Views
3 months ago

AITORMA APRIL-2018 PDF

KOTHOMA BWSA tongbaikhu,

KOTHOMA BWSA tongbaikhu, swngwi naidi a birmanni kokno haikhe tinibo bohrokni mokolo mwktwi nuganw. Tabuk khe twi bangliyani bagwi aro phirang swnamnani tugwi thangmabai a jagano borokrok thangwi picnic eba beraiwi naiwi manatwi tei aboni loge rangbo ajiwi mana bagwi rang khok brwichi rwjak swbaiwise aro Tourist Place eba beraikhri khwlainani bagwi khorok bwswkno sorkar nangmaniswk manthai rwkha hwnwi khwnakha? Riya hwnjakya dorop rwkha aswkno, abono karwi tei mungsa rwjakya. Abo haikhe bisi brum brum chini borokrokni ha sekjagwi, nukhung kwmawi tongo. Tamokhe amswk wngwi tongmani yagulobo chini dopharok thang wngyani bai abono kasunani bagwi mungsabo khwlai manlailiya. chengwi rwjak kha. Abo simiya Sadar (tabuk Jirania) Sub-Divisionni Ramchandra Nagar obo phirang swnamnani bagwi NEEPCO Companyno ha bagwi rwjakha. Aronibo chini dophani kwbangma nukhung ha yakarwi ma thangbaikha. Abono karwibo Military Head Quarter, Central eba state ni tangnok tangnani, bolongni malmata toninani eba Khatimung khwlainani bagwi Wild Life Sanctuary swnamnani bagwibo chini borokrokni tongthai hanono tabuk phano segwi tongmani nukjago. Abo haikheno Baramura Eco-Park, Trishna, Gumati, Rua Wild Life Sanctuaryrok swnamjakkha tei aboni bagwi nukhung kwbangma bohrokni ha yakarwi mathangbaikha. Phiyaba aboni bagwi Aswk bai simi thakyakhu, tabuk phano je tongwi tongkhu abonono bahaikhe seknai aboni bagwibo lama swnamwi paikha. Tamoni hwnba sal kisa swnkang haste sarkar Assembly o Tripura Land Revenue and Land Reform Act 1960ni philchi swlaimung bill (10th Amendment bill) tubukha. Abillo agi tongmarokno swlaiwi nukhung thwgwi bwswk jaga eba ha toniwi mannai aborokno twiwi kwtalkhe kerong swnamphinani bagwi swrai swrai khe kerongnogo (Assembly) bill tubukha. Abo belaino kirmasingsa bill. A bill tumungno gosiwi najakhe ( pass) Tripurao chini dopharok bo halogo sogwino abo chwngno snamnai sa simise sai mansinai. Tabuk o Tripura Land Revenue and Land Reform Act aitorma 18 1960 tamo abonose kisa rwgwi manailaigranai. Chini Tripura haste Bharot haktorbai merge khwlaimani yagulo 1960 bisio puila Tripura Land Revenue and Land Reform Act eba kerong swnamjago. 1960 bisio kerong swnammani yagulo tabuksak joratwi philchuku ( 9 times) a kerongno Amendment khwlaijakkha. Phaidi haikhe paithakni eba philchuku amendment o bahaikhe kerong khajakkha abono twiwi kisa silaigranai. Aro nukjakkha kaisa nukhung eba khoroksa brorok 37.5 kani ha bini mungwi toniwi mannai hwnwi kerongo swrai swrai khe sajak tongo. Abono karwibo borok khoroknwini simi khorokba tongnai nukhungrokkhe 75 kani ha tonowi mannai tei khorokbani swlai bangkhe khorok thwgwi 3.75 kani ha teibo kwbang toniwi mannai. Phiyaba tabuk kwtal kerong swnamnani bagwi Assemblyo je bill tubukha aro belaikheno slaimung tubujakkha.

