LED NA LJETNOJ DAROVAO 56 LITARA KRVI - Opatija.net

Piše Dražen Turina
Kako pasuju leta tako neke
stvari, judi i situacije postanu
užanca. Da će Šajeta
vavek se storit ili nekamo prit
zadnji minut ili jušto i malo pokle
tega, već je postalo normalno. Ili
da Dule neće nikada znat za svoje
delo storit pravi račun, ili da će
puno čuda dogovorit na svoju
škodu i to je već užanca. I tako je
va našoj Opatije takoveh primjeri
koliko god ćeš. No jedan od njih
mi je posebno smešan i drag, a
to j’ onisti da će Jeletić obučen
va Mikulu reć više besed keh ne
rabi od oneh ke bi bile normalne.
Jedanputa su se neki šegavi judi,
a bilo je to pred čuda, zmisleli da
bi bilo dobro da se va našoj mjesnoj
zajednice, ka je pokle postala
mjesni odbor, organizira za našu
decu Sveti Mikula. To je jako lepa
užanca, i više nego šegav način
da se špenda ono malo soldi keh
saku mjesnu zajednicu pripada
po nekakoven godišnjen plane.
Kako naši susedi delaju feštu šoto
Ambasadora, a neki drugi mjesni
odbori neke druge stvari - mi smo
se odlučili za Mikulu.
Med onemi šegavemi judi z gornje
rečenice je bil i Emil Jeletić,
glavni za maškarat se va sakoj prigode.
Tako je on va mojen, i va živote
jako puno Opatijci bil glavni
Djed Mraz (dok su još bile mjesne
zajednice), pa pokle i Djed Božićnjak
(kad su postali mjesni odbori),
pa glavni čovek od maškar
(skupa z Valetun i kompanijun) i
na kraje Mikula. Domišjan se ja i
još jenega Mikule ki je s Krampusun
hodil po našen brege (iman
i sliku š njimi), a to je bila legendarna
Mila (mat od mojga suseda
Tihota) ka je sa Isusova leta držala
kabine s kjučun na staroj Slatine
(a Krampus je bil Jane), no to j’
sada neka druga štorija. Za puno,
puno njih ki su mlaji od mene, Mikula
(a i Djed Mraz) celo življenje
je ipak Emilio.
I sad tu moran špjegat jenu pikolecu
– tisti Jeletić nikada ni znal
neš jako puno povedet po hrvacki
i to je nami vavek bilo jako simpatično.
Pred jedno par let doma mi
je neš delal jedan tišjar z Njemačke
ki se j’ doselil na Leprinac, pa
mi se potužil da ne more nikako
dobit državljanstvo aš da ne govori
dobro naš zajik (a kako žive
na trdo-domećen Leprince još
meša i njemački, čakavski i književni
(onaj z libri) hrvatski). Ja
sam mu se nasmel do suz i rekal
da govori jušto kot i naš Mikula,
s ten da je Emilijotu osnova taljanski
a ovemu tišjaru njemački.
Pred jedno par meseci čitali smo
po novinah i škercali se z onemi
pitanji ka moraju znat si furešti ki
bi oteli postat Hrvati, a ka su teška
za ponemet, pa tako da ne znan je
uopće danas moj tišjar dobil domovnicu
i ši ima još zelena slova
na registracije od auta, al’ Jeletić
je va to vreme počel držat se duji
i duji govori kot Mikula, za sen ča
mu se javni nastup ni jako popravil.
Ja curan od smeha kad po regali
od Mikule z decun pridu oni ča su
se oženili va Vasansku i kad prvi
put to vide. Stojin po bande i gjedan
reakcije – mirakuli, sakramenski
mirakuli. Još pred jeno desetak
i više let ta manifestacija je bila
na otprten, spreda gornje (njemačke)
crekvi pa se tu i kantalo i
tancalo i bilo je dosta veselo, a zadnjeh
let se je to va rukah “dinastije
Jeletić” (i oni to lepo delaju,
posebno nevesta Jeletić ka jedina
zna govorit na mikrofon, jedino ča
je vavek se isto pa judi već naprvo
znaju ča će bit, osim od česa će
mašit Emilio) i to nutra va crekve,
a Jeletić se ćapal oltara i maši više
od seh popi keh znan.
Ovo leto za sreću ni čital sponzori
pa j’ maša bila malo kraća, al’
rečimo lane (iako va crekve nisu
važgali latriku) Emilio je povedal
kako jenoj crekve va Lovrane rabi
nova rasvjeta da judi vide poć
na mašu pa je i od publike iskal
da plješću za to. Oci i matere ne
moru dočekat da se pročita ime
od njihovega otroka i greju ća (aš
te prodike duraju i duraju), namesto
da malo čuju ča Mikula maši,
aš to je kot onaj engleski Monti
Pajton. Volin to, aš to niki nima
takovo na svete. Zna tako Jeletić
(pogotovo ako su lokalni izbori
blizu) prej nego ča se obuče va
Mikulu prit najprvo va civile na
oltar pa hitit par informaciji tehničko-propagandno-filozofske
prirode za umret od smeha.
Ma judi moji dragi, naš Mikula
Vasanski je najboji – morda malo
više za veli al’ i deca se zabave.
Doduše, ovo leto je bil i malo
morbidan aš je počel neš govorit
od neke nedavno preminule curice
al’ se brzo «zdrical» i partil va
svoj standardni šou. Ovo leto je
taj performans prvi put gjedal i
naš župnik. Prišal je do mene i me
pital: “Zašto tu nema malo više
veselja i pjesme za djecu”. Ja mu
govorin: “Tako Van je to pul nas
po užance! – Naš je Sveti Nikola
malo alternativan ili umjetnički
gledano – čista avangarda.”
Ne znan za Vas, al’ ja ne otejen
da se to promeni.
39