zoom - AETG/COETG

firma invitada
f i r m a i n v i t a d a
Temas enredados, tópicos revirados. A identidade gráfica da AETG
Radiación, emisión, difusión, comunicación, transferencia, transformación, desenvolvemento, evolución… velaquí unha restra de palabras anotadas na marxe
dunha folla, nun caderno de traballo do mes de febreiro do 2004. Á súa beira algún 0101 pintado sen moita convicción, a carón deles ondas máis ou menos
concéntricas, riscos, esbozos, variacións… algunhas páxinas máis adiante, ondas de novo. Pero o proceso de deseño non quedou aí.
Tento reconstruír agora a reflexión que, xa hai case un ano, nos levou ao deseño da identidade gráfica da Asociación de Enxeñeiros de Telecomunicación de
Galicia. Durante este tempo, ademais, teño batido, por azar ou necesidade con pezas de arte ou de comunicación visual, que estarían emparentadas formalmente,
dun xeito ou doutro, co noso proxecto. Algunha como ya.com é de nova creación. Pero antes de continuar pasando as follas daquel caderno e debullar
o pensamento gráfico daquel proceso, cómpre quizáis explicar que o traballo dos deseñadores versa en gran medida sobre a identidade. ¿Cal é a esencia
das mensaxes? ¿De onde vén ou cara onde vai unha empresa ou unha institución?, son preguntas que se fan decote nun atelier de deseño.
Tamén, antes de seguir, cómpre ter presente que un símbolo gráfico de identidade, incluíndo o seu sistema ou programa de uso, non é unha novela, postos a
comparar, semella máis a un poema, non por breve menos complexo, conciso sí, pero mesto, fondo e rico en entidade, un chip enchido de significado. Debería
ser así, pero adoita haber moita banalidade.
Con todo, buscando a complexidade o deseñador procura a sinxeleza. Non é un paradoxo, é a necesaria síntese para que un pequeno debuxo, doado de estampar,
imprimir, calcar, fotografar, serigrafar, transmitir, percibir, apreciar, descifrar, entender, comprender e mesmo seducir, chegue a cumprir o seu papel só
nuns segundos. Estamos xa ben lonxe do tempo dos requintados escudos heráldicos, ben afastados da retórica empresarial decimonónica, ateigada de rodas
dentadas, fábricas fumegantes, barcos navegantes e mercurios voadores. A comunicación da identidade visual dunha entidade do noso tempo funciona dun
xeito analóxico, provocando asociacións de ideas, fervenzas semánticas, que facilitan o pensamento gráfico a maior velocidade que a transmisión dixital escrita
ou representativa, complementaria e fundamental noutras pezas, noutras canles, noutros xéneros.
Precisamente, evitar a retórica obsoleta e remozar a mensaxe esencial foi o que nos levou a desbotar o emblema utilizado polo Colexio Profesional español,
que representa como armas do “escudo” unha antena que, a xulgar polas faíscas que xorden do pindirico, está emitindo. É a mesma imaxe mil veces repetida
no comezo dos filmes da antiga productora americana RKO, unha ilustración que hoxe pode resultar moi simple, pero lonxe de comunicar potencia tecnolóxica,
transmite inxenuidade, historia pasada.
30 a nosa rede AETG
pepe barro