T 13 050.pdf - RW Oberwallis

Rappor t an n u al 20 0 9/ 20 10.
2. …e lura esa st at uschè inavant !
Venderdi als 11 december 2009 es stat il di da las portas avertas, pro la pendiculara Motta Naluns sco eir pro la staziun
renovada da la Viafier Retica. La staziun chi sta uossa a disposiziun a la populaziun indigena sco eir als numerus
giasts correspuonda a las pretaisas d‘hozindi. Grazcha als perruns e‘ls binaris ragiundschibels da maniera sgüra e
confortabla esa ün divertimaint da viagiar cul tren.
Grazcha ad üna soluziun optimala rivan ils giasts dal sport d‘inviern a la staziun da val da la nouva pendiculara daspö
ils 11 december da maniera agreabla e sainza stuvair superar differenzas d‘otezza. Scuol ha uossa ün territori da skis
cun attach al binari!
La nouva pendiculara es dimena gnüda surdatta al trafic fuormalmaing venderdi als 11 december vers saira, intant
chi floccaiva. Rapreschantants da tuot las instituziuns partecipadas han tgnü ün pled festiv: sar dr. Jon Domenic Parolini,
il capo cumünal da Scuol, sar Erwin Rutishauser, il directer da la Viafier Retica, cusglier guvernativ Stefan Engler
sco eir sar Fredy Isler, il president dal cussagl aministrativ da las Pendicularas Motta Naluns Scuol-Ftan-Sent SA.
Id es evidaint cha la nouva pendiculara spordscha a noss giasts bainquant daplü confort co las duos veglias. Uossa
nu‘s haja plü il schaschin da muntar s-chalas da metal per rivar sü pro la pendiculara ed ir aint illas cabinas – il livel
d‘entrada es ragiundschibel da maniera ourdvart confortabla sur üna s-chala rodlanta. Eir cun sortir da la cabina pro
la staziun da muntogna nun esa plü dad ir sü per üna s-chala: ils giasts pon montar directamaing lur assas o skis e
partir.
La pendiculara nouva ha üna capacità da 2‘800 persunas l‘ura, intant cha‘ls indrizs vegls transportaivan be 1‘700
persunas. Star in lingià sarà dimena passà a Scuol. Dad üna vart as ragiundscha la nouva staziun da val da maniera
confortabla sur üna passarella chi maina lung ils binaris, da tschella vart as riva eir sül livel da las cabinas sainza s-
chalas. Quai es important impustüt per noss giasts pitschens e per persunas in sopchas cun roudas. Per quellas sta a
disposiziun eir ün ascensur chi permetta l‘access a las cabinas. Plünavant es gnüda ingrondida eir la plazza da parcar
chi d‘eira suvent surchargiada.
Illa staziun da val es gnü drivi ün affar da sport spazius e modern (Sport Heinrich). La scoula pels sports da naiv da
Scuol as preschainta bainischem aint il nouv stabilimaint, e l‘interpraisa da sport da naiv „Element“ s‘ha domiciliada
aint il stabel d‘administraziun.
3. La nouva pendiculara as cumprouva!
Il fabricat nouv es sainza dubi ün stabilimaint pellas prosmas duos generaziuns. La staziun da val visibla da dalöntsch
cun seis aspet modern, liger ed elegant as muossa vers inoura da maniera marcanta, in basa a la strategia da la marca
Grischun. La pendiculara metta ün accent pel temp modern; sco culur pellas cabinas s‘haja tschernü cotschen-granat,
e las fatschadas da la staziun da val correspuondan al concept da culurs da la marca Grischun. Ellas portan eir il logo
correspundent.
Ils rebombs dals sportists da naiv indigens sco eir dals giasts sun stats trasoura positivs. Las cabinas cleras han plaschü
uschè bain sco lur grondezza e‘ls sezs cumodaivels. Specialmaing blers commentaris positivs haja dat pervi da la maniera
cumodaivla per entrar e sortir da la cabina. Cun plaschair esa gnü constatà cha la pendiculara va bainquant plü
svelt. Cun verer inavo sülla stagiun 2009/2010 pudaina constatar cun grond plaschair cha la nouva pendiculara s‘ha
verifichada cun be pacas interrupziuns e vairamaing bod sainz‘ingünas „malatias d‘infanzia“.
Precis als 28 december – il cussagl administrativ laiva ir sü Motta Naluns pel giantar tradiziunal – es crodà oura il converter
da tensiun, uschè cha la prestaziun da la pendiculara s‘ha redotta per 50%. Infra cuort temp s‘ha mantunada
la fuolla dals giasts chi laivan rivar sülla Motta, ed aint immez d‘eiran ils commembers dal cussagl administrativ e dal
cader. Els han pisserà subit cha‘ls giasts implischan las cabinas cumplettamaing ed eir güdà a chargiar assas es skis.
Davo bundant duos uras e mez d‘eira passada tuot l‘istorgia, e l‘implant electric funcziunaiva darcheu. Quist incidaint
es restà l‘unic dürant tuot l‘inviern.
Ün‘interpraisa da pendiculara sto adüna as dar fadia per restar actuala, ma impustüt per as sviluppar inavant. I nu‘s
sto be mantgnair e tuot tenor renovar ils implants per accumplir ils giavüschs adüna plü gronds da la cliantella. I‘s
tratta eir da spordscher ün turissem da naiv attractiv e da sviluppar quel adüna inavant. Il giast spetta vieplü vacanzas
cun evenimaints e predscha activitats particularas dürant seis temp liber ch‘el passainta in ün oter lö. I voul dimena
üna sporta multifaria per cha las vacanzas dvaintan alch special per mincha singul giast. Culla nouva pendiculara
8
Pendicularas Motta Naluns
Scuol-Ftan-Sent SA