Klik hier om die Voorgraadse Prospektus vir 2014 af te laai

18
produk gemeet word? Hoeveel tellers moet die bank gebruik om die kliënte
gelukkig te hou?
Kwantitatiewe bestuur behels die bou van wiskundige modelle om probleme
soos hierbo op te los. Die aard van die probleem bepaal die tipe model
wat gebou word. Oplossings vir hierdie modelle word met behulp van
die rekenaar verkry, getoets en dan op die oorspronklike probleem van
toepassing gemaak.
Kwantitatiewebestuurspraktisyns kan as private konsultante optree. So
nie mag hulle vind dat banke en finansieringsmaatskappye soos ABSA,
Sanlam en Old Mutual, produksieaanlegte en fabrieke, hoofkantore van
groot kettingwinkels (soos Shoprite Checkers, Pep Stores, Woolworths),
logistieke besighede, staatsdepartemente of semi-staatsorganisasies
(soos die Departement van Waterwese en Bosbou, of Transnet filiale) en
navorsingsinstansies soos die WNNR, gretig is om hulle in diens te neem.
LOGISTIEKE BESTUUR
Om in ’n kompeterende omgewing te oorleef, moet besighede hul
produkte winsgewend kan vervaardig, versprei en verkoop. Globalisering
het noodwendig tot gevolg dat kliënte geografies soms ver is van waar
die produkte vervaardig word. Logistieke operasionele aktiwiteite (bv.
oorlandvervoer, verskeping, verpakking, materiaalhantering en opberging)
word ingespan om hierdie geografiese skeiding te oorbrug en te verseker
dat kliënte koste-effektief voorsien kan word met die regte produkte, by
die bestemde plek, op die verlangde tyd, in die regte verpakking. Ander
belangrike logistieke aktiwiteite is aankope, kontraktering, koördinering,
voorraadbestuur, kommunikasie en die skedulering van aktiwiteite of
bestellings.
Hierdie fokusarea rus jou toe vir logistieke werk in die besigheidswêreld met
kundigheid en vaardighede soos holisties geïntegreerde denke, begrip vir
operasionele uitdagings, kommunikasie, samewerking, etiek en bedrewenheid
in die gebruik van inligtingstegnologie.
Verskeie uitdagende logistieke werksgeleenthede bestaan in die openbare sektor
en privaat besighede wêreldwyd. Vanaf die grootste motorvervaardiger tot die
kleinste produsent en enige onderneming wat produkte koop en/of verkoop,
het behoefte aan logistiekvaardige mense wat logistieke aktiwiteite plaaslik,
nasionaal en internasionaal kan beplan, organiseer en beheer. Diensorganisasies
(bv. hospitale en restaurante) maak ook gebruik van logistieke aktiwiteite.
MENSLIKE HULPBRONBESTUUR
Verpligtend vanaf eerste jaar: Bedryfsielkunde
Hierdie fokusarea berei studente voor vir ’n loopbaan in die bestuur
van menslike hulpbronne in organisasies. In Suid Afrika bestaan daar ’n
dringende behoefte aan persone wat menslike hulpbronne doeltreffend
kan bestuur ten einde die organisatoriese doelwitte te bereik. ’n BComm
met hierdie fokusarea kan lei tot nie-statutêre registrasie as “Human
Resource Practitioner” by die South African Board for People Practices
(SABPP). Moontlike loopbane is menslike hulpbronbestuurder,
marknavorser, opleiding- en ontwikkelingsbestuurder, konsultant en
arbeidsverhoudingebestuurder. (Vir statutêre registrasie as Psigometris of
om Bedryfsielkundige te word, kyk ons program BComm (Psig) onder
“Graadprogramme vir professionele registrasie”.)
BComm (Ekonomiese Wetenskappe)
Toelatingsvereistes
• Skryf die Nasionale Normtoetse AQL en MAT (kyk bladsy 4)
• ’n NSS-gemiddelde van minstens 60% (sonder Lewensoriëntering)
• Wiskunde 5
• Afrikaans Huistaal 4 OF Engels Huistaal 4*
• Engels Eerste Addisionele Taal 5 OF Afrikaans Eerste Addisionele Taal 5*
Indien jy Wiskunde 114 en 144 EN/OF Rekenaarwetenskap 114 en
144 as universiteitsvakke wil neem, dan:
• Wiskunde 6
* Indien jy nie aan albei hierdie taalvereistes voldoen nie, kyk “Taal van
onderrig” hierbo.
