AeTsch BaeTsch - Aescher Fasnachtszyttig 2021

31
Sunntigs-Butz
E Samschtig Ooben im Auguscht,
D Atmosfääre voller Luscht,
Dr Himmel blau, coronaklaar,
im Gaarten e fröölichi Chinderschaar.
Idealer goots nümm für e Fescht,
iich stand am Grill für myyni Gäscht,
s sinn alli zwääg und nooni mied,
uff äimool wird my Sicht ganz drüeb.
Ich lueg uff Pfäffige, gsee daas chuum,
denn in d Chlus, won ii noo mee stuun:
D Rääbe syy wägg, au s grüene Land,
döört hinden isch nur noon e wyssi Wand.
Zmitts im Summer – Nääbel, Schnee?
(Daas het au dr Bucheli nooni gsee).
D Gäscht dien hueschte, s foot aa stingge,
miir züüglen yyne mitsamt em Dringge.
Am andere Daag, am Sunndigmoorge,
graad won ii d Gipfeli will go bsoorge,
dängg ii, was isch denn daas für e Gschyss:
Die ganzi Chuchi isch chryydewyss.
Im Gang, dr Stuube und dr Stääge,
überall isch das Bulver glääge.
Denn lüütet d Noochbere, sii isch ganz daub,
frogt: «Hän diir au soon e huuffe Staub?
Ich wott s jetzt wüsse und gang in d Chlus,
Ii muess gaar nit wyt ewägg vom Huus.
Daas wysse Fäld han ii sofort gsee:
Chalchdünger isch s, nit öbbe Schnee.
Also gaar käi Luune vo dr Natuur,
numme s Wärgg vom ene dumme Buur.
S bringt em jo au gaar käi Sääge:
Dünge duesch churz vor em Rääge!
En Aescher Buur? Näi käi settige:
S isch e Gugger – die hets z Ettige.
Wäärend är döört hinde sich chaa erhoole,
fülle miir mit Chalchstaub d Alveole.
Tschuld syg dr Dünger, verzellt dä Maa,
dä häig jo gaar käi Chlääber ghaa.
Doch d Froog blyybt offe, syt dääre Nacht:
«Worum het dä Gugger wytter gmacht?»
Landwirtschaft isch schyynts vo Nutze,
aber nit, wenn am Sunndig s Huus muesch butze.
Schnupf