AeTsch BaeTsch - Aescher Fasnachtszyttig 2021

33
vor dr Fasnacht
En alte Waggis luegt ganz grimmig
är chunnt äifach nid in Stimmig.
Drbyy ischs allerhööchschti Zyt:
In knapp fünf Mooned weers so wyt.
S Sujet stoot, s liggt uff dr Hand:
«Miir lääben im Coronaland».
En Alte froggt my was das sell
das Sujet syg jo nit speziell.
Wenn me scho well Fasnacht mache,
mies s öbbis syy zum zümftig lache!
S chunnt e Brief vum Committee,
dä drifft my Häärz und macht mer wee.
S chönn d Fasnacht zwanzigäinezwanzig
nit wie gwoont syy, s macht my ranzig.
Löön mir öis, – das chas nit gää!
das Joor äifach d Fasnacht nää?
Isch scho am Sunndig uff dr Strooss
wie suscht am Meendig, gar nüt loos?
S macht, am Fasnachtsmeendig uff dr Gass,
au in «normaale» Joor käi Gspass!
D Chinderfasnacht chasch vergässe:
S git nit emool e Wegge z ässe.
S feele Zwärge, Glöön und Haase
s macht käin de Grosse langi Naase!
Löön mir öis, das chas nit gää,
äifach öisi Fasnacht nää?
Styyge d Waggis nit in d Hoose?
Gitts vo de Wääge käini Roose?
Konfetti findisch, so ischs läider
nur in alte Winterchleider.
Höred uff, das chas nit gää,
mir löön öis d Fasnacht nit loo nää!
Mit chli Witz und Fantasie
cha au daas Joor Fasnacht syy.
D Bänggler, wo wäi Väärssli singe
chömme häim in d Stuube z springe.
Im Garten uss, statt uff em Määrt,
schränze d Gugge s Huuskonzäärt.
Zum go poschte goo, häi Frau und Maa
– statt Muulblätz – glatti Larven aa.
D Larve luege böös und grimmig.
Grad wies basst zue deere Stimmig.
Statt öis im Näscht in go verstegge
göön mir dr Virus go verschregge.
S cha mit Witz und Fantasie
au daas Joor wiider Fasnacht syy.
.wö