Jólablaðið 2021
Njótum aðventunar í Hafnarfirði. Jólablaðið 2021
Njótum aðventunar í Hafnarfirði. Jólablaðið 2021
You also want an ePaper? Increase the reach of your titles
YUMPU automatically turns print PDFs into web optimized ePapers that Google loves.
Jólablað
Hafnarfjarðar
Aðventan 2021
Velkomin í
jólabæinn
Hafnarfjörð
Jólablað Hafnarfjarðar 2021
Útgefandi: Hafnarfjarðarbær
Ritstjórn: Árdís Ármannsdóttir og Olga Björt Þórðardóttir
Ábyrgðarmaður: Sigurjón Ólafsson
Ljósmyndir: Óli Már - olimar.is
Hönnun og umbrot: Ólafur Már Svavarsson
Prentun: Ísafoldarprentsmiðja
Njótum
aðventunnar
í Hafnarfirði
í hlýlega og heillandi jólabænum
Jólaljósin mild og fögur eru farin að lýsa upp tilveruna
í Hafnarfirði og við öll að komast í sannkallað
hátíðarskap. Jólabærinn stendur undir nafni og skín
skærar en nokkru sinni. Hafnarfjörður hefur á undanförnum
árum „slegið í gegn“ sem jólabær, þar sem fallega skreytt
jólaþorpið og jólahúsin, skemmtilegar sérverslanir og
fjölbreyttir veitingastaðir, menningarhúsin og nú síðast
Hellisgerði í jólabúningi, laða að gesti alls staðar frá.
Hlýleiki og vinalegt andrúmsloft hefur mikið aðdráttarafl og
á þessum tíma árs er gott að leita í notalega og afslappaða
stemningu eins og við höfum náð að skapa hér í Hafnarfirði.
lystigarðsins okkar. Auk alls þess sem bærinn hefur nú þegar
upp á að bjóða á aðventunni hefur verið ákveðið að setja
upp „Hjartasvellið“ og láta þar með gamlan draum margra
um skautasvell í heilsubænum Hafnarfirði verða að veruleika.
Má því segja að jólaþorpið í allri sinni dýrð hafi breitt úr sér
um miðbæinn allan og nú einnig í Hellisgerði.
Við hlökkum til að taka á móti ykkur öllum – og hlökkum til
að njóta afþreyingar, lista, menningar, verslunar og veitinga
saman í jólabænum Hafnarfirði sem skartar sínu fegursta um
þessar mundir.
Jólaskreytingarnar sem komið var upp í Hellisgerði á
síðastliðinni aðventu sýndu það og sönnuðu að fólk kunni
að meta lágstemmda, heillandi upplifun í faðmi töfrandi
umhverfis. Fólk streymdi að til að upplifa ævintýralega fegurð
og samspil mildra ljósa og náttúrunnar. Nýlega var komið
upp fallegum gróðurhúsum í Hellisgerði þar sem setjast
má inn og njóta ljúffengra veitinga og einstakrar fegurðar
Með jólakveðju,
Rósa Guðbjartsdóttir
3
Blátt timburhús
varð að bleikum
skódraumi
Við Vesturgötu 8 stendur fallegt timburhús sem sómir sér
vel við torg byggðasafnsins. Í vor opnuðu hjónin Andrea
Magnúsdóttir hönnuður og Óli Ólason arkitekt þar
skóverslun eftir að húsið var tekið í gegn og dyttað að því í anda
starfseminnar og gert að „bleikum skódraumi“.
Með tilkomu verslunarinnar stækkar verslunar- og þjónustusvæði
miðbæjarins og geta bæjarbúar og gestir spókað sig um og yfir á
Norðurbakkann, þar sem hjónin reka fataverslun. Óli á heiðurinn
af hönnun og útliti verslananna. Þau hafa verið par í 28 ár og eiga
saman börnin Magnús Andra og Ísabellu Maríu. Andrea er alin upp á
sjómannsheimili, en faðir hennar og bróðir voru oft fjarri og eðlilegt
að halda jólin þegar þeir komu í land. Sjálf er hún mikið jólabarn og
heldur sín jól á hefðbundinn hátt. Ísabella er yfirskreytir og vill helst
vera snemma í því en einfaldleikinn er allsráðandi; jólatré inni með
hvítri stjörnu, kveikt á mörgum kertum og í arninum, annað tré með
ljósum í garðinum og stundum er gerður krans. Á aðfangadag standa
hjónin bæði svo vaktina að fallegri hefð í versluninni frá 11 - 13. Kvöldinu
er síðan varið með fjölskyldu Andreu og á jóladag hjá fjölskyldu Óla.
Þrátt fyrir mikið annríki segist Andrea elska allt við þennan tíma og ef
hún myndi einhvern tímann hætta rekstri þá veldi hún verslunarstarf
á aðventunni. Það sé hluti af hennar jólaanda að aðstoða fólk við
að finna jólagjafir eða jóladress. Einnig sé afar gefandi að geta sagt
„gleðileg jól“ við ótrúlega margt fólk.
Andrea Magnúsdóttir og Óli Ólason
Hlátursprengja
fyrir glaðsinna
grindarbotna
Bíddu bara
Gaflaraleikhúsið, sem staðsett er í Víkingaþorpinu
við Víkingastræti, er hópur atvinnufólks sem
hefur rekið lítið leikhús þar undanfarin tíu ár.
Áhorfendapallarnir rýma 220 manns og hefur leikhúsið
fest sig í sessi sem mikilvægur hluti af menningu
Hafnarfjarðar, en þar hafa mörg vinsæl verk orðið til.
