Vorgestellt - Sauerländer Heimatbund e.V.

23
Dai Sunndagsbraoen
En Mömmeken har in der Misse sungen -
har sungen säo schoin ä ne Nachtigall.
Dat har düör de ganze Kiärke klungen:
„Oh, Maria, hilf uns all hier in diesem Jammertal!“
Ä niu de Häomisse was iut,
un dat Mömmeken goiht iut der Kiärke riut…,
dao suiht dai Köster vam Middelgang -
dao ligget de Tiähne näo op der Bank!
Dao siet dai Köster: Dat ies jao en Dingen!
Bat könn Ui aohne Tiähne schoin singen?“
„Nai, Köster, dai Tiähne dat sind jao nit muine -
dat sind män bläoß uesem Opa suine!
Köster, dat ies doch wuoll te verstaohn -
iek hewwe jao imme Uowen ne Braoen!
Un dai Opa, bao iek in der Kiärke siätten,
sall dai mui diän Sunndagsbraoen opfriätten?“
aus dem Buch: Frauluie – Mannsluie
Met Iähme selwes kuiern
Et was all late in der Tuit -
met diäm aollen Fernand waset säowuit.
Se harren iähme de Uisen aftrocken
un biuten lurren de Äosterklocken…!
Dao sag suine Kläör: „Segg maol, Ferdinand,“
un stroik me sachte üöwer de Hand,
„iek segge diäm Härn Pastäoer Beschoid,
dat et met Dui niu te Enne goiht!“
„Ach, Kläör, lo diän Pastäoer män dao!
Iek hewwe dat Wiärks all lange klaor.
Iek hewwe muinen Gaoren bestallt -
mui hiät de Pastäoer genauch vertallt!
Dai höft mi diän Hiemmel nit mähr te luowen -
iek sin jao all op me Wiäge nao buowen!
Iek well met me Hiärguott niu selwes kuiern -
un wann´t guet goiht, metten Engelkes Äostern fuiern!”
aus dem Buch: Pastörkes – Kösters – Schaulmagisters