Klik hier om die Voorgraadse Prospektus vir 2014 af te laai

44
Hierdie verskillende tipes breë vakkundige
rigtings wat die basis vir opleiding bied,
kan studente lei tot uitdagende loopbane, op
nasionale en internasionale vlak, in mynbou,
eksplorasie, toegepaste mineralogie, en
omgewingswetenskappe. Moontlike werkgewers
sluit in die Raad vir Geowetenskappe,
Mintek, die WNNR, die omvangryke Suid-
Afrikaanse mynbou- en eksplorasiebedryf en
’n verskeidenheid plaaslike en internasionale
geologiese en omgewingswetenskapkonsultante.
BSc en HonsBSc in Geoinformatika
Spesifieke toelatingsvereistes
Soos hierbo, MAAR indien jy Wiskunde (Bio)
en Fisika (Bio) as universiteitsvakke neem, dan:
• Wiskunde 5
Toegepaste wetenskaplike beroepe soos
omgewingskonsultante, die mynbousektor en
ingenieursfirmas gebruik toenemend geografiese
inligtingstegnologie om ruimtelike inligting
digitaal vas te lê, te manipuleer, te ontleed,
te modelleer en kartografies voor te stel. Die
hoofdoel van hierdie program is om jou die nodige
kennis van en insig in die wetenskaplike grondslae
van geoinformatika te gee in terme van ruimtelike
inligting, rekenaarvaardighede, geografiese
inligtingstegnologie en karteringsvaardighede
sodat jy kan help om geografiese inligtingstelsels
(GIS), aardwaarneming (afstandwaarneming) en
globaleposisioneringstelsels (GPS) effektief in die
onderskeie professionele rigtings en vakgebiede te
ontwikkel en toe te pas.
Hierdie driejarige program is gerig op die
teoretiese, metodologiese en praktiese aspekte
van geoinformatika. Die vierjaarprogram (m.a.w.
honneurs ingesluit) voldoen ook aan die vereistes
vir registrasie as ’n professionele Geografiese
Inligtingswetenskaplike (GIW).
Eerste jaar: Geo-omgewingswetenskap,
Rekenaarvaardigheid en Wetenskap kommunikasievaardigheid,
met Rekenaarwetenskap, Wiskunde
of Wiskunde (Bio), Biologie, Chemie, Fisika of
Fisika (Bio) as keusevakke.
Tweede jaar: Geografiese Inligtingstegnologie,
Geografie en Omgewingstudie, Sake-etiek,
Wetenskaplike Berekening, Statistiese Metodes
en ’n keuse uit Rekenaarwetenskap of Sosio-
Informatika.
Derde jaar: Geografiese Inligtingstegnologie
en Wetenskaplike Berekening, met ’n keuse uit
Rekenaarwetenskap of Sosio-Informatika.
Honneursjaar: Jy kan fokus op
Afstandswaarneming, Omgewingstoepassings of
die gebruik van GIS in rampstudies.
As professionele GIW kan jy ’n loopbaan op die
volgende terreine of by die volgende instansies
volg: omgewingskonsultgroepe, beplannings- en
ingenieursfirmas, programmatuurontwikkeling-
en rekenaarkonsultgroepe, alle vlakke van
die regering gemoeid met hulpbron- en
infrastruktuurbestuur, agentskappe betrokke
by natuurlikehulpbronontwikkeling en by
menslike-ontwikkelingsprogramme, eksplorasie
van minerale en mynwese, bemarking,
nutsmaatskappye en diensverskaffers. Ten slotte
sal jy by tersiêre opleidingsinstansies as dosent
en/of navorser kan werk.
BSc en HonsBSc in Chemie
Die BSc-program bied jou drie strome om van
te kies, naamlik chemie en polimeerwetenskap,
chemiese biologie of tekstiel- en
polimeerwetenskap. Die drie strome se eerste
studiejaar stem grootliks ooreen, maar Biologie
is ’n verpligte module vir chemiese biologie. Die
BSc neem drie jaar om te voltooi en die HonsBSc
nog een jaar.
Chemie en polimeerwetenskap
Die doel van hierdie stroom is om chemici en
analitiese chemici op te lei vir enige sektor van die
nywerheid wat van chemie gebruik maak en ook
om persone ’n breë chemie-gebaseerde tegniese
agtergrond te gee vir ’n groot verskeidenheid van
beroepe waarby chemie betrokke is. Dit is verder
gerig op die verwerwing van ’n diepgaande kennis
van polimere as die basis vir ’n verskeidenheid
materiale en van gevorderde sintetiese en
analitiese tegnieke vir polimere.
Eerste jaar: Verpligte modules
is Fisika, Wiskunde, Chemie,
Wetenskapkommunikasievaardigheid en
Rekenaarvaardigheid. Hierby kies ’n mens uit
(1) Biologie, (2) Geo-omgewingswetenskap, (3)
Toegepaste Wiskunde, Waarskynlikheidsleer en
Statistiek, of (4) Rekenaarwetenskap.
