zoom - AETG/COETG

editorial
Ángel Viña Presidente AETG / Decano COETG
As circunstancias actuais, con as sentenzas do Tribunal Supremo que
abren o marco competencial do enxeñeiro de telecomunicación a
outros profesionais sen preparación específica nos temas que nos son
propios, obrigan a facer unha reflexión sobre da nosa función na
Sociedade e sobre das esixencias que unha sociedade moderna debe
impor para o exercicio profesional.
Á marxe da dimensión legal do tema, de análise sempre complicada,
e na que como mínimo deberiamos atoparnos cun escenario de reciprocidade
(se unha profesión se declara competente para asinar proxectos
dunha área de coñecemento allea, parece lóxico que eses
mesmos principios se apliquen á inversa), hai unha análise a facer en
canto á aceptación social dos traballos en calquera dos ámbitos de
actuación dos enxeñeiros e de calquera outro profesional.
Agora que tivemos o afundimento do túnel do Carmel, ¿entenderíase
que houbese un profesional non cualificado na dirección de obra
desas infraestruturas? ¿Deixariamos unha operación cirúrxica nas
mans dun profesional non acreditado para exercer de médico? ¿Que
facemos igualmente co profesorado universitario, cos pilotos de aviación,
con xuíces e notarios? ¿Encargariamos o proxecto dun edificio a
un non arquitecto?
Son moitos os exemplos de que determinadas actividades profesionais
en sociedades modernas, por responsabilidade e procura do bo facer,
deben precisar de acreditacións ou habilitacións para o exercicio profesional.
Non é normal que os proxectos de comunicacións do AVE
Madrid-Lleida fosen firmados por un enxeñeiro que nada ten que ver coa
especialidade. O resultado xa é sabido: por múltiples causas ese AVE
non vai e, seguramente, unha delas sexa o fallo das telecomunicacións.
Dende a AETG e o COETG esperamos cordura neste punto. E debería
vir por dúas vías: por esixencia legal e tamén por estado de opinión.
Remarco isto último recorrendo a un visionario do século XIX,
Alexis de Tocqueville, que, estudiando a democracia en América fronte
aos sistemas absolutistas europeos, identificaba a “exuberancia
asociativa” da nova sociedade americana, “... que leva a que, en cada
lugar, para cada problema, para defender todo interese, para impulsar
calquera proxecto, xéstanse asociacións voluntarias”. E engadía unha
reflexión: “este asociacionismo vólvese unha práctica esencial da
democracia, que xera un civismo para un novo tempo... unha democracia
onde as leis pesan infinitamente menos cós costumes”.
Queremos ver este civismo tamén en telecomunicacións nunha
Galicia modélica: concellos esixindo a normativa de ICTs deseñada
por enxeñeiros de telecomunicación, a administración encargando a
telecos aquilo que ten que ver coa telecomunicación, as empresas
públicas igualmente a marcaren un modelo que decididamente levará
o cidadán e o sector privado a apostaren por unha forma seria de
facer telecomunicacións. E a lexisladores e xuíces forzados polo
impulso social a ampararen este modelo de sociedade.
E con Tocqueville xa metido neste artigo, non me resisto a unha última
cita súa para referirme ás elección que temos convocadas no noso
colectivo. Di o estudioso francés que “a democracia expande en todo
corpo social unha inquieta actividade, unha forza sobreabundante,
unha enerxía que non existe xamais sen ela, e que, a pouco que as circunstancias
sexan favorables, pode facer marabillas". Non te esquezas
de votar, participa, que aí comeza a nosa forza.
05 • 01 01