh cu Pakistan uknak tang ah a um tthan hnu ah, a tuanbia cu BBC thawngca ah ca in a rak tial. A umnak ramkulh cu Taliban nih an uk i, nu ngakchia paoh sianginn kai an sianh hna lomi cungah, nu sianginn kai a herhning kong a hmuhnak zong a rak tial chih. Nu pawl nuhrin covo le sianginn kai a thatnak kong hi biatak tein a rak tial ve. Nu ngakchiate nih a kum phu loin Nu pawl nuhrin covo le sianginn kai a thatnak kong a tial tikah vawleicung pumpi nih an uar tuk i laksawng phunphun an pek. 2011 ah "International Children's Peace Prize" cu Kigds Right Foundation zuamnak in an pek. December 19, 2011 thiamthiam ah Pakistan National Peace Prizes - kum 18 tang pekmi cu Prime Minister Yousaf Raza Gilani nih a pek. Cun, Pakistan ah The Government Girl Secondary School, Mission Road ah a ummi cu, Malala Yousufzai upat peknak caah, Malala Yousufazai Government Girls Secondary School" tiah January 3, 2012 ah khan an thlen. Taliban uknak tang ah nu pawl an reh chihning hna, nu nih covo an ngeih loning le, Taliban nih nu an hmuhning le nu caah a harning, thinphan, thlalau in an um lengmangnak kong vialte cu BBC ah ca in a tial. Cun, Muslim a si ko nain, nu pawl covo tha tein ttihzahpiak le hmanter a herhning, nu zong sianginn kai a herhning tibantuk zong tampi a chim i a tial. Cu tikah Taliban tapung cu an thin a runh in a runh hna i, Malala thah ding in mi an thlah hna. Nizan tihni October 9 ah khan, Malala Yousafzai cu a hawile he sianginn in an rak ttin lio lampi ah, meithal a putmi pakhat nih, "Ahodah Malala nan si? Nan chim lo ahcun, nan za tein kan kah dih hna lai" tiah a hro hna. "Allah ralkap, Taliban a dodaltu cu, hrem hrimhrim a herh" tiah a ti hna. Cu tikah Malala nih a sinak cu a chim i, Taliban ralhrangpa nih cun a lu le a ttang ah meithal in a kah i a kaltak. A hawile pahnih, Shazia le a dang pakhat zong fak ngai in hliam an tuar. Malala cu a mah le mah hngalh loin a um i, a rannak in Peshawar i ralkap sizung ah an kalpi. Sibawi te nih a lu i meithal kuan cu an lak piak i, sibawi te nih a nung lai timi hi 70% cu kan chim ngam ko tiah an ti. Nihin October 11 tiang ahhin Malala cu amah le mah hngalh loin a um rih ko. Pakistan cozah nih Security a tha taktakmi, Armed Forces Institute of Cardiology, Rawalpindi ah an chiah. Pakistan cozah nih Malala a kaptu a that khomi paoh $ 105,000 (10m rupe) pek nan si lai tiah a thanh. US Secretary of State Hillary Clinton zong nih American Nu Ngakchia Scouts Movement ah, Malala Yousafzai cu miraltha taktak a si. Nu ngakchia hna covo caah fek tein a dirmi a si tiah a thangthat. (Cc: Globalchin) VAWLEICUNG THAWNG WILLIAM LE KATE NIH TAKLAWNG IN A UM MI AN HMUH HNA October 9, 2012: William le A nupi Kate Middleton Cu English National Team nih Training an kainak hmun thar - St George Park ah an va leng. Mah siangpahrang nupa hna nih St George Park ah an kal hi South East Asia le Asia Pacific lei an hnu in an voikhat leng chuahnak a si. England National Team i lutlai pawl he biaruahnak an ngei hnu ah Training Tuahnak Hmun thar le inn hna cu an zoh hna. Training tuahnak inn chung pakhat ah an va lut i, football players hna taklawng in ti-dilmi chungah an rak um ko kha ruahlo tuk in an va chuah hnawh hna. Kan i chawk hna i, ruahlo tuk in pool chung ah taklawng in a rak i kholhmi kan va chuah hnawh hna, khuaruah har ngai a si" tiah William nih capo in a chim tiah Mirror nih an tial. (Cc: Mirror) WHITE HOUSE LE MITT ROMNEY AN I NAIH CHIN LENGMANG October 10. 