aktuellen September Ausgabe des Kuriers... - PSK

PSK KURIER September 2013
Aus dem Vereinsleben
Was mer um de Brunne rum so uff’gfalle isch!
Was ned wiedder alles los
war, seid de ledschde neischde
Nochrichde. En Haufe isch
bassierd, von unser Fußballer
sin ned abgschdiege, dass
des jedzerd a mol alle wisse
dun, ibber de Familjedag
un de Wassereibruch in de
Gschäfds schdell, hi bis zum
Geburdsdag, vom frijere, lange
neinevierzich Johr lang,
Abdaailungslaaider Fußball.
De Heibdling Silberlogge, de
lange Hartmut „Hardy“ Melcher,
isch lange achzich Johr ald worre.
Des isch mid Glanz un Gloria, in eme lange
Feschdobend, bei dem alle lang verdredde
ware, welle em scho lang wichdich ware un
sin, lang gfeierd worre.
So wie mer heere dud also e lange Veraschdaldung,
also meh als lange neinzich
Minude, naai sogar mid ere lange Verlängerung.
Von do e lang adauerndes: Hibb,
Hibb, Hurra uff de Lange, un noch viele
lange Schdammdischobend, ned nur mid
aaim Glas Bier, sonnern mid ere e lange
Ladd uff‘m Deggel!
Jedzerd e Werdle zu unserm Familjedag,
des Rahmebrogramm zum Fidelidasnachdlaaf,
also e drau me jo scho gar nimeh so
rechd was zum sage. Zerschder do abber
ebbes zum Nachdlaaf, also nachds durch
Wald un Feld mer rennd un am Kopf e Lichdle
brennd. Hoffendlich isch des ned des
aainziche, was dord brenne dud, habb e
denggd. Nix fir ugud, fir mich wär des nix,
abber jedem Dierle sei Bläsierle, Hud ab
vor so re Laaischdung, un Schbass derf sei.
Die ledschde „Finischer“, also die, wo‘s
bis ins Ziel schaffe dun, komme dann weid
weid nach Middernachd a, also do, wo se
nawelle, die mache also ferdich, dribbe
uff‘m Sidschdern. Des hädde die a aaifacher
habbe kenne, ich bin aaifach direggd,
ohne Umweg, nibber gloffe, un des
in ere Draumzeit!
Zrigg zum Familjedag, Blakad gud, Organisazion
gud, Wedder gud, Ablaaf gud,
Schbordagebod gud, Esse un
Dringge gud. Bsuch un Midarbaaid
von de Abdaailunge,
mol wohl maainend gsagd,
ned so gud. Gud mer henn
uns vielleichd e bissle gschdaaigerd,
‘s gude Esse un
Dringge von unsere Handballer
war nemmlich also so gud
wie ausverkaafd. Abber manche
Abdaailunge wie scho
gsagd, also die kann ‘s bei
uns so gud wie gar ned gebbe
odder die sin an so me Dag
alle uff Abdaailungsausflug odder hald uff
annere Alage. So weid so gud, abber jedzerd
hädd e aains faschd vergesse, also de
Ewend Humba Tätterä, gud maain nadirlich
Zumba, also dänzing for ewribody, friischdeil,
elaai, zu zwaaid, zu dridd, gud odder
ebbe a alle zamme, also des war en gude
Erfolg, also wenn alles wie Zumba gwese
wär, dann wär’s en gude Dag gwese!
Also gud, was mer jedzerd abber gar ned
gud brauche kann sin nadirlich die so wenicher
gude Eißerunge un Maainunge von
so ibberintelligende Toaleddeschisselbenudzer,
also sognannde Klugscheißer, do
helfd nur aains, selber gude Idee habbe,
sich gud eibringe un aaifach komme, daailnehmme
un gud midmache.
Zum Schluss noch ebbes zu denne Radfahrerinne
un Radfahrer, mid un ohne Ahänger
un Ahängerinne uff‘m Gelände, bidde
Räder am Eigang abschdelle, mir henn
jedzerd Fahrradschdänner! Bidde den aaideidiche
Hiweis am Eigang beachde, dass
Hund un Fahrräder uff unsere Schbordalage
nix zum Suche henn! Wobei nadirlich
die Vierbaainer gar nix defir kenne, die
sin jo nur so schlau wie der odder die, wo
se an de Leine habbe dun! Obwohl, also
ich perseenlich do manchmol mei Zweifel
habb e du. Abber die Dreddkawefahrer,
wer fihrd denn die, besser noch, was reided
denn die, wenn se mid em Rad, sogar
mid Ahänger, bis an de Rand vom Schbordbladz
nafahre dun.
7