Fueddàriu de Biddesartu - Amos Cardia

Premissa
De s’Italianu a su Sadru
Custu fueddàriu s’agàtat de s’Italianu a su Sadru sceti. No eus fatu sa
parti de su Sadru a s’Italianu ca, po sa tenta nosta, iat a essi srebia
pagu. Est a nai chi sa boluntadi nosta est a fai imparai su Sadru a chini
scit s’Italianu sceti o comuncas a chini scit prus s’Italianu chi no su
Sadru. Po cussu tòcat a partiri de sa lìngua de custus, s’Italianu, po
arribai a su Sadru.
Candu nosu imparaus s’Ingresu, a marolla parteus de is fueddus italianus
chi giai scieus e agoa andaus a biri ita ddis nant in ingresu.
Sa pròpiu cosa est po su Sadru. Fait a ddu imperai sempri de prus
cumenti totu is lìnguas de su Mundu.
Cali Sadru
Su Sadru est una lìngua sceti, chi dda faint is duas bariedadis mannas
- su Campidanesu e su Logudoresu - postas imparis. Custas duas bariedadis
mannas, pigadas a solas, funt una parti de su Sadru. Su Sadru
est su totu, Campidanesu e Logudoresu funt is duas partis chi faint
custu totu.
Custu traballu dd’eus fatu innantis de totu po sa genti de Biddesartu,
intzandus dd’eus scritu in sa parti de Sadru chi chistionaus innoi: su
Campidanesu.
Cali Campidanesu
Su Campidanesu est sa parti prus manna de su Sadru, po cantu est
mannu su logu innui ddu chistionaus - de Tèulas a Aristanis, de Sant’Antiogu
a Crabonaxa a Seulu 1 e de prus puru – e po tanti est sa
genti chi ddu chistiònat 2 . Duncas, de cumenti est mannu, càmbiat
segundu su logu chi seus. Su Campidanesu de su Surcis est difarenti
de su de su Gerrei, su de s’Ollastra est difarenti de su Campidanu e
aici nendi. Sa diferèntzia est pagu, ca seus a intrus de sa pròpiu parti
(su Campidanesu) de sa pròpiu lìngua (su Sadru), ma comuncas dda
intendeus luegus.
1 Da Teulada a Oristano, da Sant’Antioco a Villasimius a Seulo.
2 Ant apretziau chi intru de 1.650.000 de totu is Sardas e is Sardus, prus de 900.000
bivint in logu chi chistiònant su Campidanesu. Càstia http://www.comitau.org//Mangaras/bariedadis/connosci.php