Um þessar mundir hefur sýningin BÍDDU BARA! heldur
betur vakið lukku, því uppselt er á hana út árið, en
sýningar halda áfram eftir áramót. Stórstjörnurnar
Salka Sól Eyfeld, Selma Björnsdóttir og Björk
Jakobsdóttir hafa þar leitt saman hryssur sínar í
fyrsta sinn. Vegna barnburðarleyfis Sölku Sólar mun
leikkonan Þuríður Blær Jóhannsdóttir leysa hana af um
sinn.
Þetta einlæga, beitta og drepfyndna verk fjallar um
raunveruleika íslenskra kvenna; vonir og drauma, biturleika,
uppeldi, kvíða og hvítvín. Þær stöllur byggja verkið á sinni
eigin reynslu og draga ekkert undan en segjast ljúga helling.
Þetta er verk um íslenskar konur, samið af íslenskum konum og fyrir
íslenskar konur, hinsegin, kynsegin og allar hinar og fyrrverandi,
núverandi og tilvonandi maka sem „þora“ að koma.
5
Bókaviti
smíðaður af
sönnum vinum
Heilsubærinn Hafnarfjörður viðraði
þá hugmynd við Karla í skúrum í
upphafi sumars, að þeir sæju um
að smíða bókavita sem nýtast myndi sem
skiptibókamarkaður allt árið um kring. Karlarnir
nýttu sumarið til að hanna, smíða og mála vitann
sem var opnaður formlega á upphafsdegi bókaog
bíóhátíðar barnanna í bænum í októberbyrjun.
Bókavitinn er staðsettur við Hellisgerði og er
öllum opinn.
Samfélagsverkefni gegn félagslegri
einangrun
Karlar í skúrum er samfélagslegt verkefni sem
Rauði krossinn hratt af stað í upphafi árs 2018
og er m.a. til húsa að Helluhrauni 8 hér í bæ.
Þar skiptast félagsmenn á þekkingu og láta gott
af sér leiða til samfélagsins í leiðinni. Markmið
Karla í skúrum er að skapa aðstæður þar sem
heilsa og vellíðan karlmanna 18 ára og eldri er
í fyrirrúmi.
Jón Bjarni, Körlum í skúrum,
og einn af smiðum vitans.
Metnaðarfullur
handverksbakari
Gulli Arnar bakarameistari hefur rekið samnefnt
handverksbakarí við Flatahraun 31 í tæp tvö ár.
Gulli er afar kraftmikill og metnaðarfullur ungur
maður sem kom með ferskan blæ inn í flóru bakaría í
Hafnarfirði, þar á meðal margar nýjungar sem ekki höfðu
verið fáanlegar áður í bænum. Hjá handverksbakaríinu er
passað vel upp á að fyrirbyggja matarsóun og er stefna og
markmið með rekstrinum að selja allar vörur upp daglega
og framleiða nýjar og ferskar næsta dag.
Á námsferli sínum sigraði Gulli í árlegri keppni bakaranema
tvisvar sinnum og varð jafnframt fyrstur til að sigra keppnina
tvö ár í röð. Við útskrift var hann verðlaunaður af skólanum
fyrir framúrskarandi árangur í verklegu námi og á sveinsprófi.
Gulli lærði kökugerð við hið sögufræga Konditori La
Glace í Kaupmannahöfn. Gulli fékk sl. vor viðurkenningu
Markaðsstofu Hafnarfjarðar fyrir starfsemi í þágu eflingar
atvinnulífs og bæjaranda í Hafnarfirði.
Hér að ofan sést Gulli útbúa sínar margfrægu og ótrúlega
vinsælu sörur sem margir telja algjörlega óaðskiljanlegan
part af aðventunni. Ljósmyndari getur vottað að sörurnar
ruku út og kláruðust á meðan myndatakan fór fram. Hann
hyggst selja kræsingar sínar allar helgar á aðventunni í einu
jólahúsanna í Jólaþorpinu.
7
Einstök
samheldni og
gestrisni íbúa
Aðal verslunargata bæjarins á árum áður
Austurgata var á árum áður aðal verslunargata
Hafnarfjarðar. Gatan er dæmigerð fyrir
Hafnarfjörð þar sem byggðin, hraunið og fólkið
mynda þétta heild. Við götuna standa 15 hús sem eru eldri
en gatan sjálf og lögð hefur verið áhersla á að viðhalda
götumynd frá upphafi 20. aldar. Samheldni íbúa við
Austurgötu er mikil og í dag er notuð nútímaleiðin, íbúasíða
á Facebook, til að halda hópinn og þegar eitthvað stendur
til.
Fyrirtæki og stofnun eru við götuna, s.s. Matarbúðin Nándin
með umhverfisvænar áherslur, Hljóma með tónlistarkennslu
og músíkmeðferðir og elsta kirkja Hafnarfjarðar, Fríkirkjan,
stendur á kletti yfir götunni. Þar er einnig gamla símstöðin sem
í dag er heimili og svo sögulega þekktasta jólahús bæjarins.
Með tilkomu matarbúðarinnar við enda götunnar við lækinn
segja íbúar að smám saman sé að endurvakna menningin
og stemningin sem var áður fyrr. Margir leggi leið sína frá
læknum og á svæðið að Hljómu á laugardögum.
Samheldni og hugmyndaríki íbúa við Austurgötu hefur m.a.
leitt af sér Austurgötuhátíðina, sem er orðin órjúfanlegur hluti
hátíðarhaldanna á 17. júní, með götumarkaðsstemningu og
sölu á list- og föndurmunum, veitingum og ómandi tónlist.
