You also want an ePaper? Increase the reach of your titles
YUMPU automatically turns print PDFs into web optimized ePapers that Google loves.
Pepa<br />
BARBANTIA<br />
Non sabía se estaba mareada pola fame, a sede ou a calor abafante.<br />
A lingua inflamada atrancáballe a gorxa dificultándolle o respiro, o<br />
padal enxoito coma unha cortiza pola falla de humidade; e aínda así,<br />
nun xesto de supervivencia, espertou lambendo os beizos agretados.<br />
O primeiro pensamento para Xan; o último, pouco antes de ser<br />
vencida polo sono, tamén fora para el. Que sería del? Prenderíano?<br />
Estaríano torturando ou xa o mataran? Do peito, ou máis ben da fondura<br />
da alma, saíu un laído cruñado de dor. Retumbando coma un lóstrego,<br />
o berro bateu contra as paredes do cuarto, e os muros devorárono<br />
coma se fosen monstros. Pensou que non sairía das portas para fóra. A<br />
ningún daqueles homes, que fumaban e rían mentres facían garda,<br />
pareceu importarlles.<br />
A indiferenza dos demais fronte ao sufrimento deixábaa soa coa<br />
súa dor, e así, comprendeu que ninguén percibía a súa desesperación.<br />
Alí seguía sen a axuda de alma nacida.<br />
Unha pequena luz no medio da escuridade apenas indicaba a chegada<br />
do amencer, pero rachaba as tebras, axudaba a ollar. Aquel alborexar<br />
ía transcorrendo paseniñamente, coma o que xa pasara, sen<br />
axuda de ninguén, esquecida do mundo.<br />
Sentíase demasiado humillada para pensar con claridade. O corpo<br />
entumecido e insensíbel polas malleiras, dicíalle que estaba morrendo,<br />
seguía morrendo e, aínda así, aferrábase aos recordos: o namoramento<br />
de Xan, a voda na igrexa, o milagre dos nacementos, primeiro do fillo<br />
e despois da filla, os traballos para saír adiante... O peito fendeuse nun<br />
chorar contido, volveu á nenez, á rapaza orfa, pobre; lembrou as mañás<br />
de friaxe na invernía e o caldo de unto como único xantar.<br />
Os pensamentos brincaban dun lugar a outro. Seu pai traballando<br />
toda a súa vida no mar ata que un vendaval afundiu a dorna e unha<br />
masa de auga salgada levouno para sempre. Ese ano fora ano de tuberculose,<br />
a enfermidade dos pobres, outra calamidade máis. Os enfermos<br />
43