Armageddon 2012 - Afrikaans

Dan gaan hy nòg hemel toe, maar intussen lewe hy ‘n kwaliteitslewe hier op die aarde
as ‘n gebore kind van God, vir ‘n getuienis van die reddende genade van die Koning
van die koninkryk.
Dan kan jy staan in die tyd wat voorlê, sonder om deur vervolging of selfs die dood
rondgegooi te word.
En die duiwel word nie eens genoem nie, want Jesus het die hele, totale duiwel gewen
en al sy werke verbreek. Jesus het nie die duiwel gelos vir later, sodat sy kinders
eendag elkeen vir homself die duiwel moet probeer wen nie. Die duiwel het geen plek
in die koninkryk van God nie!
Vir hierdie evangelie sal jy vervolging verduur; nie deur die duiwel nie, maar deur sy
gif, naamlik oorlewerings en godsdiens.
Let op, Jesus sê die evangelie van die koninkryk moet verkondig word “tot ‘n
getuienis vir hulle.” Dit moet dien as getuienis van hoé dit in Jesus se koninkryk is.
(Matt.24:14)
Waar lê die verskil? By die verkondiging.
Tot dusver het met die nuwe bekeerling net gebeur wat aan hom verkondig is, en wat
hy toe geglò en dan ook aangeneem het—om gered te word van die hel en hemel toe
te gaan. Dit is àl wat aan hom verkondig is.
Hy kan nie iets glo wat nie aan hom verkondig word nie!
Wanneer iemand nou die evangelie, of te wel, die goeie nuus, van die koninkryk
verkondig, dan verkondig jy aan die persoon dat wanneer hy Jesus aanneem as sy
Here en Saligmaker, en hy hom laat doop in die Naam van Jesus Christus, dan word
hy deur wedergeboorte ingebore in die koninkryk van God, waar Jesus heers, en
waar Jesus dan sy Here is—dan lewe hy hier op die aarde onder die Heerskappy van
Jesus.
Dan red Jesus hom van die hel, ja, en doop hom terselfdertyd met Heilige Gees soos
beloof is in Hand.2:38, hy verheerlik God in vreemde tale—lees dit vir hom dat hy
sien wat om te verwag dat hy dit kan glò; dan neem hy ook Jesus aan as sy Verlosser
van elke soort sonde en verslawing; lees daarvoor vir hom Efe.1:7 en lê klem daarop
dat hierdie verlossing reeds daar IS vir hom, want àlles is reeds vir hom gegee saam
met Jesus. (Rom.8:32) Hy moet dit net aanneem deur dit te GLO.
Verkondig aan hom dat, soos hy Jesus aanneem as Saligmaker, so neem hy Hom
terselfdertyd aan as Verlosser; ook as Verlosser van armoede en gesukkel, want
daarvoor het Jesus gesterf.
Daarvoor lees jy vir hom 2 Kor.8:9. Doen moeite en lees vir hom hierdie Skrifte.
Jy verkondig aan hom dat hy dan ook terselfdertyd deur Jesus genees word van
enige en elke soort siekte! Verkondig dit aan hom! Lees dit vir hom uit die Bybel;
Hand.28:27, dat hulle sien dat die Bybel sê as hulle bekeer dan genees Jesus jou
terselfdertyd.
Verkondig aan hom dat hy met wedergeboorte ‘n splinternuwe skepsel is; hy is nie ‘n
“oorgemaakte” of verbeterde of gerehabiliteerde sondaar nie; die sondaar sterf daar
met sy bekering saam met Christus aan die kruis, word dan deur die doop begrawe in
die dood, en hy staan dan daar op in ‘n nuwe lewe—die ewige lewe. (2 kor.5:15.
Rom.6:4)
63