Somari - OC Revista

ocestiu03.qxd 11/09/03 13:43 Page 27
BERENIÇA
De qu'avètz paur ? Digatz, tenètz tròp vòstra lenga.
Vòstre despart volètz qu'a-n un mistèri tengue ?
ANTIOCHUS
Au mens sovenètz-vos que fau coma volètz
E qu'aquí m'escotatz per la darrièra fetz.
Se ara que ganhatz de glòria e de podença
Vos sovenètz l'endrech qu'a vist vòstra neissença,
Bessai vos sovenètz que dins aquestei luòcs
Per vòstreis uelhs subran tot mon còr prenguèt fuòc.
Vos amère e, consent, Agrippa vòstre fraire
Prenguèt lenga per ieu. Bessai de vòstre caire
Mon còr lo voliatz ben e vos fasiá d'efèct.
Mai Titus venguèt puèi, vos veguèt, agradèt.
Davant vos se mostrèt òme de grand' fisança
Que pòrta entre sei mans de Roma la venjança.
La Judèa paliguèt. Lo paure Antiochus
Se comptèt lo promier au nombre dei vencuts.
Pron leu, dins mon malur, comble de mon malaise,
Vòstra boca ordonèt que la mieuna se taise.
Trantalhère de temps, vos parlèron meis uelhs.
Vos seguissián mei plors, mei sospirs, jorn e nuech.
Aguère de causir mai siatz estada ruda,
Sacheriatz m'impausar l'exil o lenga muda.
Vos l'ai degut prometre e pereu vos jurar.
Mai a l'ora que siam auje me desclarar.
Quora me derrabiatz una promessa tala
Mon còr fasiá serment de vos amar encara.
BERENIÇA
A!de que me disètz?
ANTIOCHUS
Me siáu taisat cinc ans
Emai me taisarai, Madama, encara autant.
De mon rivau astruc leis armas acompanhère.
Versar mon sang enfin après mei plors vosguère.
Lei mòts me venián pas mai per lo mens cresiáu
Que mei valhantisas farián parlar de ieu.
Semblèt puèi que lo ceu metriá fin a ma pena.
A cu cerca la mòrt ren de segur li mena.
Inutiles perilhs, èra aquí mon error:
La valor de Titus passava ma furor.
Fau pron qu'a sa vertut mon estima responde,
L'esperèsson, Madama, a l'empèri dau monde.
Amat de l'univers, e per vos lo plus beu,
Semblava que lei còps anavan que sus eu.
D'aqueu temps, sens espèr, las de viure, pelegre,
Son rivau malastruc semblava que lo segre.
Vèse que vòstre còr m'aplaudís en secret,
Vèse que m'escotatz amé mens de regrets,
Que plena d'atencion per mon dire funeste
27