Fueddàriu de Biddesartu - Amos Cardia

S’Ofìtziu de sa Lìngua Sadra de Biddesartu
S’Ofìtziu de sa Lìngua Sadra de su Comunu de Biddesartu, trabàllat
po pesai su bilinguismu in bidda nosta puru. Bolit nai a imperai e a fai
andai ananti su Sadru comenti s’italianu e duncas, po su chi spètat a
cust’ofìtziu.
• a tradusi is àutus pùbricus e is manifestus chi andant a sa genti
• a agiudai is aministradoris, is impreaus/adas comunalis e sa genti
chi bolint tradusiduras in Sadru
• a studiai is leis de is minorias linguìsticas e a apariciai progetus
• a apariciai cuncursus e a imprentai librus po spainai su Sadru
• a arregolli is mellus documentus de polìtica linguìstica
• a circai e a studiai is fueddus de su connotu de Biddesartu,
campidanesu e sadru
• ... e tanti atra cosa ancoras.
Po cust’arrexoni s'Ofìtziu de sa Lìngua Sadra de su Comunu de
Biddesartu est arrelatau cun is atrus Comunus e Provìntzias chi tenint
sa pròpiu tenta de strantaxai su bilinguismu in Sardìnnia.
Medas traballus ddus feus imparis, cordinendisi' e fendi nasci unu
connotu chi balit po totus, po no essi ancora una borta centu concas
e centu berritas, cosa chi no at fatu beni a sa terra nosta.
Cun custu traballu boleus ascurtai e arriciri totu is cunsillus chi ant a
arribai de sa genti, de su mundu de su traballu e de s’Universidadi.
Spereus chi custu esempru ddu ant a sighiri totu is atrus Comunus
puru.
S'Ofìtziu de sa Lìngua Sadra de su Comunu de Biddesartu ddu fait
Simona Axana e est a intrus de sa bibrioteca comunali.