Hierdie program fokus feitlik uitsluitlik op ekonomie. Weens die
belangrikheid van statistiek vir die ontwikkeling van hoëvlak- ekonomiese
ontleding, is Statistiek of Wiskundige Statistiek tot op tweedejaarsvlak ook ’n
voorgeskrewe vak in hierdie program.
Studente wat belangstel om byvoorbeeld as ’n ekonomiese of finansiële
analis of konsultant te werk, moet vir hierdie graadprogram inskryf. Die
fokusarea wat jy kies, sal jou uiteindelike beroep bepaal. Lees hieronder oor
die fokusareas wat in hierdie program aangebied word en die beroepsrigtings
waarheen dit kan lei.
EKONOMIE
Verpligte vak vanaf eerste jaar vir ekonometrici en finansiële sektor: Wiskunde
Ekonomie kan met ander modules kombineer word om meer spesifiek te
konsentreer op areas soos ekonometrici, die finansiële sektor of ekonomiese
en bestuurskonsultante. Die finansiële sektor bied goeie loopbaangeleenthede
vir diegene wat ekonomie as fokusarea kies. So ’n persoon sal tipies werk as
’n ekonomiese of finansiële analis. ’n Verdere loopbaanopsie is ekonomiese
of bestuurskonsultante. Studente met ’n sterk kwantitatiewe agtergrond en
aanvoeling kan as ekonometrici in die finansiële sektor, openbare sektor of
aan ’n navorsingsinstansie werksaam wees.
VERVOEREKONOMIE
Dit is moeilik om te dink aan enige produk of mens wat nie vervoer nodig
het nie. Die oneweredige verspreiding van aktiwiteite – dink maar aan
werk, woon en ontspanning – bring mee dat feitlik alle persone en goedere
vervoer moet word. Hierdie vervoer lei egter tot verskeie kwessies soos
kongestie op die paaie en in stede, omgewingsbesoedeling, ’n tekort aan
nuwe infrastruktuur, asook die ontstaan van moordende mededinging en
monopolieë in die vervoersektor.
As vervoerekonoom gebruik jy vaardighede soos die vooruitskatting van vraag
(byvoorbeeld die aantal ritte en die keuse van die vervoervorms) en aanbod
(kapasiteit van nuwe vervoervorms) en die bestudering van metodes van
finansiering van onderhoud, verbetering en uitbreiding van vervoernetwerke
(soos tolgelde en padgebruikersheffings) om die vervoerprobleme op te los.
Wat werksgeleenthede betref, tree vervoerekonome dikwels op as konsultante
vir die verskillende owerheidsinstansies en die private sektor.
BComm (Wiskundige Wetenskappe)
Minimum taalvereistes
• Skryf die Nasionale Normtoetse AQL en MAT (kyk bladsy 4)
• ’n NSS-gemiddelde van minstens 60% (sonder Lewensoriëntering)
• Wiskunde 6
• Afrikaans Huistaal 4 OF Engels Huistaal 4*
• Engels Eerste Addisionele Taal 5 OF Afrikaans Eerste Addisionele Taal 5*
* Indien jy nie aan albei hierdie taalvereistes voldoen nie, kyk “Taal van
Onderrig” hierbo.
Hierdie program het ’n skerper fokus op Wiskunde en Wiskundige
Statistiek wat verpligtend is tot in die tweede jaar. In die derde jaar moet
jy ten minste een van Finansiële Risikobestuur, Operasionele Navorsing,
Rekenaarwetenskap of Wiskundige Statistiek volg. Indien jy belang stel om
byvoorbeeld ’n finansiële risikobestuurder of portefeuljebestuurder te word,
of om kwantitatiewe oplossings vir byvoorbeeld bestuursprobleme te vind,
raai ons jou aan om hierdie program te volg.
Die fokusarea wat jy kies, sal jou uiteindelike beroep bepaal. Lees
hieronder oor die fokusareas wat in hierdie program aangebied word en die
beroepsrigtings waarheen dit kan lei.
FINANSIËLE RISIKOBESTUUR
Verpligte vak vanaf eerste jaar: Wiskunde
Persone met opleiding in Finansiële Risikobestuur, Wiskundige Statistiek en
Finansiële Wiskunde word in diens geneem deur groot finansiële instellings
as finansiële en kwantitatiewe analiste soos finansiële risikobestuurders,
portefeuljebestuurders en finansiële-instrumenthandelaars.