El Consejo Vasco del Movimiento Europeo (1951-2001) - Eurobask

Iñaki Oyarzabal
EMEK-ko lehendakariordea
Euskaldunok badugu zer ikasia Europaren eraikuntzaren historiari dagokionez,
une zailetan, alde batera utzi baitu «zer gara» galdetzen zuen eztabaida antzua eta
«zer egin dezakegu elkarrekin» edo «zein da gure proiektu bateratua» galderak
planteatu baititu. Europaren eraikuntza lan bateratuaren eta elkarrizketaren eredu izan
da, nazionalismoak alde batera utzi eta bakea, aurrerapena eta herritarren ongizatea
bermatzeko ahalegina egiten duten demokraten arteko bateratzearen eredu.
Gu guztiontzat, gaurko Europa askatasun-erreferente bat da, duela berrogeita hamar
urte euskaldun-talde esanguratsu bat, hasiera-hasieratik, Europaren eraikuntza-prozesuan
lan egitera bultzatu zuen erreferente berbera. Garai hartako europeistek lan bateratu
batean lan egiteko sentitu zuten ilusioa beldurrari elkarrekin aurre egiteko beharraren
emaitza izan zen: gerraren eta totalitarismoen beldurra gainditzeko beharra.
Askatasunean eta demokrazian oinarritutako gune bat eraikitzea beharrezkoa zela
pentsatu zuten guztiek, herritar guztiei bakea eta ongizatea bermatuko zien gune bat.
Gaur, mende berriaren hasieran, europeismoaren aitzindari haien ideia eta ilusioak
gizarte osoan sakon sartu diren honetan, Europaren eraikuntzaren prozesuak erronka
berri eta erabakigarriak ditu. Europarren belaunaldi berriek ez dute inoiz batasuna
ulertuko, batasun horrek bere egiturak demokratizatuko dituen erreforma egiten ez
badu eta herritarrengana gehiago hurbiltzen ez baditu.
Europako nazio handi bat osatzeko batasun politikoaren prozesuari bultzada
emateko, ezinbestekoa da, nire ustez, belaunaldi gazteek askatasun-maila handiagoa
eta aukera-berdintasuna bermatuko dien proiektu bateko partaide direla sentitzea. Eta
Europa horrek oinarrizko balioak eta printzipioak interes partikularren aurretik kokatu
beharko ditu.
25