zoom - AETG/COETG

Entrega de premios
Premios á innovación
do noso sector
Varios premios destacan ao longo do ano o traballo das empresas e institucións
galegas no eido das TIC. Os premios EGANET, os de GaliciaTIC, ...
Queremos resaltar os outorgados recentemente no marco do X Encontro de
Tecnoloxías da Información en Galicia e que amosan algúns exemplos do
moito e do ben que se está traballando na nosa terra.
A primeira felicitación para a Asociación Téxtil de Galicia, polo seu proxecto,
sobranceiro a nivel nacional, de sistema RFID para as empresas do sector.
Trátase da implantación dun sistema de identificación por radiofrecuencia dos
produtos, un método de etiquetaxe chamado a substituír aos actuais códigos
de barras e que permite o control do produto dende a fabricación ata a venda.
Tecnoloxía innovadora e empresarios destacados utilizando tecnoloxía para a
mellora da competitividade nun mercado globalizado.
Tamén para as tres universidades galegas e a Consellería de Innovación que
creu na idea e arriscou financiamento e implicación, e en particular para a
Universidade de Santiago de Compostela que se fixo acredora do premio, polo
proxecto de conectividade sen fíos á comunidade universitaria: despregamento
de redes sen fíos WiFi para os estudantes e a campaña de adquisición de
portátiles. 2000 usuarios conforman xa na USC unha das redes máis extensas
a nivel nacional.
Parabéns tamén para outro dos proxectos premiados; TORGA.net, unha rede
de alta capacidade (1 Gbps ampliable a 10 Gbps) que une as comunidades de
I+D+I+i da eurorrexión Galicia-Norte de Portugal, e que impulsou o CESGA,
unha institución habitual dos premios en Galicia, con grande merecemento.
A presentación deste proxecto, por certo, fíxose mediante un encontro virtual
grazas á primeira rede de salas de traballo colaborativo remoto Acces Grid
instalada na Península, coma parte do proxecto TORGA.net.
E rematamos os premios co Portal Móbil desenvolvido pola empresa Loroestudio
para El Correo Gallego, un proxecto que permitirá facer unha edición dixital do
xornal que será accesible aos lectores dende os seus terminais móbiles.
Indicadores da Sociedade da Información:
Galicia necesita dun pulo
Déronse a coñecer nestas últimas semanas algúns indicadores da presenza de
Galicia na Sociedade da Información, co Instituto Nacional de Estatística como
referencia, que constatan o que xa sabiamos: estamos nos últimos postos a nivel
nacional e, o que é peor, a nosa situación relativa non parece mellorar (crece a
fenda dixital).
Os galegos -din as notas de prensa- son os españois que dispoñen de menos
ordenadores nas casas, os que menos fogares teñen conectados a Internet e os
que menos usan a rede. A dotación de equipamento high-tech (portátiles, DVDs,
etc.) tamén é moi baixa nos fogares.
Isto constata a necesidade de dar dun decidido pulo a este sector en Galicia, un
pulo crible con orzamentos -moito máis que ese 0,2% do orzamento da comunidade
dedicado a implantar internet-, con estruturas de alto nivel e con persoal
e profesionais das telecomunicacións traballando arreo tamén no público.
Non imos dicir que chove cando mexan por nós, e como ben di o Vicerreitor de
Investigación e Desenvolvemento da Universidade de Vigo, Salustiano Mato,
“non hai medo á rede, o que hai son dificultades de acceso”. Pero tampouco procede
entrar en laios fatalistas ou polémica banal.
O que temos que facer e arrimar o ombro entre todos, dende as nosas responsabilidades
individuais e profesionais e cun grande esforzo. E temos que pedirlle
á Administración que leve adiante con decisión e orzamentos cribles, comparativamente
suficientes para converxer coas rexións europeas que lideran o
desenvolvemento da Sociedade da Información, eses plans anunciados de
banda ancha, de estratexia da Sociedade da Información, de modernización dos
servizos administrativos e tantos outros que se deberían empezar a concretar e
facer visibles. Os profesionais das telecomunicacións apoiaremos con toda a
nosa enerxía esas actuacións.
zoom
05 • 01 07