ANGESAGT - Gemeindebrief Nr. 196

Plattdeutsch
Dumen rut
„… Hüüt kümmt Jehann to ehr, freit sick Marleen,
of he aver över Grootensee or aver över
Lüttensee or aver överhaupt nich kümmt, dat
weet keeneen … Hüüt kümmt Jehann …“ Na Ji
sünd jo bannig vergnöögt? Nich? Aver worüm
singt Ji denn? Ah, dat geiht üm Ortya Füllekroogs
Gesangsuptritt nülich an de Stoppstell vun den
Bus, ehren Disput mit Adolfine Seidel un’n Geföhl,
in’n verkehrten Film to sien. Un woans meent
Ji dat? Achso, wiel utrekent Adolfine, de doch
noch nienich en Aventuersch west is, nich mal
in Tieden, as dat in weer, sick eenfach mit’n Pappschild
an de Straat to stellen un up’n Mitfohrgelegenheit
to töven, mit‘ nmol in’t Dörp Stimmen
för’n Mitfohrbank sammelt un tosamen mit ehren
Wannervereen överall in de Ümgegend bi
Mitfohrbankrallys, wat jümmer dat ok sien mag,
mitmaakt, üm för den Gebruuk vun de Banken
to warven. Un wiel up de anner Siet Ortya, ok
wenn se gern mal mit anner Lüüd mitföhrt
alleen vunwegen den Klönsnack wiel de Fohrt,
de Mitfohrbanken mit ehr Leed madig maakt.
Man nu fangt Ji ok noch dat Strieden an. Weet Ji
denn överhaupt, wat Mitfohrbanken för Meubel
sünd? Nee? Na denn: Se schüllt, as överall verkünnt
warrt, bovento’n Autobus un dat Anrooptaxi
för weniger Autoverkehr un togliek för mehr
Mobilität in de Dörper sorgen. Dorvör schüllt
wussen Lüüd, luut Bedriefsanwiesung bloots den
an de egens reserverten Banken fast maakten
Dumen un den richtigen Wegwieser utklappen,
sick daalsetten, töven bit en Auto anhölt, mit den
Fohrer or de Fohrersch nipp un nau dat Tääl
besnacken, instiegen, moi Lüüd kennenlihren un
allens ahn en eenzigen Cent to betalen. Allens
kloor? Schon, bloots dat dat Geföhl vun Kino in’n
Geföhl vun Kinnergoorn wesselt is. Na denn is
dat keen Wunner, dat nüms de Banken brukt,
wenn Kinner utdrücklich utslaten sünd.
Hella Treskatis
16