Einhverjir opna garðana sína þennan dag eða bjóða
gestum að setjast fyrir framan húsin sín. Aðrir fara enn
lengra í gestristninni á hinni árlegu HEIMA-hátíð, því þá er
Austurgatan í stóru hlutverki og fjölmargir íbúar bjóða gestum
og gangandi heim í stofu til að upplifa söng og tóna frá þekktu
tónlistarfólki við óvanalega heimilislegar aðstæður.
Jólahjarta
Hafnarfjarðar
Jón Ragnar Jónsson, Björgvin Halldórsson, Guðrún Árný Karlsdóttir, Friðrik Dór Jónsson, Svala Björgvinsdóttir og Margrét Eir Hjartardóttir
Bæjarbíó og Mathiesen stofan
skipa mikilvægan sess í
hjörtum bæjarbúa og vina
Hafnarfjarðar sem þangað sækja
viðburði og upplyftingu á aðventunni.
Ýmsir dagskrárliðir verða sem
fastagestir geta stólað á, ár eftir
ár, en einnig verður bryddað upp á
nýjungum eins og rekstraraðilunum
einum er lagið.
Í ár verður töfrað fram Jólahjarta
Hafnarfjarðar í allri sinni dýrð sem
verður með svipuðu sniði og aðrar
tónlistarhátíðir tengdar Bæjarbíói
- í risatjaldi í bakgarðinum. Þar
verða trúbadorar, skífuþeytar og
„singalong“ sem kæta mannskapinn.
Frítt verður inn á svæðið.
Hafnfirðingar hafa í áranna rás getað
státað sig af afar hæfu og vinsælu
tónlistarfólki. Meðal fjölmargra þeirra
sem munu stíga á stokk í Bæjarbíói og
í Jólahjartanu eru feðginin Björgvin
Halldórsson og Svala Björgvinsdóttir
ásamt Margréti Eir Hjartardóttur í
Litlu jólum Björgvins, bræðurnir Jón
Jónsson og Friðrik Dór Jónsson verða
með fjölda tónleika og Guðrún Árný
Karlsdóttir stýrir singalong. Allar nánari
upplýsingar má finna á tix.is.
9
Hús
tækifæranna
opin öllum
Í
skrúðgarði Hafnfirðinga, Hellisgerði, risu nýlega tvö hlýleg
og vinaleg gróðurhús beggja vegna Oddrúnarbæjar sem
í dag hýsir Litlu Álfabúðina. Um er að ræða skemmtilega
viðbót við lífið, umhverfið og reksturinn sem fyrir er í
Hellisgerði til að auka sýnileika og mannlíf í garðinum. Það
getur verið ósköp notalegt þegar kalt er úti að hafa þennan
möguleika og njóta einstakrar jólaljósadýrðar í Hellisgerði í
leiðinni.
Gróðurhúsin eru hugsuð fyrir hverskyns samkomur og viðburði
og eru þau aðgengileg öllum áhugasömum. Húsin munu spila
stórt hlutverk í Hellisgerði á aðventunni og skapa skilyrði fyrir
aukna afþreyingarmöguleika. Þau eru opin á opnunartíma
Litlu Álfabúðarinnar en utan opnunartíma er hægt að fá afnot
af húsunum og leigja þau fyrir hvers kyns viðburði, fundi og
uppákomur.
Húsin eru í eigu Hafnarfjarðarbæjar og hægt er að skrá sig og
nálgast lykla að þeim í þjónustuveri bæjarins að Strandgötu 6
á opnunartíma og nýta húsin endurgjaldslaust á þeim tíma. Frá
kl.16 alla virka daga og um helgar fara bókanir fram í gegnum
Litlu Álfabúðina í Hellisgerði og þá gegn vægu gjaldi. Eina
skilyrðið fyrir láni og útleigu er góð og vönduð umgengni um
þessa nýju sameign Hafnfirðinga.
Töfrum prýtt
kaffihús
Í
Litlu Álfabúðinni hefur verið rekið kaffihús frá
árinu 2020. Hægt er að kaupa ilmandi kaffi
og kakó og margar tegundir af framandi og
spennandi tei, s.s. vinsæla blómateið. Með þessu
öllu fást einnig kökur og bakkelsi eins og pretzel,
ostaslaufur og vöfflur. Opið er í Litlu Álfabúðinni
allar helgar í vetur og síðustu vikurnar fyrir jól.
Margir kannast við gamla, fallega húsið við róluvöllinn í
Hellisgerði, en það heitir Oddrúnarbær og var byggt árið 1924.
Þar var Litla Álfabúðin opnuð 2016 og hefur reksturinn verið í
höndum Tinnu Bessadóttur.
Með tilkomu garðskálanna geta fleiri komið sér
vel fyrir með veitingarnar og notið náttúrulega
umhverfis Hellisgerðis og ljósadýrðarinnar
þar á aðventunni. Stóra sviðið við hlið Litlu
Álfabúðarinnar hefur mikilvægu hlutverki að
gegna m.a. á aðventunni fyrir vinsæla viðburði
sem fjölskyldufólk flykkist á til að hlýða á hátíðlega
tónlist og söng og sjá einstaka jólasveini eða
öðrum kynjaverum bregða fyrir.
11
Guðbjörg Björnsdóttir og Ingibjörg Valgeirsdóttir á vinnustofu Sögu á Flatahrauni.
Ró í jóla-óróa
í Saga Storyhouse
Í
annríki dagsins og sérstaklega á aðventunni
er öllum mikilvægt að kunna leiðir út úr
þeim óróa sem álag og streita geta valdið.
