Raporti vjetor 2011 i KPA-së

Raporti Vjetor 2011
2.2 Njoftimi për Kërkesat
Njoftimi për kërkesat është punë e cila mbikëqyret nga
Njësiti i Informimit dhe kryhet nga personeli i Zyrave
Regjionale. Dispozitat e legjislacionit në fuqi e trajtojnë
dhe rregullojnë pjesëmarrjen e palëve dhe sigurojnë
që procedurat përkatëse të procedimit të kërkesave dhe
vendimmarrja mbi kërkesat të përmbushin standardet e
kërkuara të procesit të rregullt dhe procedurave të paanshme.
Legjislacioni në fuqi paraqet hapat proceduralë të
cilët duhet të ndërmerren për të siguruar që palët të cilat
kanë interes ligjor në pronën e kërkuar të njoftohen për
kërkesën dhe t’u ofrohet mundësia për të marrë pjesë në
procedura. Kjo qasje është kryesorja gjatë procesit, duke
ditur që për kërkesat vendoset bazuar në parashtresat me
shkrim dhe zakonisht palët nuk kanë mundësi të prezantojnë
dëshmi apo argumente gojore para KKPK-së.
Nga Sekretaria Ekzekutive kërkohet që të njoftojë dhe t’i
dërgojë kopjen e kërkesës çdo personi të ndryshëm nga
paraqitësi i kërkesës i cili ushtron apo pretendon të drejtë
në pronën e cila është lëndë e kërkesës, dhe të bëjë përpjekje
të arsyeshme për të njoftuar çdo person i cili mund
të ketë interes ligjor në pronë. Palët e njoftuara kanë të
drejtë të përgjigjen në kërkesë dhe të paraqesin shkresat
apo të prezantojnë dëshmitë në lidhje me kërkesën.
Palët njoftohen përmes vendosjes fizike të formularit të
njohur si ‘njoftimi për kërkesën’ në pronë, i cili jep detajet
e kërkesës dhe natyrën e të drejtës së kërkuar pronësore.
Bashkë me njoftimin për kërkesën gjendet edhe
njoftimi për pjesëmarrjen përmes të cilit njoftohen palët
për të drejtën e tyre për të marrë pjesë në procedurë
duke plotësuar këtë formular dhe duke e paraqitur atë në
AKP brenda tridhjetë (30) ditësh apo përndryshe duke
u paraqitur personalisht në zyrën e AKP-së për t’i dhënë
këto informata.
2.3 Publikimi i Kërkesave
Publikimi i kërkesave është gjithashtu punë që e kryen
Njësiti i Informimit. Procedura e publikimit përfshinë
publikimin zyrtar të regjistrit me të gjitha kërkesat
e paraqitura në AKP, në buletinin e njohur si Gazeta e
AKP-së, e cila përmban adresën e pronës për të cilën
është paraqitur kërkesa së bashku me numrin e kërkesës.
Gazeta shpërndahet si shtojcë e një gazete në gjuhën shqipe
në 10,000 kopje. Gazeta siguron që detajet e të gjitha
pronave të kërkuara të arrijnë tek palët e interesuara dhe
palët e mundshme përgjegjëse brenda dhe jashtë Kosovës.
5,000 kopje tjera në gjuhën shqipe dhe serbe në mënyrë
të rregullt shpërndahen në të gjitha komunat, gjykatat,
enklavat, organizatat për PZh-të dhe OJQ-të në tërë
Kosovën. AKP-ja nuk mund të nxjerrë Gazetën e saj në
Serbi dhe prandaj për të siguruar që informacioni shkon
tek ata persona që duhet të jenë të informuar për ekzistimin
e kërkesave, rreth 3.500 kopje të Gazetës së Zyrave
Pronësore të UNHCR-së e cila përmban të njëjtat informacione
si Gazeta e AKP-së shpërndahen përmes Zyrave
Pronësore të UNHCR-së në Serbi. Gazeta gjithashtu
publikohet edhe në ueb faqen e AKP-së.
Gjatë periudhës së raportimit nuk është publikuar asnjë
kërkesë sepse AKP-ja ka vendosur të shtyjë publikimin e
fundit të kërkesave derisa të ndahen të gjitha kërkesat që
duhet ndarë.
Kur personi i cili ka interes ligjor në kërkesë nuk e ka
marrë njoftimin për kërkesën, rregullat e procedurës
parashohin që ai apo ajo mund të pranohet si palë në çdo
fazë të procedurës, nëse kërkesa nuk është vendosur nga
KKPK-ja.
14