T 13 050.pdf - RW Oberwallis

Rappor t an n u al 20 0 9/ 20 10.
Radunanza generala dals 3 october 20 0 9
La 54avla radunanza generala da las Pendicularas Motta Naluns Scuol-Ftan-Sent SA ha gnü lö sonda als 3 october
2009, excepziunalmaing aint in üna tenda montada aposta per quista radunanza sülla gronda plazza da parcar a Scuol.
La nouva pendiculara per rivar sülla Motta nun es amo statta in funcziun quel di, perquai nu s‘haja fat la radunanza
aint il restorant „La Charpenna“ sco pel solit.
Preschaints sun stats 389 acziunarias ed acziunaris chi‘d han rapreschantà 13‘225 vuschs da total 27‘000 aczias. Quai
voul dir: 48,98% da l‘acziunariat han tut part.
I d‘eira da spettar cha l‘avertüra da la nouva pendiculara sülla Motta Naluns ha influenzà eir la radunanza generala;
quai però in ün sen ourdvart positiv: las lavurs d‘eiran progredidas precis tenor plan fin al mumaint da la radunanza.
Uschè s‘haja pudü constatar cha‘l Kamov, l‘elicopter grond, ha pudü gnir fingià in lügl per plazzar las 16 püttas nouvas
cun ün pais da fin 4.7 tonnas als lös previss. Quai es capità cun üna precisiun bod incredibla, cun sustegn dals collavuratuors
da las PMNSFS ed insembel culla firma Garaventa. Avant quel di sun gnüdas demontadas las püttas veglias
sco eir las suas, e la staziun da val es gnüda sbodada.
Ün pêr eivnas plü tard haja dat ün ulteriur punct culminant: las suas d‘atschal chi paisan tuot in tuot 60 tonnas sun
gnüdas montadas. Las suas portantas sun gnüdas splissadas, e davo ha cumanzà la lavur da precisiun, voul dir finir e
drizzar aint ils stabilimaints.
Da manzunar specialmaing, eir in vista a la concurrenza, sun las seguaintas novitats: la nouva colliaziun directa tanter
la staziun da la viafier a la staziun da val, la s-chala rodlanta chi maina sül plan ingio cha las cabinas partan sco eir l‘arriv
sü Motta Naluns chi‘s rechatta sül listess livel sco il cumanzamaint dal territori da skis.
Plünavant esa da manzunar cha duos affars importants pel sport da naiv s‘han domiciliats aint illa staziun da val, nempe
la butia Sport Heinrich e la scoula da sports da naiv da Scuol.
Parallel culla fabrica da la nouva pendiculara da Scuol sü Motta Naluns s‘occupan il cussagl administrativ e la direcziun
– impustüt la cumischiun tecnica – fingià culla planisaziun da la nouva s-chabellera da Ftan sü Prui.
Ils predschs per far adöver da las sportas da las Pendicularas Motta Naluns han stuvü gnir adattats i‘l decuors da l‘on
passà. Cullas entradas implü sto gnir finanziada dad üna vart l‘investiziun illa nouva pendiculara cun ün confort bler
plü grond, da tschella vart però eir la nouva s-chabellera planisada a Ftan. Davo duos ons cun predschs stabils es
noss‘interpraisa statta sforzada da cumpensar la sporta moderna e bainquant plü confortabla cun ün leiv augmaint
dals predschs.
Il president dal cussagl administrativ ha pudü render attent cun üna tscherta superbgia ad ün pêr cifras strategicas;
ouravant tuot ha‘l pudü manzunar cha l‘interpraisa ha pel mumaint üna quota da l‘agen chapital da sur 39% − sainza
il pajamaint antecipà da 3,5 milliuns francs al furnitur da pendicularas Garaventa/Doppelmayr. Cul pajamaint antecipà
s‘amunta l‘agen chapital a raduond 60%. L‘associaziun svizra da las pendicularas arcumonda üna quota da l‘agen
chapital da 30 fin 35%.
Las cifras da la stagiun 2008/2009 as rechattan i‘l terz superiur in congual cun oters lös da skis sumgliaints. Il Cashflow
da 31,3% es ün zich plü bass co quel da Samignun. El es cleramaing plü ot co quel d‘Arosa e Lenzerheide, però plü
bass co quel da Tavo.
In connex cul Engadinerhof s‘haja pudü constatar cha la situaziun economica actuala nun impedischa il proget, til frena
però. Il plan da quartier „Chaschiners“ d‘eira gnü approvà in settember tras la Regenza dal chantun Grischun, quai
voul dir chi‘s po uossa elavurar la dumonda da fabrica. Il böt dal cumün e da la Regenza es chi gnia fabrichà il prüm
l‘hotel e cha las abitaziuns da vacanzas vegnan realisadas in ün seguond pass.
Pro‘l quint da gestiun ha il directer Egon Scheiwiller pudü manzunar chi resulta dal trafic da stà ün rechav da CHF
676‘482.-. Quist resultat es bainschi ün pa plü bass co quel da l‘on avant, el surpassa però la media dals ultims 5 ons
per 9%. Il schmertsch da l‘inviern es allegraivel, el importa 9,735161 milliuns francs. Quai sun raduond CHF 500‘000.-
daplü co l‘on avant, la media dals ultims 5 ons vain surpassada per 7,7%.
Las entradas da la gastronomia (3,249346 milliuns francs) s‘han augmantadas per CHF 430‘000.- in congual cul on
avant. Intant cha‘ls cuosts da persunal han pudü gnir sbassats pro la pendiculara per CHF 200‘000.- es la listessa posiziun
pro la gastronomia per CHF 100‘000.- plü ota − üna valur acceptabla in relaziun cul augmaint dal schmertsch.
Ils cuosts da persunal cumplessivs importan 30,5%, quai sun 1,2% damain co l‘on avant.
6
Pendicularas Motta Naluns
Scuol-Ftan-Sent SA