2012: US mipi ruahnak an lakmi poll ah hin Romney hi a vun kai ngai i a support tu nih cun Obama caan a nai cang "zarh li te lawng a tang cang" tiah an au. Naite i Denver debate nih Romney cu a vun cawi taktak fawn. Nifatin in poll an tuahmi zoh tikah Romney nih Obama hi point 2 ngawt in a tei tiah Gallup le Investors Business Daily nih an chim, cun Rasmussen nih a tuahmi poll ah cun an i tluk. "Election ni phaknak ding ah ni 28 a tang cang" tiah Romney mipi 12,000 sinah a chim. "Zarh li lawng a tang cang, zarh li lawng a tang cang tiah au caan a si cang" tiah mipi cu a ti hna. "Obama nih White House a chuah tak caan a phan cang i November 6 in goodbye an ti caan a phan cang lai" a ti. Romney a vun kai ngai nak a ruang cu debate khan a si, cun nihnih ni ah khan a chimmi cu "abortion" kham ding in timhnak ka ngei lo tiah Lowa newspaper ah a chim. Hihi Romney caah a tthatter ngaimi a si. Obama a dirpitu nih cun "kum li cu peh rih ko seh, kum li cu peh rih ko seh" tiah Ohio khuapi Columbus ah an i pumhnak ah cun an au ve. "Vote rih ko u zeicatiah ttuan ding a um rih. Election hi kan tei ding a hau rih" tiah Obama nih a ti hna. "2008 lioah kan i zuammi vialte kha 2012 he aa khatmi a si ko" a ti. Ohio hi a biapi ngaimi state a si. Ohio ah tthawn lo ahcun Romney hi sungh khawh zong a si. (Cc: Globalchin) IRAN KAH CU MAH LE MAH IKAH A SI LAI October 10, 2012: Iran hi Israel nih a kan kah ahcun anmah le anmah an i nawn a si lai tiah Iran President Mahmoud Ahmadinejad nih biaruahnak an tuah lioah a chim. "Iran hi Israel nih kah an timhmi hi cu mah le mah i nawn bantuk a si tiah vawleicung mifim paoh nih cun an theih tiah a chim. Cun Mahmoud Ahmadinejad nih a chim tthanmi cu Iran nih ral a chuah pi bal lo i hmailei zongah a chuah pi lai lo, asi nain hramhram in namnet a kan timmi hna caah cun kan ram hi kan runven awk hrimhrim a si. A kan kah ahcun kan lehrulmi hna hi a fak tuk lai tiah a chim. Israel hi mi thah lo le mi ram va lak loin a um kho lomi an si. Kan rawk sual lai tiah thih-nun ruat loin aa vengmi an si a ti. Israel hi biatak tein Iran kah aa tim zeicatiah Iran nih a nuclear sermi hi a ngol duh lo. Asinain Iran nih cun nuclear kan sermi hi mipi caah a si an ti. (Cc: Globalchin) LADY GAGA NIH JULIAN ASSANGE A LENG October 9, 2012: US hlasak minthang, Lady Gaga nih ruah lo tuk in Ecuador ah himnak a halmi Wikileaks dirhtu Julian Assange cu a va leng i Ecuadoian EMbassy hnulei khan ah zanriah an ei tti. Lady Gaga cu zanlei suimilam 7pm hrawng ah Julian Assange umnak, London i Ecuador embassy cu a phan i, zan ttim tiang Julian Sinah a va um i, zanriah zong an ei tti. Gaga nih khuachia lukhuh a khuh, angki chung nak le angki leng nak nawn a hruk. Julian belte cu zan ihnak, napkin rang te a hruk i, a angki ah a nehmi te a um ti a si. A nehmi hi nawngpa-ttang bantuk a lo ko tiah an media nih an tial. Lady Gaga a rak chuah lio ah hman an thlakmi ah a angki kep a hrenh lo' ti a si rih. Zanriah an ei pinah zeidah an tuah timi hi aho hmanh nih an langhter lo. (Cc: Mirror) Cahmai: 6
