zoom - AETG/COETG

As espectativas no sector son enormes, de feito a maior parte das operadoras tradicionais están elaborando a
súa propia estratexia de cara á prestación de servizos de VoIP. O impacto para o negocio de telefonía fixa, o primeiro
afectado, será moi importante, non só pola cota de mercado que gañe a VoIP senón tamén polo efecto arrastre
á baixa dos prezos de telefonía. Comézase a notar. En Xapón a operadora NTT estimou un descenso dos seus
ingresos en 2005 do 15% no negocio de telefonía fixa como consecuencia do uso da VoIP. Ante esta ameaza as
grandes operadoras están a reaccionar ofrecendo o seu propio catálogo de servizos, así compañías como EQUANT
nos EEUU, AT&T, AOL e GLOBAL CROSSING teñen xa ofertas con tarifas planas e chamadas ilimitadas. En España
TELEFÓNICA solicitou á CMT en decembro de 2004 unha autorización para preparar unha oferta de servizos de VoIP
que se resolveu favorablemente o pasado 31 de marzal. Nese mes o Ministerio de Industria asignou un par de rangos
de numeración específicos para a prestación deste servizo. A CMT na citada resolución do 31 de marzo permite
tamén a Telefónica empregar 5.000 números por provincia do rango de numeración xeográfica.
Pero os actores do mercado non son só as grandes operadoras. Estas teñen moito en xogo, pero ao mesmo tempo
están aparecendo operadoras especializadas como é o caso de VONAGE en EEUU, NEUF en Francia e tamén
PEOPLECALL en España. Outros que poden gañar moito neste escenario son fabricantes de hardware como CISCO,
NORTEL ou AVAYA que están metidos de cheo no desenvolvemento de produtos nesta área, así como os fabricantes
de terminais. Produtos como Skype, un software que intercomunica ordenadores gratuitamente conta xa con
80 millóns de descargas. E por último están os portais de Internet, dende Yahoo ata AOL pasando por MSN, que
están a preparar a súa propia estratexia neste atraente negocio.
¿Cales son os aspectos que hai que resolver actualmente nesta tecnoloxía? Quizais a calidade de servizo sexa
o máis inmediato. Non esquezamos que hoxe traballar con VoIP está asociado en gran medida á telefonía por
Internet, e as dificultades para garantir unha calidade uniforme das comunicacións de voz a través da Rede son
evidentes. A alternativa e facer uso dos servizos de VoIP que as diferentes operadoras empezan a ofertar ou establecer
RPV propias que por un custe maior que a Internet, permiten paliar esta problemática.
A seguridade é outro dos asuntos críticos, especialmente cando se pensa na Internet como canle de transmisión,
pola facilidade para interceptar comunicacións. A falta dun estándar claro que permita ás empresas emprender
proxectos de desenvolvemento de aplicacións con garantías é tamén un asunto que precisa de solucións.
Pero a verdadeira batalla no referido á VoIP estase a librar no ámbito legal. Se ben aínda dun xeito soterrado,
esta batalla xa se iniciou arredor do modelo de negocio e a normativa que o sustenta. Algo que ten tanta importancia
potencial e consecuencias económicas tan enormes como as descritas atrae todo tipo de intereses para
tutelar anticipadamente o seu desenvolvemento.
As posturas adoptadas neste asunto no plano legal son ás veces moi curiosas. En España, as posturas do sector están
moi enfrontadas, aliñando como case sempre a TELEFÓNICA dunha banda e a case todo o resto do sector doutra.
Teoricamente TELEFÓNICA debería ser a protagonista mais conservadora en canto ao impulso da VoIP xa que
ameaza directamente o negocio de telefonía fixa que para esta compañía supón un 30% dos seus ingresos en
España. Con todo a súa postura é a de non querer que exista ningún tipo de regulación permitindo así toda clase
de competencia. Deste xeito pretende que se trate este servizo como un Servizo de Comunicacións Electrónicas
(SCE), é dicir, igual que o correo electrónico ou os sistemas de mensaxería instantánea tipo Messenger, algo totalmente
distinto a un servizo telefónico tradicional.
Pola contra, os seus rivais, agrupados en torno á patronal ASTEL apostan porque se regule como un Servizo de
Telefonía Dispoñible ao Público (STDP), o que supón tratar a telefonía sobre IP como un servizo telefónico tradicional
aplicándolle toda a normativa que o regula.
Esta aparente contradición enténdese mellor cando se pensa que TELEFÓNICA percibe esta tecnoloxía como un
oportunísimo instrumento para eludir todas as trabas dos regulamentos que hoxe en día dificultan a súa actividade
comercial. De feito se se chega a considerar a VoIP un SCE como pretende a operadora, esta podería
empaquetar conxuntamente servizos de vídeo e voz, actividade que hoxe non se lle permite facer. A recente
resolución da CMT do 31 de marzo parece anticipar un éxito nas pretensións da operadora. É por iso que son os
operadores de cable quen máis se manifestan dentro de ASTEL contra estas pretensións de TELEFÓNICA. Así
mesmo, a posibilidade do operador dominante para ofrecer prezos por debaixo dos que actualmente ten fixados e
evitar así a presión da CMT sería outro grande activo.
05 • 01 11