Í landi Hafnarfjarðar er fjöldi útivistarsvæða
þar sem náttúran býður til veislu allan ársins
hring. Guðbjörg og Ingibjörg hjá fyrirtækinu
Saga – Story House hafa farið í yfir 360 leiddar
kyrrðargöngur með hópa í fjölbreyttri náttúrunni
í kringum Hafnarfjörð. Á sama tíma og íslensk
náttúra er hlaðborð af fallegum náttúruöflum
hefur hún ótvíræð græðandi áhrif.
Djúpslökun, óróinn sést í forgrunni.
Nafnið á fyrirtækinu Saga – Story House er tilvísun í
bæði fólk og sögur sem hafa verið eigendum Sögu
innblástur í gegnum tíðina. Með stofnun Sögu hafa
þær sameinað þekkingu sína og reynslu og bjóða
upp á heilsueflandi fræðslu fyrir fólk og fyrirtæki. Í
hlýlegu umhverfi á vinnustofu Sögu á Flatahrauni er
notalegt að finna ró í óróa úr rekavið af Ströndum,
leggjast á dýnuna í djúpslökun og hlúa að hvíld og
endurheimt. Eða fræðast um mikilvægi þess að
næra delluna sína, þekkja flæðið í starfsorkunni og
svara spurningunni: Hvar finnst mér gott að hanga?
Jólin í
Byggðasafni
Hafnarfjarðar
Björn Pétursson, bæjarminjavörður ásamt ónefndum jólasveini.
Pakkhús Byggðasafns Hafnarfjarðar er opið frá kl.
11-17 alla laugardaga og sunnudaga á aðventunni.
Samhliða verður hægt að heimsækja bæði Sivertsenshúsið,
elsta hús Hafnarfjarðar, og verslunarminjasýninguna
í Beggubúð sem mun fá á sig jólalegan blæ yfir hátíðarnar.
Þessi þrjú hús standa við sk. Byggðasafnstorg. Skammt frá, á
Strandstígnum, má til vorsins 2022 upplifa rúmlega fimmtíu
ljósmynda sýningu á tuttugu skiltum um sögu Bæjarútgerðar
Hafnarfjarðar en um þessar mundir eru liðin 90 ár frá stofnun
hennar. Frítt er á allar sýningar Byggðasafnsins sem henta
fjölskyldunni allri.
Þessir jólasveinar!
Í Pakkhúsinu eru þrjár sýningar í gangi. Fastasýningin ber heitið
Þannig var… og er saga Hafnarfjarðar og nágrennis rakin
frá landnámi til okkar daga. Á efstu hæð er leikfangasýning
safnsins, sérstaklega ætluð börnum, en Byggðasafnið
varðveitir stórt safn leikfanga og er hluti þess á sýningunni.
Núverandi þemasýning í forsalnum fjallar um Kaupmanninn
á horninu. Á aðventunni hreiðrar sjálfur jólasveinninn um
sig í Sívertsens-húsinu og tekur fagnandi á móti glöðum og
spenntum börnum sem taka þátt í leikskóladagskrá safnsins.
13
Ein elsta verslun bæjarins
Frumkvöðlaframtakið
Burkni
Við Linnetsstíg 3 stendur ein elsta verslun
bæjarins, blómabúðin Burkni, en hún
var stofnuð 1962 af hjónunum Sigrúnu
Þorleifsdóttur og Gísla Jóni Egilssyni. Verslunin á því
60 ára afmæli á næsta ári en frumkvöðullinn Sigrún,
sem ávallt var kölluð Dúna, lést sl. sumar. Búðin hefur
verið í blómlegum rekstri í hjarta Hafnarfjarðar í
höndum dóttur Sigrúnar, Gyðu Gísladóttur, síðan
1996.
Saga Burkna hefur verið rakin til þess að Dúna hafði
lengi búið til blóm úr kreppappír og þegar eiginmaður
hennar þurfti að hætta á sjónum vegna heilsubrests
ákváðu þau að opna blómabúðina. Það má því segja að
þessi pappírsblóm hafi orðið kveikjan að blómabúðinni
sem til að byrja með var til húsa að Strandgötu 35.
Þau hjónin voru með þeim fyrstu hér í bæ til að lýsa
upp göturnar og búðargluggana með jólaljósum. Fólk
kom úr Reykjavík til að skoða gluggaskreytingarnar og
til að kaupa varning sem var sjaldséður á þeim tíma.
Þau voru óhrædd við að taka áhættu og fluttu inn heilu
farmana af gjafavöru sem fylltu búðina en oftar en ekki
tæmdust hillur búðarinnar í lok sama dags.
Andi Dúnu og hlýja svífa yfir vötnum í Burkna enn í dag
og þar er lögð áhersla á fjölbreyttar tegundir fallegra
blóma, skreytinga, mikið úrval af gjafavöru við öll
möguleg tilefni og kransagerð. Þegar vel viðrar hefur
verið settur upp blómamarkaður á Mathiesen torgi í
bakgarði verslunarinnar. Framtakið hefur vakið mikla
lukku og sett skemmtilegan svip á þessum fjölfarna
stað.
Kransinn hennar Gyðu:
Smátt klipptum sípris- (tuja) eða grenigreinum er vafið þétt og fast með vír
utan um hálm-undirlag. Svo er könglum eða öðru fallegu skrauti bætt á með
vír. Svona krans hentar bæði sem inni- og útiskraut, á vegg eða dyr og þornar
síðar úti en inni.
Jólin og
sorgin
Ína Ólöf Sigurðardóttir, framkvæmdastjóri Sorgarmiðstöðvar.
Aðventa, jól og áramót eru syrgjendum oft erfiður
tími. Í jólaundirbúningnum hvarflar hugur
syrgjanda til látins ástvinar sem ekki fær að njóta
hátíðarinnar og getur undirbúningur reynst mjög erfiður,
ómandi jólalög og fólk að óska hvert öðru gleðilegra
jóla. Hér eru hlý ráð frá Sorgarmiðstöð í Lífsgæðasetri
St. Jó.
