Kerwezeitung 2007 - Kerweborsch vun de Tornhall

Wasser, Matsch un aa noch Meschd
Setzte sich om Buggy feschd.
Un die Kerl honn ausgeseje
Als henn se bei de Sei geleje.
De Christian fand des gar net cool
Denn er roch total noch Puuhl.
Es weiße Hemd war grau un schwarz,
Un Schlombes hatt er in de Fratz.
So sinn die zwaa zurickgekumme
De Pabst hott sie sich vorgenumme.
Un dene klipp un klar gesoacht:
„Des Ding werd sofort sauwer gemoacht!
Denn so voll Schmodder un voll Dreck
Sinn moi dausend Euro weg!“
Also honn die donn den Kahn
Zus Schlörits in de Hof gefahrn
Un de Papsti rifft gonz barsch:
„Schlauch geholt un Wasser marsch!“
Aach die Olde honn mitgeschrubbt
Un als Glicksfall hott sichs entpuppt
Selbst die Crössmanns Emma ließ sichs net nemme
Sich mitte ins Gewiehl zu stemme.
Un ihr Erfahrung im Wienern un Butze
Machte sich die Kerl zu Nutze!
In onnertalb bis knapp zwaa Stunne
War de Dreck vum Auto hunne.
Geglenzt hotts wie e Schwoineschwart
Die dausend Euro woarn gespart.
Weil ma so net uff die Kerb geh koann
Musst de Gregor erstmol in die Woann.
Em Christian soi Uffgab war net so e leichte
Der musst erst alles de Ilse beichte.
Die redd ihm donn aach schwer ins Gewisse
Un hott soi Kerwehemd groad fortgeschmisse.
Des war ihr zu veel Dreck un Gestoank.
Doch de Christian hatt noch oans, Gott sei Donk.
Der is glei droff in die Dusch gekroche
Un oowens hott er donn kaum noch geroche.
Hott mit em Papsti en Schoppe gepetzt
Un bis heit wurd do driwwer net meh geschwetzt.