Pauline Hunzinger - Gedanken - Yumpu

Do bin isch ganz siddich (still), im Kerzeschai nit allä,
de Vadder Riesling im Glas lacht!
Ganz allmählich fillt sich die Winzerstubb, unn de Duft vunn de
Kich ziecht dorch die Nacht.
Do hugg ich unn horch drunner nei, sehn mer die Gsichder aa, nit
jeder lacht. S isch Leid unner de Leit, wanns betrachsch. Ä wohlisches
Sinne im Kerzeschai.
Du sähnsch unn simmeliersch driwwer nei unn frääsch dich. S gäbbt
Bruttler unn Spießer, s gäbbt Gelehrde unn Umgekehrde.
Volle unn leere Flasche an de Eischenk stehn. „Sinner ää do?“ De
Peter unn de Philipp lescher unn adrett. Unn Bawedd schlierft unn
spitzt ehr Schnut, ganz perfekt uffgemacht!
Vun de Rebschul her hosch e paar Semeschder gelehrich studiert unn
bedacht, du kennsch vun de Veredler unn vun de Mudderrewe die
Namme all.
Unn ich häb an mei Kamme Anna im Stille gedacht. De Stammvadder
isch de Riesling, ja, horch ner mol drunner nei.
Kimmer du dich um dich! Ehr Ääche henn gschmunzelt unn gelacht.
Sie war unn sie bleibt in Erinnerung, die Menschekenntnis beacht. In
Gleishorbach – Gott häb se selich.
Ehr rosiche Äppelbäckle ganz ehrlich; vum Läwe gegerbt,
doch fröhlich.
Ehrm Standpunkt getreu in de 50 Johr.
An de Kerwe de Zuckerbrotstand war begehrt.
So lieb ich die Rund in de Winzerstubb. S isch läwensbelehrlich.
Gäbbsch der ä Rund fer Seller unn Jeller. Will misch äner fobbe, sähn
ich die Anna unn denk an ehrn Spruch: Kimmer dich du um dich!
10