Engin ein leið er rétt til að fara í gegnum þessa hátíð og
gott er að láta jólaundirbúninginn og skipulagið ráðast
eftir líðan á hverri stundu; hugsa um ein jól í einu. Hægt er
að leggja áherslu á það sem er mest gefandi og geyma
það sem vex í augum. Hikið ekki við að biðja um aðstoð
við hvað sem er og þiggja matarboð hjá ættingjum eða
vinum. Kertaljós og notaleg tónlist getur aukið á vellíðan.
Verið góð við ykkur sjálf og munið að það er eðlilegt
að vera sorgmædd á þessum tíma. Gráturinn líknar og
hreinsar og það er óhætt að sýna hvert öðru tilfinningar,
ræða þær og rifja upp fallegar minningar.
Við sem þekkjum einhvern í sorg getum sýnt frumkvæði og
boðist til að hjálpa með eitthvað ákveðið. Sýnum ákvörðun
syrgjanda um jólahald skilning. Bjóðum á tónleika eða
samveru og sýnum stuðning þó plön breytist. Hvetjum
syrgjanda til að hugsa fyrst um sig og verum til staðar.
99 ára nútímalegt bókasafn
Samkomustaður
kynslóðanna
Bókasafn Hafnarfjarðar verður 100 ára á næsta ári.
Þar má finna allt frá elstu barnadeild landsins og
stærstu tónlistardeild bókasafna, upp í verulega
nútímalega þjónustu, s.s. rafbókasafn, fundarými, netkaffi og
hlaðvarpsstúdíó. Hlýja, ró, fræðsla og gróska einkenna þennan
helsta samkomustað margra kynslóða Hafnfirðinga og boðið
verður upp á fjölbreytta dagskrá á aðventunni.
Jólabókaviðburðirnir Kynstrin öll verða að sjálfsögðu á
sínum stað. Höfundar koma, lesa og sitja pallborð með
bókmenntafræðingnum Arndísi Þórarinsdóttur undir tónlist og
veitingum. Dagskráin hefst kl. 20 bæði kvöldin og húsið opnar kl.
19:30. Athugið að takmarkað húsrými er á viðburðinn en frekari
upplýsingar má nálgast á vef bókasafnsins.
Fullveldisdaginn 1. desember mæta Hallgrímur Helgason, Jónína
Leósdóttir og Ingólfur Eiríksson. Daginn eftir verða síðan Eiríkur
Norðdahl, Kamilla Einars, og Sigrún Pálsdóttir.
Fjórða desember kemur pólski jólasveinninn Święty Mikołaj í
heimsókn á leið sinni frá Norðurpólnum til Póllands og verður
smiðja með hefðbundnu pólsku jólaskrauti og allir eru hjartanlega
velkomnir. Sönghópurinn Á léttu nótunum kemur 7. desember og
13. desember tökum við því rólega á foreldramorgni með kakó
og piparkökumálun fyrir kríli, - og hver veit nema að það verði
jólaball þegar nær dregur hátíðinni helgu!
Ekta
súkkulaði
ómissandi á
aðventunni
Að mati Málfríðar Gylfadóttur Blöndal, eiganda
bóka-kaffihússins Norðurbakkinn við samnefnda
götu, er ómissandi hluti af aðventunni að gæða
sér á ekta heitu súkkulaði. Hún mælir helst með 60%
dökku súkkulaði en einnig sé tilvalið að blanda með
rjómasúkkulaði eftir smekk. Í Frakklandi sé til dæmis
hefð fyrir því að hafa heitt súkkulaði frekar þykkt og
með ríku súkkulaðibragði. Mikilvægt sé að vanda valið á
súkkulaðinu sem notað er. Málfríður deilir hér með okkur
girnilegri uppskrift.
• 200 g dökkt súkkulaði
• 1 l nýmjólk
• salt á hnífsoddi
• 1 msk súkkulaðisýróp
• 1 tsk vanilludropar
Saxið súkkulaðið í bita og setjið í pott ásamt mjólkinni. Hitið mjólkina að
suðu og hrærið reglulega í þar til súkkulaðið er bráðið og hefur samlagast
mjólkinni. Bætið sýrópinu út í ásamt salti og vanilludropum. Hrærið
áfram þar til allt hefur blandast og er orðið fallega súkkulaðibrúnt.
Berið fram í fallegum bollum og bjóðið upp á þeyttan rjóma með. Einnig
tilvalið að saxa smávegis súkkulaði yfir rjómann. Fyrir fullorðna eru
koníak eða Baileys góð viðbót en fyrir börn er sniðugt að nota sykurpúða.
Fjórar einfaldar leiðir til að
efla tengslin
Þjálfun
núvitundar
bætir svo
margt
Í
hraða samfélagsins er mikilvægt að staldra við
og gefa sér andrými til að þjálfa hugann og stuðla
að auknu jafnvægi. Bryndís Jóna Jónsdóttir hjá
Núvitundarsetrinu hefur leitt núvitundarþjálfun með
starfsfólki í nokkrum leik- og grunnskólum Hafnarfjarðar
sem hefur skilað sér beint inn í skólastarfið með góðum
árangri. Hún deilir hér æfingum sem auðvelt er fyrir alla
fjölskylduna að tileinka sér á aðventunni.
Anda og telja: Takið frá 1 til 3 mínútur, teljið
upp í 5 þegar þið andið að ykkur og endurtakið
það nokkrum sinnum. Ekki þarf að breyta
önduninni, bara að taka eftir henni. Hægt er
fylgjast með tíma í síma eða með klukku.
