Ein unsterblicher Fisch!

S´iss halt ääfach foi -
Lautrer zu soi!
De Lui
Von K.H. Lang
Friejer wa´mär Kumbel gewess,
hann jede Daach zamme g´sess.
Sinn minanner e´rum gezoh
Un schbeere zamme de Mäd noh.
Wie´re zwanzisch Johr als wa´
Iss de Lui gang noh Kanada.
Am A´fang hämmär uns g´schribb,
irschendwann isses unnerblibb.
Mär hat nix mä vunonner gehhert,
jeder hat soi Lääwe gefeert.
Bis uff äämo e´Brief kumm wa´
Noh fünfedreißisch Johr, aus Kanada!
Zwä´Monat druff issér kumm,
hanne am Bahnhof in Empfang genumm.
Meer hänn uns glei werre gekännt,
sinn uns um´de Hals g´fall, hann geflennt.
Wie meer dann minanner vezehlt,
saa´re:"Mich hats Häämweh gegweelt!"
Ich hanns kaum glaawe gekännt,
er hat die "Pälzer Sproch" nät velernt.
Hat geredd wie in friejere Daa
Un glei druff zu mär g´saa:
"Wää´sche, ich hann nix vergess,
weer oft gern werre in Lautre gewess!
Wie ich allä im fremde Land geschdann
Hat´de Brotkorb ganz schä hoch gehang.
Heit geht märs gut, hann Fraaa un Kinner,
awwer Lautrer bleiwisch immer!
Moje will ich durch moi Lautre laafe,
mär e´ "Härtingswärschdsche" kaafe!
Will an alle Plätz vun Friejer hie,
will däss Alles werre mo sieh!
Meer wa´n jede Daach uff Achs,
vun´de Vochelweh bis an Quack.
Hänn ab un zu Bekannde getroff
Un sinn an de Bremerhof geloff.
Wie´mär uff´m Humberschturm g´schdann
Un iwwer Lautre gegugt hann,
har´re mit glasische Aué gesaa:
"Dodevun hannisch geträämt in Kanada."
Meer hann e´schä´Bierche getrunk
Un wa´n in Erinnerunge vesunk.
"Wää´sche noch was do friejer los wa´
Mit Ami, Nutte un demm ganze Trara?"