Tweede en derde jaar: Chemie en twee modules
wat volg op modules wat in die eerste jaar geneem
is. Met die uitsondering van die keusemodules
word hierdie twee jaar byna uitsluitlik aan
opleiding in Chemie en Polimeerwetenskap gewy.
Klem word gelê op die aanwending van chemie in
die verwerking van grondstowwe in die mynbou,
in die aanwending daarvan in mineraalveredeling,
metaalekstraksie, in die petrochemiese, bou-, verf-,
polimeer-, brisantstof-, landbou-, tekstiel- en
farmaseutiese nywerheid, asook in die nywerheid
vir die vervaardiging van papier en huishoudelike
en kosmetiese middels. Daar word veral aandag
gegee aan die monitering van besoedeling en
metodes om besoedeling te verhoed en te bestry.
Analitiese chemici word aangestel vir
proseskontrole in ’n chemiese aanleg, die
ontwikkeling van nuwe analitiese metodes,
die ontwikkeling van produksieprosesse, die
beplanning van ’n nuwe aanleg, die bedryf
van ’n chemiese aanleg, die onderwys, die
bemarking van onder andere chemikalieë,
wetenskaplike instrumente en komponente vir
’n chemiese aanleg. Hulle word ook aangestel
as omgewingswetenskaplikes. Hierdie stroom
bied ook vir jou die basis vir verdere studie in die
patent- en omgewingsreg.
Hierdie stroom kan opgevolg word met HonsBSc
in Chemie wat bestaan uit gevorderde modules in
byvoorbeeld analitiese tegnieke, organiese, fisiese
en anorganiese chemie en ’n navorsingsprojek. Dit
kan ook lei tot ’n HonsBSc in Polimeerwetenskap
waarin klem gelê word op gevorderde aspekte van
polimeerchemie en -analise, materiaaleienskappe
en toepassings in die Suid-Afrikaanse industrie.
Persone met enige van hierdie twee kwalifikasies
kan onder andere ook navorsing doen by
nywerheids- en navorsingsinstansies.
Chemiese biologie
Die doel van hierdie stroom is om wetenskaplikes
voor te berei vir ’n loopbaan in sektore van die
chemiese nywerheid wat hoofsaaklik te doen het
met die meer organiese en biochemiese aspekte
van chemie. Die stroom sal jou ook voorberei vir
nagraadse opleiding en ’n navorsingsloopbaan in
Organiese Chemie en/of in Biochemie.
Eerste jaar: Chemie, Biologie, Fisika,
Wiskunde, Rekenaarvaardigheid en
Wetenskapkommunikasievaardigheid.
Tweede en derde jaar: Chemie en Biochemie.
Die enigste modules wat nog bykom, is
Rekenaarvaardigheidmodules in die tweede en
derde jaar asook Mikrobiologie in die tweede jaar.
In Suid-Afrika is daar ’n tekort aan goed opgeleide
chemici met opleiding in Organiese Chemie en
Biochemie. Talle groot en klein maatskappye se
voortbestaan hang af van chemici wat prosesse en
die kwaliteit van grondstowwe en vervaardigde
produkte moet beheer. Staatslaboratoriums soos
die forensiese laboratoriums in Kaapstad en
Pretoria, Sasol en vervaardigers van plaagdoders
asook farmaseutiese en kosmetiese produkte, bied
beroepsmoontlikhede vir chemici met opleiding in
Organiese Chemie en Biochemie.
Dié BSc-stroom kan opgevolg word met HonsBSc
in Chemie en/of Biochemie.
Tekstiel- en polimeerwetenskap
Die tekstielbedryf in Suid-Afrika ontwikkel
vandag vinnig en bied opwindende loopbane
vir jong wetenskaplikes. Hierdie beroepsgerigte
stroom fokus op funksionele tekstiele.
In die eerste plek kry jy ’n deeglike,
wetenskaplike kennis van tekstiele deur
die bestudering van onderwerpe soos
veselwetenskap, polimeermodifikasies,
tekstielstofgedragseienskappe en die
vervaardiging, kleur, bedrukking en afwerking
van tekstielstowwe. ’n Deeglike studie van
natuurwetenskapvakke soos Chemie en
Polimeerwetenskap bied ’n uitstekende onderbou
hiervoor en ondersteun jou tekstielkennis in die
evaluering en ontwikkeling van tekstielprodukte.
In die tweede plek leer jy bestuurs- en
besigheidsvaardighede aan wat gesog is in
die tekstiel- en tekstielverwante industrieë.
Boonop ontwikkel jy jou kreatiewe, analitiese en
probleemoplossingsvaardighede.