Borða með núvitund: Sniðugt er að
velja t.d. mandarínu, rúsínu eða nammimola.
Prófa að virkja öll skynfærin, vera forvitin um
upplifun, skoða liti og form, finna áferðina, lykt og
athuga mögulegt hljóð. Takið eftir því sem gerist
í líkamanum áður en bitinn fer í munninn og þið
finnið bragðið. Tókuð þið eftir einhverju nýju?
Veðrið innra með ykkur: Staldrið við og
færið athyglina að önduninni. Takið svo eftir því
hvernig ykkur líður núna; hvernig er veðrið innra
með ykkur? Er kyrrlátt og sól, þoka, vindasamt
eða eitthvað annað? Leyfið ykkur að líða eins og
ykkur líður og vera eins og þið eruð. Gott er svo að
hvíla athyglina í andardrættinum aftur.
Tíu fingra þakklæti: Leiðið hugann að
a.m.k. 10 atriðum sem þið eruð þakklát fyrir.
Veitið því athygli hvernig ykkur líður um leið,
hvaða tilfinningar þið finnið og þær birtast í
líkamanum. Það getur líka verið gaman að búa til
þakklætiskrukku sem fjölskyldan setur miða í sem
hefur verið teiknað eða skrifað á sem hver og einn
er þakklátur fyrir og skoðað saman á kósýkvöldi.
Rúnar Pálsson 76 ára gengur eða
hjólar næstum hvern dag á Helgafell
Hefð að
ganga á
Helgafell á
fyrsta degi
nýs árs
Tugir þúsunda ganga á eða
umhverfis Helgafell árlega
og er fjallið verulega vinsælt
hjá göngu-, hlaupa- og einnig
fjallahjólafólki. Rúnar Pálsson fer nær
daglega á Helgafell og hefur í næstum
aldarfjórðung séð um gestabókina á
toppnum þar. Það er orðin hefð hjá þeim
hjónum, börnum þeirra og barnabörnum
að ganga saman á Helgafell á nýársdag
með nýja gestabók og konfektkassa.
Helgafell er fjölskyldufjallið og eru börnin ekki ýkja gömul þegar fyrsta ferðin
er farin. Mörg hver enn ekki farin að ganga og njóta göngunnar í poka á baki
foreldranna. Saman fer hópurinn í a.m.k. eina ferð á fellið á ári, á sjálfan
nýársdag. Áætlað er að Rúnar eigi um 200 bækur í bílskúrnum hjá sér með nöfnum
toppfara og alls kyns skemmtilegum kveðjum frá gestum og gangandi víðs vegar
að úr heiminum. Hugmyndin að gestabók á svæðinu og framkvæmdin í heild var
upphaflega algjörlega að frumkvæði Rúnars og árið 2019 hlaut hann nafnbótina
Hafnfirðingur til fyrirmyndar fyrir þetta einstaka einstaklingsframtak sem nær til
alls samfélagsins og fleiri fá að njóta góðs af. Vinsældir og aðdráttarafl Helgafells
eru þó svo mikil að allt árið um kring nýtir fólk þennan 338 metra móbergsstapa
sem „líkamsræktarstöð“ og klæðir sig bara eftir veðri og færð.
Hjartasvellið
spennandi nýjung
Hafnarfjarðarbær mun bjóða upp á nýjung á aðventunni
í ár þegar sett verður upp hátíðlegt skautasvell í hjarta
bæjarins. Skautasvellið hefur fengið nafnið Hjartasvellið.
Eftir opnun verður það opið flesta daga í desember.
Hjartasvellið í hjarta Hafnarfjarðar verður frábær afþreying, upplifun
og hreyfing fyrir Hafnfirðinga og gesti jólabæjarins á öllum aldri.
Svellið er gert úr gerviísplötum sem líta út eins og ís en eru það þó ekki.
Þar af leiðandi eru hvorki vatn né orka notuð til þess að frysta svellið.
Hægt verður að panta tíma fyrirfram á tix.is og skautar verða til láns
á staðnum, en einnig má koma með sína eigin. Óreyndir skautarar
geta stigið sín fyrsta skref og allt upp í þaulvant skautafólk sem getur
sýnt listir sínar. Svo er aldrei að vita nema einhverjir í rómantískum
hugleiðingum velji Hjartasvellið til að fara á skeljarnar eða finni ástina
sína þar.
Andri Ómarsson, verkefnastjóri menningar- og markaðsmála
hjá Hafnarfjarðarbær, kemur að uppsetningu á Hjartasvellinu
og hvetur Hafnfirðinga og vini Hafnarfjarðar að reima á sig
skauta og koma að renna sér.
21
Jólaþorpið í
Hafnarfirði
Jólabærinn Hafnarfjörður býður jólin velkomin með sínum
árlega jólamarkaði fullum af gleði, gómsætum bitum og
skemmtilegum jólavarningi. Jólaþorpið er opið allar
helgar á aðventunni frá kl. 13-18 og til kl. 22 á Þorláksmessu
og þar iðar allt af lífi og fjöri fyrir jólin. Fagurlega skreyttu
jólahúsin eru fyrir löngu orðin landsþekkt fyrir ýmiskonar
spennandi gjafavöru, sælkerakrásir, handverk og hönnun. Þar
er tilvalið að leita að hinni fullkomnu jólagjöf á meðan notið er
gómsætra veitinga sem ylja að innan.
Óvæntar uppákomur og öðruvísi jóladagskrá verður undirtónn
hátíðarhaldanna þetta árið, með áherslu á ljósadýrð og
skreytingar sem henta vel árferðinu og tryggja að allir geti notið
hennar af öryggi og án hópamyndana. Jólasveinarnir koma í
heimsókn á laugardögum og Grýla verður á vappi um bæinn á
sunnudögum.
