20 Inuunermi pisariaqartitat ilagaat eqqiluisaarnissaq. Talitit qullarteriarlugit unitit naamariannguakkit, immaqa tipeqalaarput immaqaluunniit suli tipigipput. Tipeqarsimappata tassa uffarnissaq pisariaqalersimassaaq. Peqqinnissakkut Nakkutilliisoqarfimmi niviarsiaq Turid B. Skifte apersullatsiarakku timikkut eqqiluisaarneq pillugu imatut akissuteqarpoq. - Timikkut peqqissaarnissami pisariaqarnerpaajupput imeq qaqorsaallu. Minnerunngitsumik pingaartuuvoq assat eqqiluitsuutittuaannarnissaat, tassa assatsigut minguit bakterissat virusillu inunnut allanut tuniluuttarmata. Aperiganni nappaateqalertoqarsinnaanersoq eqqiluisaanngikkaani, angerpoq. Nappaataalersinnaasullu makkuunerarpai: Nuanneq allallu aseruuttoornerit soorlu nuallunneq, timminneq, siggunni kimillannerit, herpes, meeqqat kimillanneri (børnesår), meeqqat nappaataat, soorlu mæslingit, kuppiaqqat, savarneq, polio allallu nappaatit. Puakkut sakiallunneq, anernerup aqqutaatigut aseruuttoorneq, kimillannernik aseruuttoornerit aammalu atoqatigiinnermi nappaatit tunillaattartut. Nappaatit tuniluuttartut eqqiluisaarluarneq aqqutigalugu pinngitsoortinniarneqarsinnaapput. Taamattaaq inigisap ipiitsuunera aammalu silaannarissarluartarneq iluaqutaasinnaapput. Taamaammat arlaannik nappaatinik peqalersimaguit qasuersernissaq, imerluarnissarlu pisariaqarpoq. Aammalu inunnik allanik tuniluutsitsinaveersaarnissaq pisariaqarluinnarluni. Nualersimaguit quersortillutit qanivit assertarnissaa eqqaamaniariuk. Ilaalli nappaatit nakorsaatinik aatsaat aaqqinneqarsinnaammata, nakorsiaqqaarnissaq pisariaqarpoq. Meeqqat inersimasuniik annertunerusumik napparsimalernissaminnut qaninnerusarput, ullup ilarsua meeqqerivinniittaramik meeqqat amerlasuut akornanni. Meeqqerivinni allanilu paaqqinnittarfinni taamaammat eqqiluisaarnissat pisariaqarluinnartarpoq, misissuinerit takutissimammassuk eqqiluisaannginnerusuni taavalu silaannarissarneqanngippallaartuni meeqqat napparsimagajunnerusartut. Soorlu makku ilisarnaataasarlutik: Isini, sorlunni qungatsimilu iluaalliornerit, amikkut anillanneq, qasoqqajaaneq, niaqorlunneq, ungilatsitsineq aammalu malussajasuuneq. Taamaammat silaannarissaatit aalamik, tipimik, pujoralannillu piiaasinnaasut iluaqutaapput pitsaviit. Peqqinnerullutit inuujumaguit taava niviarsiap Turid B. Skiftep oqaasii eqqaamaannarigit: erngup qaqorsaatillu atorluarnissaat. Assatit qiviakkit immaqa kukivit ataat ipeqarput, taava errortoriannguarit. Assatit ipeqarpasinngikkaluarlutik tuniluussinnaasoqarput – bakterissat virusillu isaannarmik takuneqarsinnaanngillat. Errortortaannarillu minguit allanut tuniluutinnginnissaat anguniarlugu. Taavalu inigisanni silaannarissarluartarit, silaannarmi minguinnerusoq najuullugu pitsaanerummat.
Allattoq: Aviaq Jørgensen/ Assiliisoq: Leiff Josefsen 21