EST: SEPT 12, 2010 VOLUME 1 , ISSUE 105 OCTOBER 14, 2012 INTERVIEW & CELHZUAMNAK THAWNG TULUK CLUB NIH LAMPARD CAWK AN DUH October 9, 2012: England le Chelsea lai chuihtu kum 34 Frank Lampard cu Chinese Super League ah club a si mi Shanghai Shenhua FC (tu Drogba le Anelka umnak) le Beijing Guoan nih zarhkhat hlawhman £ 250,000 ($450,000), thla khat £1 million in an duh tiah thawngpang a um. Tulio Lampard cu England vawlei a thutdirnak fiang lo ngain a um. A ruang cu Chelsea fa ah mino tete an um len cang caah first-11 ah hmunhma a ngei lai lo ti a si. Cucaah kum 11 chung a rak tlawnlennak Chelsea cu chuahtak dawh a si ko ti a si. Cun Chelsea nih kum 30 cung paoh cu kumkhat lengmang minthut chap a si. The Sun thanhca tialnak ahcun tukum chuihcaan a dih cun Chelsea a kal tak cang lai a ti. American ram Glaxy zong nih kum 38 pa Backham he chuihti dingah Lampard cu an duh ve ti a si. (Cc: The Sun) VAWLEICUNG KUM UPA BIK NU 132 AH A THI October 9, 2012: Georgian Nu vawleicung ralpi II le Russia Revolution lio zong ah a nunnak a luatmi nu cu kum 132 a si ah a nunnak a liam ruangmang cang. Antisa Khvichava cu Georgia, Sachino khua te ah July 8, 1880 kum ah a chuak tiah ti a si nain cu kong ah buainak tete a um pah. Amah cu 1965 kum, kum 85 a si ah lakphak le thlaitlaknak rian in ai din i a tuupa kum 42 a simi he an um ti. Hiti a ngandamnak a ruang cu nichiar tein brandy a dinnak in a si tiah zumh a si. Khivicha cu Tuu 12, a tuu fa 18 le tuuchin fa 4 a ngeih hna ti a si. Kum 72 a si cangmi a fapa Mikhail cu kum 60 a si lio ah a rak hrin ti a si. (Cc: The Asian Age) CRC (MALAYSIA) COORDINATOR KO TIN MAUNG SHWE HE TONNAK OSJ: Na chuahkehnak le Malaysia na phak kum na kan chim kho hnga maw? TMS: Ka chuahnak khua cu Langly (Zotung) a si i Malaysia hi 2004 ah ka phan cang. OSJ: CRC Coordinator hi zeitik kum in dah na tuan? TMS: 2011 kum in CRC ah Coordinator ka tuan. OSJ: Na riantuannak ah zeidah a har bik, zei tik can ah dah naa lawmh bik? TMS: Kei hi mi thin tawi ka si i CRC riantuannak hi mipi he riantuan ti a si tikah mipi cungah lungsau khawh ding i zuam hi kai harh bik. Mipi nih dawtnak le ruahnak he experiance a kan pek tikah le mipi nih ruahnak a kan hal tikah ka theih mi thil chungin ruahnak ka pek khawh hna i tlamtlinnak an hmuh khawh caan ah ka lawm bik. OSJ: CRC zungah Chinmi nuva reportnak a tam ngai tiin kan theih i, na tuan chungah a um bal maw a um ahcun zei bantuk buainak dah a tam bik? TMS: Malaysia um Chinmi nuva report nak kong ah hin kan buai ngai ko, ka tuan chungah hin tampi ka ton, an buainak tam deuh cu nuva thennak kong hi a si. OSJ: Zahan naiah Geneva leiin UN riantuantu Malaysia an rak phan tiin kan theih i, minung pa zeizat dah an si? Zei kong bik dah an ratnak a si? TMS: Geneva leiin UN rian tuan tu 3 Malaysia an ra i, an ratnak a ruangbik cu Malaysia UNHCR zong an harsatnak le Malaysia um refugees pawl kan harsatnak kha hlathlai le theih an duh ruangah a ra mi an si. OSJ: Malaysia UNHCR thi sit lioah nu nih pa chekhlainak an tuah hna ning, pa nih nu an chek hna ning ah Geneva lei in a phan mi an lung a tha lo ti zong kan theih i, hi kongah biafiang na kan chim kho hnga maw? TMS: Geneva leiin a ra mi UN rian tuantu 3 nih Malaysia refugees nu pawl nih nan har satnak um ah cun nan kan chim kho lai maw a kan ti tikah, nu lei nih nuhmei (single mother) pawl an harsatnak, tlaihkhih kong le thi sit tikah pa siibawi nih nu chekhlainak le nu siibawi nih pa chekhlainak kong an chim tikah an lung cu a tha lo ngai, an ruah nak bantuk a rak si rua lo. OSJ: Geneva leiin a rak phan mi hna sinah kanmah Chin lei in kan sining zei bantuk pawl dah nan theih ter hna? (Ex. Nu pakhat nih Malaysia ah chungkhar