Denis Castagnou : Sensa títol - OC Revista

auton2006.qxd 06/11/2006 14:33 Page 53
novèlas
* A l'ora de clavar, venèm d'aprene la disparicion de l'abat
Loïs Comba, Cantalausa. Sepelit a Montfranc ont passèt son
enfança, daissa una òbra en lenga d'òc mai que mai importanta.
Demièg sos trabalhs pus recents, i a lo prumièr
Diccionari general de la lenga occitana, tot en occitan. Cantalausa
es tanben l'autor d'un Diccionari illustrat fòrça espandit e d'una
recèrca monumentala Aux racines de notre langue (Les langues
populaires des Gaules de 480 à 1080), plan discutida. Mas
Cantalausa èra tanplan conegut per son òbra de reviraire :
traduccion dels quatre Evangèlis e d'autres tèxtes biblics, e
mai d'un fum d'òbras en anglés, de Rudyard Kipling, George
Orwell, e tant d'autres…
* Dins lor colleccion Saber las Presses Universitaires de
Bordeaux publican L'exil des origines, Renaissance littéraire et
renaissance linguistique en pays de langue d'oc aux XIX e et XX e siècles,
de Felip Gardy. De Fabre d'Olivet a Max Roqueta e Manciet
en passant per Mèste Verdié, Jansemin, Mistral, Perbòsc e
d'Arbaud, Felip Gardy situa, acompanha e esclaira l'adralhada
dels grands escriveires que farguèron la literatura d'òc
modèrne sul quite estralh de la manca e de la desirança.
Quèsta de l'origina e exilh, la butada creadoira " renaissentista
" es atal plantejada dins çò que la fonda : Gardy ne restituís
remirablament lo fiel, en destriant mai que mai los
ligams ambe los periòdes d'abans, l'Atge mejan de segur,
mas tanben, en particular, lo sègle XVI, - lo temps de Garròs,
lo de Jean de Nostredame. Coma totjorn ambe Gardy, l'obratge
es plan mai qu'un estudi critic : es una escorreguda tresviraira
al còr de l'escriure, plan en-delai dels autors
mençonats, dinc'a rejúnher la figura d'Orfèu. Una òbra que
pren son sens e sa portada dins l'encastre de l'encaminament
creador empenat de l'escriveire, en-delai dels genres.
Lo libre còsta 25 euròs. Presses Universitaires de Bordeaux,
Bordeaux 3, Domaine Universitaire F-33607 Pessac Cedex.
www.pub.u-bordeaux3.fr
* Totjorn a las edicions de las Presses Universitaires de
Bordeaux, dins la meteissa colleccion Saber, ven de paréisser
la Gramatica de l'occitan gascon contemporanèu, de Maurice
Romieu e André bianchi, obratge monumental de 528 paginas,
tot en occitan. Es una gramatica complèta que farà data.
Totes los aspèctes de la lenga son estudiats metodicament e
las variantas màgers son senhaladas. Trobam quitament aicí
un pichon precís de gascon aranés. Pr'aquò aquela aisina
preciosa ten compte de las necessitats de l'ensenhament e
las formas preconizadas son las mai espandidas. Serà desenant
la gramatica de referéncia de l'occitan gascon amb, a
53