copione - Silveria Gonzato

4
S.Pietro
Qua bisogna avérghe sènto òci! Ghe volaréa ‘n servìssio d'ordine, 'na ronda,
qualchedùn co’ ‘na bèla camìsa verde….
Angelo
Figùrete!.... Gh'émo solo ‘n centurión! Ghe saréa anca san Giorgio! Ma quel l'è
in òlta tuto el giorno in sérca de draghi! Mi ghe l'ò dito che no ghe n'è più, ma
no'l vól sentir resón. L'à dito che l'à sentìo parlar de ‘n "bissióne" lóngo lóngo
ch'el se scónde drénto à dei canài.
S.Pietro
Quài canài
Angelo
Sa vuto che sàpia mi! Ghe n'è de canài! I le ciàma co’ dei nùmari, parchè
trovàrghe ‘n nome par tuti l'è ‘n laoràsso: gh'è el primo canàl, el secondo, el
tèrso, el canàl quàtro, sìnque, sié e tanti altri!
S.Pietro
Qua no se pól mai star chièti! I è domiìa ani che són qua e ancora no i parla de
mandàrme in pensión! No ò mai fato gnanca ‘n giorno de ferie. Almànco i me
metésse l'apriporta! G'ò 'na ciàve che ghe vól ‘n fachìn par portarla!
Angelo
Sèto che bèlo che te saréssi sui santìni co’ ‘n déo sul pulsante e magari col
citofono tacà a 'na récia!
S.Pietro
Ocoraréa fàrghelo savér a tuti.... Che stufo che són! Par carità g'ò avù anca de
le sodisfassión, ò fato cariéra! Prima faséa el pescadór e adesso anca mi g'ò
‘na caréga! No spusso più de freschìn, no g'ò gnanca più cali! G'ò le mane lissie
come quéle de 'n prete. Quanta umidità che ò ciapà! E sèto quante òlte che ò
ris-cià de negàrme O' passà quasi 'na vita a proàr a caminar su l'àqua: gnénte
da far! Andavo zó come 'na piéra!....E adesso són sempre qua a sta scrivania;
vèrzo quel portón par le àneme beate, vedo tute le meravéie che gh'è là drénto
e a mi me tóca star qua! Che la colpa la sia de quel gal che l'à cantà
Angelo
Qual gal