in kan khuasak a har ning a chim ti hna kan theih i) TMS: Kanmah Chin lei in kan sining kong kan theihternak kan ngei lo, Malaysia um refugees dihlak aiawh in chimrelnak le theihternak kan ngei. Cun, chungkhar ngei mi nu pawl hi Malaysia ah an fa le sianginn kai nak a tlamtlin lonak le UN ah chungkhar benh a harnak kong zong kan theihter chih hna. OSJ: UN card a ngei rihlo mi hna caah zei bia an chim mi a um maw? TMS: UN card a ngei rih lomi hna ca ah anmah leiin zeibia hmanh an chim lo nain kan mah leiin tampi kan chim. OSJ: CRC cazin ah UN card a ngei lo mi pa zeizat hrawng dah an um? TMS: CRC cazin ah UN card a ngei lomi 20, 000 hrawng an um lai. OSJ: BIO data UNHCR nih an ngol than mi kongah zei bia a um maw, a ra laimi can ah ruahchannak hna a um maw? TMS: BIO data kongah hin UNHCR nih atu tiang zei bia hmanh a kan chim ti lo, a ra laimi BIO data kongah hin UNHCR nih hmailei cu kanmah tein (system a thar in) kan tuah than te lai tiin All community meeting ah bia a kan cah, a ra lai mi caan ah ruahchannak cu a um ko. OSJ: US a kal cang lai tiin kan theih i, nupi loin na kal kun lai, US ah nupi thit a har ngai ti hna kan theih dakaw.. TMS: Si, zeiti awk tha ti lo, nupi loin kal ding si cang ko hih, US ah nupi thit a har ngai an ti lengmang hrim, Malaysia ah nuva kong ah ka buaipi tuk hna ruangah hin keimah ca ah nupi thit ding ka philh ko hih, nan van ka kuat hau te ko lai he hee OSJ: Malaysia Chinmi chungin si thalo he Kotaraya hrawng a vai mi an tampi tiin kan theih, biafiang nan theihmi a um maw? TMS: Malaysia ah Chinmi a vai mi an tam chin lengmang ko, nai te ah Kotaraya hrawng ah a vai mi hna kha CADC nih interview zong an va tuah ko hna, CADC nih an shelter ah an chiah mi zong an um ko, atu cu kotaraya lawng si ti lo, hmundang zongah Chinmi a vaimi tampi an um cang. OSJ: Careltu caah na siaherh bia? TMS: Kan Chinmi hi mi sin in ruahnak, cawnnak, theinak hal kan duh hna lo, thil cawn ding, theih ding mi a tamtuk ko nain thil thei tuk mi bantuk in kan um hna tikah kan khua ruahnak a bi i thil tuah ding kan thei ti lo. Malaysia ah Chinmi nih thil kan theih lo mi a tamtuk tikah buainak tampi kan chuahpi.Cu ruangah miphun dang hna nih Chinmi zeihmanh ah a kan rel ti lo, thil pakhat khat harnak kan ton tikah bochan ding lawng kan kawl hna. Buai awk tlak lo mi thil kongah kan buai peng hna ruangah Chinmi hmailei ah karhlan ding tluk in kan kal kho ti lo, mi bochannak lawng khua kan ruah tikah bochan mi ka si kho ti lo, bochan mi kan si khawhnak ah Chinmi i zuam hna u sih. Minung kan sinak kan rights kha thei in miphun thleidannak lungthin ngeihlo ding hi a biapi tuk mi a si. Pakhat le pakhat i upatnak (respect) ngei u sih. Chinmi cu miphun (holh ai dangmi) kan tam bantukin thil theimi, thiltuah khomi zong kan tam a hau, kan dihlak nih private planning, family planning ,kan ram ca ah, miphun ca ah planning ngei hna u sih. Cu ti cun Chinmi kan dihlak nih lungrual tein minung pakhat le pakhat, miphun pakhat le pakhat upatnak ngei in thleidannak ngeilo in rian tuan ti hna u sih tiin biatawi chim ka duh OSJ: Na caan tampi na kan pek, kan i lawm tuk. TMS: Ka lawmtuk ve. Cahmai: 7
Page 1 and 2: MOTTO: NA MIPHUN CAAH HMUNHMA THA V
Page 3 and 4: EST: SEPT 12, 2010 VOLUME 1 , ISSUE
Page 5: EST: SEPT 12, 2010 VOLUME 1 , ISSUE

kanmah thawng - The One Star News

Create successful ePaper yourself

Delete template?

Save as template?