Brökwagters Bukske 2024

Heej ésj gezellig, komtj ‘s binne
OEËVERPEINZING
Gaotj d’r allewiel mer us aanstaon. Oeëveral esj
trammelânt. Esj neet in Den Haag, dao rolleboltj
de regiering over mekaar haer, dan esj ’t wul in
Amsterdam, dao wille ze de Walle sloeëte. Kieëkt
us op de A12, dao plekke minse zich vast, of in
diverse steej, dao protestieëre ze vör alles en nog
wat: 3 demonstraties per daag. Jông van 13-14
jaor waere opgepaktj umdet ze ânger ônger de
zooj wille staeke en in Rotterdam es d’r ellike daag
veurwêrk doeër de duuër. ’t Börsj vanne verwerdje
minse en de zörg kan ’t neet mieër aan. De Russe
maake oeërlog en auch in ’t Midde Oeëste es ut
weer us kassa. En heej de minse dao-op reagieëre
en ânger wieër dao-op en de sfieër wuuërtj vervaelendjer
en vervaelendjer. Dao keumtj nog beej
det d’r zowul leenks as rechts feeknôws wuuërtj
vreejgegaeve. En eederein mer reagieëre. Of het
noow oeëver d’n oeërlog gieët of oeëver Halloween
in plaats van Sinte Merte, Ral 9017 Piet of ’t gaas
uut Groningen. Eederein wiltj op z’n eige meneêr
’t gelieëk haale en mer polarisieëre.
Wi-j mot-jae dao noow met umgaon? Zoeë auch de
Brökwagters. In 1991 gîng d’n optocht neet doeër
umdet d’r oeërlog waas in ’t Midde Oeëste. Alle
vereiniginge in Limburg koôze daovör, neet vör
dae oeërlog mer vör geine optocht. Op moment
van schrieëve (november 2023), heb ich d‘r nog
niks oeëver gehuuërtj. Kán auch neet, want de
oeëre zitte nog verstoptj van de Oktoberfeste en de
Halloweenparty’s, ’t dendertj mer doeër.
’t Lieëktj wul of det we gewindj zeen geraaktj aan
alle ellendje di-j d’r plaatsvingtj.
“ ’t Es neet heej, dus laotj mer gaon”. Of “Ich kin
d’r toch niks aan doon, dus ich haoj m’n plezeerke”,
of “ ’t Zâl zoeën vaart neet loupe”. Allemaol
oeëverweginge, di-j naovenant de tiêd duuërtj op
ein of ânger meneer zulle oeëtkoome.
Teurlik motte vae Vastelaovendj veere, teurlik
motte vae heej wieëter met alles. Los daovan es ’t
waal good um effe stil te staon bi-j alles: zoeë vanzelfspraekendj
es ’t namelik neet allemaol!
Neet geschrieëve doeër pestoeër,
(mer gewoeën ‘nne veurbeejganger, dae zich toch
wul wat zörg maaktj)
GEZEEN
“92-jaorige aod-Preens (1972) Wiel II Nijs
és nog altiêd vanne perti-j…!”
Nieuwe Markt 20, Weert - 0495 - 54 59 66
21