Kerwezeitung 2007 - Kerweborsch vun de Tornhall

Ausklang
So Ihr Leit un Kerwefans,
Genuch geschwätzt vun de Ortsprominenz.
Es werd Zeit fer mich wirrer runner zu geh,
Neext Joahr werd en oannern hier owwe steh!
Ihr hobbt rischtisch geheert, fer mich werd`s Zeit,
Moin Nochfolger steht schun bereit!
Lasst eich iwwerrasche, wer des Oamt iwwernimmt,
Un next Joahr es Zepter bei de Kerweborsch schwingt!
Doch noch bin ich de Chef vun de Kerb-Feierei,
Un dääas Joahr bin ich aach Sunndoachs debei!
Nur oa kloa Sach muss ich heit noch erklärn,
Un do lohnt sich`s werklich mol zuzuhern!
Seit 2007, so stehts uff moim Blatt,
Is die Gemoa e rischtische Stadt.
Un wie sichs fer e Stadt geheert,
Leeft erst mol alles grindlich verkehrt.
Unsern Roathausplatz soll schenner wern,
Un eigentlich hert ma so was jo gern!
Doch ich hobb mich gefroacht un ich froch mich noch heit,
warum groad in de Crumschter Kerwezeit?
Warum konn mer net oafach so uwichtiche Sache,
3 Woche frieher oder später mache?
Wos ich aach net kapier un wos mich schockiert:
Net emol die Gewerbetreibende wern do informiert!
En weitere Hoammer, der hott mich ereilt
Die Genehmischung fer de Umzuch, die woar schun erteilt!
Do sieht ma mol wirrer, wie`s is un wie`s bleibt:
Do waas oa Hoand net, wos die oanner groad treibt!
Doch jetzt isses zu spät, mir nemme`s in Kauf
So kriegt de Umzuch dääs Joahr en neje Verlauf.
Un jeder der mitmacht, der sollt net vergesse,
Dass mer uns moje in de Hauptstroß treffe!
Jetzt hobb ich awwer werklich genuch verzeehlt
Un moi Hauptdarsteller gequeelt.
Ich trink jetzt genisslich de letzte Schluck Woi
Un mach donn in de Saal enoi!
Doch vorher speelt die Musik, un es Örtche is froh:
„Die Crumschter Kerb iss wirrer do!“