Kamp is Lekker Tydskrif Februarie 2020

`n Paar dinge om te doen:
Suidelike Afrika en veral die Karoo, Sederberge en
Richtersveld is alom bekend vir San-rotskuns.
(Boesmantekeninge is dalk nie meer so polities
korrek nie, maar dis soos dit in die volksmond
bekend staan.) Middelberg is nie `n uitsondering
nie. Jy sal hulle hier kry! Omdat ek bedag is daarop
om daarvoor op te let soos ek stap, was ek gelukkig
om op van die rotskuns af te kom. Ek was
aangenaam verras! Neem `n waterbottel of drie
saam, pak `n rugsak, en gaan soek daarvoor. Dalk is
jy ook gelukkig! (Ek gaan nie te veel verklap van
waar dit alles is nie, want jy sal verbaas wees om te
sien hoe naby jy aan die kampplek van díe
tekeninge te siene sal kry.) Reël met Heinn dat jy
deurstap na die buurman se grond, en gaan soek
daar tussen die klippe in die rante. Wees baie
bedagsaam, want dit lyk soms meer na ligene en
rotsmos, as kuns… Die hekkie is skuins agter die
ablusieblok. Stap deur en gaan op `n soektog die
berg-in. Onthou asseblief dat ALLE rotskuns beskou
word as wêreld erfenis, en jy mag onder geen
omstandighede daaraan raak of dit beskadig nie.
(Ons praat van reusagtige boetes, en jy kan dalk jou
voertuig ook kwyt wees as dit gekonfiskeer word!
Om rotskuns te beskadig is erger as om kreef of
diamante te smokkel…) Neem foto’s, en laat nét
jou voetspore agter!
Om te gaan stap het jy drie opsies:
1. Gaan stap op die plaaspaaie. Dis maklik, en
jy kan vir kilometers gaan stap, sonder om
enige ander siel te sien of hoor!
2. Stap in die kloof-af (of op). Dis maklik om
die 4x4-roete te volg langs die kloof-af en
dan in te draai kloof se kant toe en in die
rivierloop op te stap. Die kloof self is nie `n
maklike stap nie, en neem kennis dat
kleiner kinders sal sukkel. Dit kos soms
klim-en-klouter, en dis betreklik ver! Neem
genoeg water saam, en sorg vir
snoepgoed. Hou genoeg tyd opsy om nie te
jaag nie, en hou jou oë oop vir
klipspringers, dassies en kleiner wild. Voëls
hou ook daarvan om langs die kranse te
hou. En onthou, jy stap in die wildernis!
Daar mag slange en skerpioene wees! Jy is
in hulle plek!
3. As jy op die buurman se grond die berg-in
wil gaan stap, moet jy net eers met Heinn
bevestig. By die hekkie-uit hou jy links op
die tweespoorpad. (Dit was vroeër die
Hexrivier 4x4-roete). Die pad draai dan
berg-in en teen die kop uit. Die roete is om
die minste te sê asemrowend, want hoe
hoër jy vorder, hoe beter raak die Karoovista’s!
(LW: Geen 4x4 voertuie!)
Neem weereens genoég water saam, want dis ook `n
vermoeiende roete met die opgaan, maar elke treë
werd! As jy bo-op die berg kom, kan jy die plaas van
bo-af bekyk! Stunning! Die rotsformasies is
betowerend… (en hou steeds jou oë oop vir rotskuns.)
Dis `n bergfietsparadys! Sorg dat jou bande genoeg
“sludge” in het, en/of jy het regmaakgoed byderhand,
sit jou rugsak met water en peuselgoed (en dalk `n
spaar buiteband) in, en durf die pad aan! Jou tong sal
uithang van genoeg ry! Daar is ver en baie paaie om te
verken. Weereens, is dit nie bedoel vir die hele gesin
nie. Dis plaas- tweespoorpaaie waarop jy ry, en dis
soms lekker tegnies. Pa en ouboet kan gaan longe
toets, maar kleinsus moet eerder tuis wag…
4x4 is in! Jy mag so veel as wat jy wil die paaie met die
ryding gaan probeer, en dan kan kleinsus voor sit! Dis
uitsluitlik 4x4! Moenie met `n gewone bakkie die
plaaspaaie aandurf nie! Jy kan in die moeilikheid
beland met `n glyery, en daar is nie selfoonopvangs
nie, óf Heinn en Carin kan dalk nie op die plaas wees
om te kom help nie. Kyk ook mooi na die kaart, en volg
die roetes soos dit hierop aangedui word. Daar is
kleurkodes om te help met die aanwysings. Gekleurde
klipstapels wys jou waar jy is. En hou groot asseblief
op die pad! Moenie jou veldnutsvoetuig in die veld
gaan toets nie – al dink jy hy kán daar ry! (Dis bloot net
onbeskof om op `n boer se grond nie op sy paaie te
hou nie!)