Ársfrágreiðingin og roknskapurin fyri 2010 - Listasavn Føroya

Grafisku prentini
Eftir at Steinprent (fyrr Grafiski Verkstaður Føroya) í september enn ikki var komið við teimum
grafisku prentunum, sum Listasavnið átti til góðar sambært avtalu við Steinprent, og at Steinprent
harvið í heili sjey ár ikki hevði hildið treytirnar sambært avtaluni, hóast bæði savnsleiðarin og
stýrisformaðurin fleiri ferðir høvdu biðið um tey, avgjørdi stýrið, at formaðurin skuldi krevja prentini.
Leyk Steinprent ikki hetta krav, mátti tað tískil skiljast sum avtalubrot, og stýrið máttu tí taka allar
prentognir savnsins heimaftur. Hetta fekk endiliga Steinprent at geva seg og ganga avtaluni á møti.
Avtalað var tí, at Steinprent skuldi gera prentini til reiðar, og savnið sendi tvey umboð oman á
Skálatrøð at heinta tey.
Fyri at rætta eina villleiðing skal nevnast, at stutt undan, at umboðini komu frá Listasavninum at
heinta prentini, lýsti Steinprent í miðlunum við tíðindafundi, at Steinprent hevði avgjørt at handa
savninum prentini sum gávu. Savnið gjørdi síðani miðlarnar vart við, at talan altso ikki var um eina
gávu, men um eitt sjey-ára seinkað leigugjald.
Eftir at prentini vóru komin heim á savnið, samtykti stýrið, at tey bestu prentini skuldu veljast
burturúr og skrásetast sum ogn savnsins, meðan restin skuldi seljast.
Burturmist verk
Í búnum eftir William Heinesen vóru tríggjar vatnlitsmyndir eftir Sámal Joensen-Mikines, sum savnið
bað um at fáa aftur frá arvingunum. Savnið hevði síðan 2005 fregnast um myndirnar, og arvingarnir
váttaðu, at myndirnar vóru í Williams húsi. Tó at hetta var lovað okkum, hendi onki víðari í málinum. Í
ár vendi savnið sær einaferð enn til arvingarnar fyri at fáa tær tríggjar myndirnar heim, men tá vóru
boðini frá arvingunum, at myndirnar vóru horvnar! Savnið bað arvingarnar um at greiða frá hesum
tilburði í einum brævi, men onki er enn komið.
Viðlíkahald
Savnið hevur eftir fíggjarligum førimuni roynt at viðlíkahildið bygningarnar bæði innan og uttan.
Konstruktiónin á gamla skálanum, har undirsløgini stinga út úr vegginum, hevur ført við sær, at
ógvisligt rot er komið í tey. Hetta verður umvælt í løtuni. Takið á báðum bygningum er reinsað og
málað.
Stjóraskifti
Nils Ohrt listfrøðingur er settur sum stjóri á Listasavninum frá 1. mai 2011. Nils hevur verið stjóri á
listasavninum “Nivågaardsamlingen”.
11