Myndir: Andri Þór Unnarsson @drwstr
Komdu heim í jólabæinn
Hafnarfjörð á aðventunni!
23
Þitt eigið
hangikjötssalat
Hilmari Þór Harðarsyni, yfir matreiðslumanni
á Krydd veitingahúsi,
finnst skemmtilegt að gera
öðruvísi hangikjötssalat fyrir jólin og
segir vel útbúið og fallega framreitt slíkt
salat tilvalinn forrétt. Hilmar Þór deilir
hér uppskrift með okkur.
• 300 g soðið hangikjöt
• 100 g majónes
• 50 g soðnar gulrætur skornar í teninga
• 50 g grænar baunir
• 1 teskeið gult sinnep
• 1 teskeið hvítlauksmauk (ferskt)
• salt og pipar eftir smekk
• dass af sítrónu
• örlítið af púðursykri og sojasósu
Öllu blandað vel saman í skál. Hilmar segir
hátíðlegt að nota krukkur eða litlar skálar til að
bera fram forréttinn fyrir hvern og einn. Hann
stingur svo upp á pappadums (steikt indverskt
brauð) eða laufabrauði ofan í krukkurnar, ásamt
baunaspíru eða öðrum jurtum til að skreyta
forréttinn fallega. Gestirnir nota svo brauðið
til að veiða salatið upp úr krukkunni og ná sér
þannig í ljúffengan, mátulegan munnbita.
Vinnurými
með besta
útsýni
bæjarins
Jón Tryggvason, Signý
Eiríksdóttir, Geirþrúður
Guttormsdóttir og Hafsteinn
Hafsteinsson, forsvarsmenn
Betri Stofunnar.
Tölvuteiknaðar myndir af Betri stofunni
Betri Stofan opnar í jólamánuðinum á sjöundu og
efstu hæð í norðurturni Fjarðar. Um er að ræða stað
með óhefðbundinni, notalegri aðstöðu fyrir fólk sem
vill geta unnið, nýtt fundarherbergi og átt þess kost eftir
vinnudag að njóta samveru að kvöldi á sama stað með
vinum og/eða vinnufélögum.
Með breyttum áherslum á covid-tímum felast mörg tækifæri
í því að fólk vilji hafa sveigjanlegri vinnustaði og geta jafnvel
sleppt því að starfa í venjubundinni skrifstofuaðstöðu.
Markmið með rekstri Betri Stofunnar er að skapa gott og
þægilegt andrúmsloft þar sem viðskiptavinir geta komið
snemma á morgnana og fengið sér kaffi og unnið í fallegu
umhverfi með ótrúlegu útsýni yfir höfnina og út á haf. Fallegi
bærinn okkar Hafnarfjörður sést þarna í algjörlega nýju ljósi.
Boðið verður upp á nokkur fundarherbergi fyrir 8 til 12 manns.
Á kvöldin verður síðan „lounge“-stemning með uppákomum,
fyrirlestrum, happy hour og fleiru. Gestir geta einnig pantað
mat frá nálægum frábærum veitingastöðum, t.a.m. KRYDD í
næsta húsi. Til að byrja með, fram til áramóta, verður Betri
Stofan opin öllum. Á þeim tíma verður tekið við umsóknum
um aðild sem verður síðan skilyrði eftir áramót.
25
Jólabærinn
Hafnarfjörður
Jólabærinn Hafnarfjörður er hlýlegur bær sem hefur allt til
alls þegar kemur að upplifun, ævintýrum, söfnum, verslun og
þjónustu. Lifandi miðbær, heillandi hafnarsvæði, kósí kaffihús,
hið eina sanna jólaþorp, ljósadýrð í Hellisgerði, fjölbreytt verslun
og þjónusta, skapandi samfélag hönnuða og listafólks, álfar og
huldufólk.
Höfum það huggulegt saman á aðventunni, í hjarta Hafnarfjarðar!
Komdu heim í jólabæinn
Hafnarfjörð á aðventunni!
27
Aurora Basecamp
Jóla-Norðurljós í
hrauni með kakó
og sykurpúða
Aurora Basecamp er staðsett í Snókalöndum rétt við
Bláfjallaafleggjarann, skammt frá Völlunum. Þar gefst
gestum kostur á að upplifa í rauntíma, innandyra
eftirlíkingu af Norðurljósum í þægilegu umhverfi. Á aðventunni
fer fyrirtækið í jólabúning og býður gestum sínum upp á
Norðurljósafræðslu með leiðsögumanni ásamt bolla af heitu
kakói og sykurpúðum. Allt saman innifalið í aðgangseyri.
Opið:
5. og 12. desember frá kl. 16 til 19.
1000 kr. yfir fullorðna, 500 kr. fyrir 6-18 ára og
frítt fyrir 5 ára og yngri.
Á útisvæðinu á aðventunni munu loga litlir eldar og er gestum
velkomið að grilla sykurpúða við eldstæðin svo lengi sem birgðir
endast. Inni í stóra tjaldinu sem kallast Aurora Lounge er hægt að
ylja sér við arineld og hlusta á jólatónlist.
Til að finna Norðurljós er ekki best að aka bara um í myrkri.
Leiðsögn hjá Aurora Basecamp er hönnuð til að þekkja fyrstu
stig Norðurljósanna og önnur stig þeirra. Síðan er hægt að
njóta ljósanna á bekkjum úti við opinn eld og dást að víðerninu
í hrauninu í faðmi fjölskyldu eða vina. Umhverfið innan í kúlunum
og í náttúrunni fyrir utan er sérstaklega hannað til slökunar.
