Fueddàriu de Biddesartu - Amos Cardia

Candu no tenit parentesis in mesu bolit nai ca fait a ddu scriri a sa
biddesartesa puru:
arginare v firmai, bdst frimai
Candu no bieis is litras bdst bolit nai chi su fueddu in Biddesartu est
su pròpiu de is atrus logus campidanesus e chi ddu nant fintzas de sa
pròpiu manera:
abile agg àbili
Candu ddoi est sa scèscia a s’acabu - est a nai custu sinnu × - bolit nai
ca sa genti de Biddesartu no at scìpiu nai su fueddu de Biddesartu po
cussa cosa. A sa genti chi eus domandau, dd’est partu chi cussa cosa,
chistionendi in Sadru in Biddesartu, no dda neraus:
abbastanza avv bastanti, bastantementi, ×
Perou custus fueddus, mancai no tengant currispundèntzia in Biddesartu,
ddus eus lassaus su pròpiu. Podit essi chi su fueddu ge s’agatit
in Biddesartu puru e mancai dd’eus scarèsciu o, chi pròpiu seus
sigurus chi in Biddesartu cussu fueddu no dd’eus nau mai, custa est
s’ocasioni bona po ddu imparai. Est s’ocasioni bona po cumentzai a
ddu nai, pighendiddu de is atrus logus campidanesus, ca aici su Sadru
bessit una lìngua sempri prus manna e nosu besseus sempri prus bonus
a chistionai in Sadru de milli cosas.
Scioberendi is fueddus de ponni in custu fueddàriu eus lassau a foras
is nòminis de animàlis, piscis, pillonis, matas, partis de su corpus,
maladias e aici nendi. Funt totu cosa chi agatais de manera fàtzili
in atrus fueddàrius prus mannus o spetzialìstigus, po su chi spètat su
Campidanesu literàriu, intamis po su Biddesartesu iat a essi srebiu
unu traballu mannu meda de circa a posta po cussu sceti.
Is partìcipius passaus ddus eus postus candu funt agetivus chi imperaus
meda e totu. Es.
aperto agg obertu, bdst obretu
De si nunca participius passaus no nd’eus postu e tòcat a circai su
verbu a s’infiniu. Po nai, su fueddu abbassato no ddoi est, intzandus
tòcat a circai su verbu a s’infiniu, agatais sa tradusidura e su particìpiu
passau si ddu feis bosatrus.