EUSKAL LIBURUGINTZA 1995 - Jakin

EUSKAL LIBURUGINTZA 1995
JOAN MARI TORREALDAI
Sailik hornituenak, ia liburu-ekoizpen guztietan, hiru hauek
izan ohi dira: irakaskuntza, haur eta gazteentzakoa, eta literatura,
nahiz eta desberdin den liburugintza bakoitzean okupatzen
duten lekua. Hona lau adibide:
Gai-multzoa Katalunia Galizia Euskal Herria Espainia
Irakaskuntza 31,5 30,4 28,0 17,8
Haur eta gazt. 16,8 10,2 24,0 8,9
Literatura 17,6 25,0 19,2 17,6
Guztira 65,9 65,6 71,2 44,3
Taula honen argitan gauza pare bat komenta daiteke:
• Espainiako kasua jarri dugu ondoan zera adierazteko,
alegia, herri hazietan gaien kontzentrazioa txikiagoa dela beti
ere. Gai askoz ere gehiagotaz idazten da, bidezkoa denez.
• Estatu espainiarreko hizkuntza periferikoetan kontzentrazio-tamaina
berdintsua dugu. Guk dugu altuena. Produkzioa
zenbat eta orekatuago, orduan eta txikiagoa hiru gai-multzo
hauen proportzioa. Seinale ontzat jo behar da iaztik hona gure
liburugintzak izan duen eboluzioa. Aurreko urtean % 78,3
izan zen hiru gai-multzo hauen pisua eta orain % 71,2 da.
• Herrialde batetik bestera gai-multzoen hierarkian bada
alderik eta berdintasunik. Hiruetan irakaskuntza-liburua dator
aurrena, nahiz eta proportzio desberdinetan produkzio bakoitzean.
Gurean haur eta gazteentzako argitalpenak datoz
bigarren lekuan: ia lau liburutik bat liburu-mota hori da. Literatura
dator bigarren lekuan bai edizio galiziarrean eta baita
kataluniarrean ere. Galiziarren kasuan lau liburutik bat literaturazkoa
da.
Gai-multzoak banan banan aztertzera joko dugu segidan,
handienetik txikienera.
HEZKUNTZA ETA IRAKASKUNTZA
Ondoko zerrendan ikus daitekeenez, bi liburu-mota biltzen
ditugu hemen: testuliburuak nagusiki bai, baina baita ere pedagogikoak,
didaktikazkoak.
87