5011 SK-neu-PC 1999-2.qxd - Akademie för uns kölsche Sproch

„Ne Andraach met Kuletsch“
in Weltliteratur op kölsch
nach Siegfried Lenz: Eine Liebesgeschichte
ins Kölsche übersetzt von Karin Brauckmann, Martin Freitag, Martha Freund, Dorothee Heinrich,
Philipp Kühlem, Marlis Müller, Brigitte Schaefer und Marie-Luise Sicken
Der Kolvenbachs Pitter, ne Kääl wie ene Kleiderschrank, dä ävver de Zäng nit vunenein kritt, hät et voll erwisch.
Bei däm stämmije Holzfäller hät der Bletz enjeschlage wie en schwere Ax.
Dat Janze es passeet, wie hä dat Katharina Knack, e staats Mädche, aan der Strunder Baach bei der jroße Wäsch jesinn hät. Et
lohch op de Kneen un dät met singe dralle Ärm de Wäsch zorteere.
Daachsdrop jingk hä nit en der Bösch. Dovör stund hä fröhmorjens öm fünnef beim Pastur vun 'Maria Himmelfahrt' op der
Matt.
„Jode Morje, leeven Här, ich möhch jän hierode un bruchen doderför ene Daufesching.“
Dä Joddesmann — hä wor noch ärch verschlofe — dät dä Pitter jet messmödich aanlore un meinten: „Leeve Jung, esu ielich weed
et wal nit sin. Kumm nohm Fröhstöck widder. Wells de ävver wade, dann nemm der de Schöpp un jraf der Jaden ald ens öm.“
Der Pitter dät ene flöcke Bleck en der Jade werfe un meinten: „Wann ich fädich ben, doot er meer dann dä Sching?“
„Jo, jo, do kannste drop jon.“ meint der Pastor un jingk Fröhstöcke.
Fruh, dat alles esu jot fluppen dät, hatt dä Pitter em Rubedidupp dä Jaden ömjejrave.
Domet wor et nit jenoch; hä moht och noch denne Säu ne Droht durch de Nas trecke, en Koh melke, Krönzele plöcke, en Jans
schlaachte un en Fohr Holz opbärme.
Justemang, wie hä die Hött widder parat maache wollt, reef in der Pastor un jov im dä fädije Daufesching.
Der Kolvenbachs Pitter wor et zofredde, un dät dä Sching wie e Hellichdum en singer Brusstäsch verwahre.
Adich bedankten hä sich bei däm Joddesmann un maht sich aläät op der Wääch noh der Strunder Baach. Dat Trinche woss vun
singemjanze Jlöck üvverhaup noch nix. Quietschfideel soß et aan der Baach, dät sing Wäsch knedde un vringe, un af un aan
beloorten et sich em klore Wasser.
Der Bleck op dat propper Weech nohm dem Pitter der Odem.
Nohdäm hä sich widder bekräjen un ärch üvverlaat hatt, wat hä sage sollt, jingk hä bei et Trinche un saht: „Rötsch ens jet!“
Dat Katharina dät in met jroße Auge aanlore, maht im flöck Plaatz, un hä satzten sich nevven et.
Su soßen se do un keiner krääch de Muul op.
Noh ener Wiel fung dä Pitter sing Sproch widder:
„Bal jitt et Erbele un Worbele!“
Et Trinche dät zosammezucke: „Jo?“
Un widder soßen se stumm beienein, beloorten sich de Jäjend un däten sich af un aan verläje kratze.
18