KOTHOMA BWSA A bill pass wngkhe chini dophani bagwi belaikhe hamya wngnai. Tamoni hwnba aro sajak kha agini kerongo tongmani hai kaisa nukhung eba khoroksa borok tei 37.5 kani ha bini mungwi toniwi manglak, khoroknwi ni nukhung hwnkhe 12.5 kani simise baithangni mungwi toniwi mansinai tei khorokba hwnkheba 25 kani. Khorokbani kwbang hwnkhe khorok thwgwi tei 3.75 kani khe toniwi mannai. Nukhungo jeswk phano borok bangthwng 45 kanini kwbang ha kebo toniwi manglak. Abo simiya agini kerongo kanisa nal eba lunga khetoni morokmung (swk) kaniktham hathaibai baksa tongmani, abonobo tabuk kwtal kerong slaiwi nal, lunga, hathai bebaknono baksa khwlainani kok sajakkha. Tumungno kwtal kerongni bill pass wngkhe nal, lunga, hathai baksa wngwi thangsinai. Abo bwswkse chayani kok haiya da? Chwng jotono saimano swngsarni joto borokrokni langmao chathai, ri-chum tei tongthai a kaithamnono puilani nangmani doro manwi hwnwi. Tamokhe tabukni o kwtal molo abono karwibo lekha kwrwng wngnani tei jorabai gothogwi tongwi mannani bagwibo kwbangma swrwngmungrok swrwngnani nango. Phiyaba a chathai, richum, tongthai, lekha swrwngna akorokni bagwi nango rang puisa. A rang chwng keboba sorkarni sebuk khwlaiwi, keboba buphangwaphang, rubber kaiwi, baksaba hukba haba tei bania khwlaiwi, podrepot malmata choroi khlaiwi, tei abono karwibo kwbangma lamatwi ajilaimani nukjago. Chwng jotono saimanbaio chini Bharot haktor wngkha hukba haba khwlainairokni ha hwnwi sinijago tei a haba hukba khwlaiwi ajimani bisingtwno nukhungni nangmarokno (Chathai, ri-chum, bwsa bwtwirokno lekha porirwna, tongthai swnamna, sak naijakna arorok) supungo. Tripura hasteni borokrokbo sorkarni sebuk sep bangthayani bagwi haba hukba khwlaiwino nukhung hamkhwraini samung khwlailaio. Tripura haste o tumungno abohaikhe kerong swnamjakkha hwnkhe chini dopharok belai khe birmano kwlai bainai. Tamoni hwnba sorkarni sebuk manya phano ha tongmani bagwi, keboba buphang-waphang, rubber kaiwi, baksaba hukba-haba tei podrepot malmata choroi khwlaiwino rang puisa ajilaiwi tonglai. Aboni bere rubberno wngkha tabukni o jorao ajinani bagwi kahamkuk lama wngwi tongo tei nubo nukjago sorkarni sebuk manya phano rubber bwtwi phalwino chini borokrok twrwk twrwk gwnang wngwi tonglaiokha. Keboni 15 kani, keboniba 50, 60, 70, 100 kani tei baksaba teibo kwbang gwnano tongo. Tabukni kwtal kerongni bill pass wngkheno kerong rwgwi aitorma 19 nini je manthai kwlaimani abo simise nwng mansinai tei bebakno sorkar segwi naharsinai. Abo chini ADC amchoio tongnairokni bagwi bwswkse kirimasingsani kok. Tamoni hwnba Tripura hasteo jeswk rubberlwng tongo aboni bere ra o chukuchi chukuno chini borokrokni. Tamoni hwnba ADCni phataro rubber kainani bagwi aswk ha kwrwi haino bwle? Tei o ha segwi twlangwi sabono le rwnai abo le kerongo sajak da tong? Kwrwi? Sorkar namani yagulo manthai rwnani (khoti puron) kok sajakthani nukjakkha tabukni o jorao tumung kanisa hani morokmung khokba rasai (5 lakhs) hwnkhe nwng mannai khok chisai ni simi khok chiba sai swk. Haikhe uanswgwi naisidi tomo khwlainai? O kerong kasunani kasuya chini yagono, tumung chwng o kerongno chajakkhe bill pass wngsinai, phiyaba chajakyakhe chwng khaduma phunuklaiwi abono kasuwi mannai. Tamokhe o kerongni bill pass wngkhe chini dopharok komornano karwi tei mungsa lama kwrwi, bebak sokomorwi khijakbainai. Haikhe paithago ang kha khlaio chwng jotono o kerongni bill pass wngya sanino kasunani bagwi saktharlaiyanw hwnwi. Swithani chaya tongmarokni bagwi nakarjadi. Aswkno hambai. –Khirode Debbarma

April 2018
Belluqian Magazine April 2018
Autism Voice April 2018
Yuva Sahyadri Epaper April 11, 2018 to April 17, 2018
Yuva Sahyadri Epaper April 18, 2018 to April 24, 2018
allgäu weit März/April 2018