Armageddon 2012 - Afrikaans

die aarde, die duiwel daarvoor te vereer en groot te maak, dat hulle vir ure lank die
duiwel en sy grootheid en mag bespreek en totaal vergeet van Jesus!
Nou wààr is Jesus dan?! Wat het Jesus kom doen op die aarde? Die aarde en die
mensdom waarin Jesus as mens gebore is, was totaal onder die mag van die duiwel,
en gedurende sy lewe as mens het Hy deurgaans die werke van die duiwel verbreek.
Die duiwel was nog so astrant dat hy vir Jesus aangevat en probeer versoek het, en so
vermetel dat hy nog vir Jesus gesê het om hom te aanbid! Jy kan jou dit nie indink
nie!
Hierdie arrogansie en heerskappy van die duiwel het teen daardie tyd al vir ongeveer
vierduisend jaar so aangehou dat hy baas was op die aarde wat deur Adam aan hom
oorgegee is.
Maar toe kom Jesus tog na die aarde toe: “vir hierdie doel het die Seun van God
verskyn, om die werke van die duiwel te verbreek.” (1 Joh.3:8) Nou kan dit tog nie
presies soos voorheen maar net aanhou met die duiwel in beheer van alles en almal
nie!
Het Jesus dan nie geslaag in sy doel waarvoor Hy gekom het nie, of het Hy misluk?
As mens luister na hoe die duiwel verheerlik en grootgemaak word, veral deur die
wedergebore mense, dan is die antwoord—uit hùlle oogpunt—op bogenoemde vraag
glashelder: in hùlle estimasie het Jesus totaal en jammerlik misluk!
Die dreigement wat God aan die duiwel gegee het in Gen.3:15, se tyd het aangebreek;
die stryd wat voorspel was tussen die saad van die slang en die saad van die vrou, se
tyd het aangebreek—vir hierdie doel het die Seun van God verskyn, om die werke
van die duiwel te verbreek.
Nou moet ons net kyk of Hy dit reggekry het; of Hy in sy doel geslaag het.
Jesus kon nie die sonde, dit is die duiwellewe, wat in elke mens op die aarde was, vat
en dit doodmaak nie, Hy kon ook nie die duiwel gryp en hòm doodmaak nie, want die
hele mensdom was reeds besmet.
Toe mààk God vir Jesus daardie sonde van die hele wêreld, die duiwellewe, en Jesus
maak dit dood in die hel. “God het Hom wat geen sonde geken het nie, sonde vir ons
gemaak, sodat ons kan word geregtigheid van God in Hom.” (2 Kor.5:21)
Kyk watter punt Jesus die duiwel hier gewys het! Hy het self die duiwellewe geword,
en sò daarvan ontslae geraak!
Wat het daar in die hel gebeur? Jesus het betaal! Jesus het nie die duiwel met bomme
en vuiste baklei nie, Jesus het betaal; toe Hy klaar alle skuld betaal het, was daar niks
sonde meer oor op die mensdom se rekening vir die duiwel om die mense voor aan te
kla nie.
Jesus het nie halwe werk gedoen nie; Hy het alle mense se alle sonde en alle siekte en
ellende alles klaar gedra en betaal—en Hy dink daar nooit weer aan nie!
Hoekom sou Hy ooit weer daaraan dink? Hy het nie opgestaan voordat dit alles klaar
97