Varð meira
jólabarn í
föðurhlutverkinu
Bæjarlistamaðurinn Friðrik Dór
Bæjarlistamaður Hafnarfjarðar, Friðrik Dór Jónsson, hefur frá
unga aldri heillað þjóðina með tónum, skrifum, leik, húmor
og ljúfmennsku. Hann er einnig upptekinn fjölskyldufaðir í
Setberginu þar sem hann býr ásamt eiginkonu sinni Lísu Hafliðadóttur
og dætrum þeirra, Ásthildi og Úlfhildi. Þriðja dóttirin er væntanleg
í janúar og okkar maður reiðubúinn með sexkantasettið til að setja
saman ný húsgögn.
Friðrik Dór er mjög þakklátur fyrir að vera bæjarlistamaður og þykir
vænt um bæinn sinn. Það besta við hann sé nándin, bæði hvað varðar
samskipti við fólk og tengslanet og líka nálægðin á milli hverfa. Í
Hafnarfirði sé allt til alls og frábært að ala upp börn.
Friðrik Dór segist alltaf verða meira og meira jólabarn eftir því sem
börnin hans verða eldri og aukin spenna hjá þeim fyrir jólunum. Það
sé ekki annað hægt en að hrífast með. Svo sé eiginkonan Lísa ekkert
eðlilega mikið jólabarn og það hjálpi líka til. Á aðfangadag er litla
fjölskyldan saman og fær svo oftast til sín gesti úr nánustu fjölskyldu.
Líklega verður önd í jólamatinn þriðju jólin í röð eftir að hafa prófað eitt
og annað frá því að þau héldu fyrstu jólin sjálf árið 2016. Forrétturinn er
síðan breytilegur á milli ára en heimagerður ís í eftirrétt. Punkturinn yfir
i-ið er þegar hjónin sjóða negulnagla-te upp úr miðnætti. Það er reyndar
bara grín. Á jóladag og annan í jólum hittist vanalega stórfjölskyldan
sem sé ávallt skemmtilegt. Það besta við aðventuna er að mati Friðriks
Dórs jólaljósin sem lýsa upp bæinn og gera þennan árstíma einstaklega
notalegan.
Friðrik ásamt Úlfhildi (t.v.) og Ásthildi (t.h.) dætrum sínum.
29
Heimili hafnfirskrar
hönnunar
Við Strandgötu 19, gengt Thorsplani, eru Litla Hönnunar Búðin
og LitlaGallerý hlið við hlið í sama húsnæði, en í tveimur
rýmum. Daglegur rekstur er í höndum hjónanna Sigríðar
Margrétar Jónsdóttur og Elvars Gunnarssonar. Sameiginleg
sérkenni verslunarinnar og gallerísins eru persónuleg þjónusta og
fjölbreytt listform hönnuða.
Frá opnun búðarinnar hefur áhersla verið lögð á að bjóða upp á
þekkta íslenska hönnun, allt frá tækifæriskortum upp í tækifærisgjafir.
Þar hefur mikill fjöldi hönnuða fengið tækifæri til að koma sköpun sinni
á framfæri og í sölu. Töluvert úrval er af hafnfirskri hönnun, en núna
verður henni í fyrsta sinn fundinn sérstakur áberandi staður í versluninni,
með von um að enn fleiri hafnfirskir hönnuðir sýni áhuga á að bætast í
hópinn. Úrval af náttúrulegum og umhverfisvænum varningi er einnig
til sölu og þar hafa pappírspokar verið notaðir frá upphafi.
Í LitlaGallerýi er ný sýning um hverja helgi, fullbókað fram að jólum
og þegar byrjað að taka við umsóknum fyrir vorið. Einstaklega
fjölbreyttar sýningar hafa verið þar frá opnun fyrir tveimur árum og
mikil ásókn.
Sigríður Margrét, eigandi Litlu Hönnunar Búðarinnar.
Menningarleg
slökun í
Hafnarborg
Söngur, tónar og sýningar
Í
Hafnarborg, menningar- og listamiðstöð Hafnarfjarðar,
er vel tekið á móti gestum á aðventunni með sýningum
og tónleikum með listafólki í fremstu röð. Sérstaklega
er mælt með að heimsækja safnið og eiga þar rólega
stund, ýmist út af fyrir sig eða í faðmi fjölskyldunnar, enda
er tilvalið að slaka á og finna þar frið í miðri ösinni í hjarta
jólabæjarins. Þá er safnið vel staðsett við Strandgötu 34, í
næsta nágrenni við Jólaþorpið.
Sýningar safnsins að þessu sinni eru Lengi skal manninn
reyna, yfirlitssýning á verkum Þorvaldar Þorsteinssonar,
og Söngfuglar, einkasýning á nýjum verkum eftir Katrínu
Elvarsdóttur. Í tengslum við hátíðina er athygli vakin á
sérstökum sýningum á jóladagatalinu Hvar er Völundur?
sem var einmitt skrifað af hinum fjölhæfa listamanni Þorvaldi.
Jóladagatalið verður sýnt í safninu á aðventunni milli kl. 16
og 17, einn þáttur á dag fram að jólum. Hádegistónleikar
með jólablæ verða 7. desember kl. 12 og Síðdegistónar
17. desember kl. 18, þar sem gestir fá að njóta jóladjass.
Aðgangur að tónleikunum, sýningum og viðburðum þeim
tengdum, er ókeypis og allir hjartanlega velkomnir. Opið alla
daga, nema þriðjudaga, kl. 12–17.
31
Komdu heim
í jólabæinn
Hafnarfjörð á
aðventunni!